Read Poumei Naga LEVIMAI LARÜBVÜ 17 Bible Online

LEVIMAI LARÜBVÜ 17 - Poumei Naga bible

LEVIMAI LARÜBVÜ 17

¹MAPAO nou Moses hi zhai haitao hai soupfülo tea Aaron hi, puhvei nahmaitao hi ae Israel mai hi paopeio tea kharochi peie.

³Israel mai talinoua posheela peiyu cho, moa zhaotu moa nghitu hai MAPAO nou buyu Sahpao hi taloure bomü hinou moa buh kukhe hinou datha louzü puhsü Chikha nahai pfüthowure. Puhnou zhe hai soupawure, südonou puhye sü Ramai vei mai soua popei pulai moe.

⁵Daivanou chikha hai nasü peiwe toulouzü Israel mainou vakou hinou sou dathayu nasü panou MAPAO hi pove loure donou soupeie. Chuo puletao nou Sahpao hi taloure bomü hinou napao mai hi pove chavei lathao-a hrüloure vei posheela hai peiloure donoue.

⁶Napao nou souzhetao sü poloua Sahpao hi taloure bomü hinou buyu posheelabu hisü lazü peilai, ae southeatao hai meidei peilai, sübüa kainüvei nasü panou MAPAO ye jüpalai.

⁷Chuo Israel mainou sou hai vakou nou datha-a rashiye posheela peiyu büa MAPAO hi chilee cheche moyu vah sü soupulai moe. Israel mainou zhai hai nasü vere teile teitei hia soupfülai.

⁸Israel mai talinoua moa puletaoye koa hrüzhoyu shetumai talinoua meidei-a posheela peilai toulouzü, moa posheela taralia

⁹MAPAO hi peilai toulouzü, süna hai Sahpao hi taloure bomü hinou peimoa vakou nou posheela peire toulouzü, puhye sü Ramai vei mai soua populai moe.

¹⁰Israel mai moa puletaoye koa hrüzhoyu shetumai talinoua sou hai souzhe koa toure toulouzü, MAPAO nou puhye sü aetou laimoe, ae puhye Ramai vei mai soua popu more.

¹¹Hrikhaona ali nou hria buyu hai zhe vanou baie, südonou MAPAO nou souzhe hai maikhe maivei mahmo sü pota peiloure donou posheelabu hi lazü peio tea chikha peikhai toue. Zhe hai hrirai-e, mahmo khesü pota peilai.

¹²Südonou MAPAO nou Israel mai moa puletaoye koa buyu vakou maitaoye sou hai souzhe koa touso tea kharochi peikhai toue.

¹³Israel mai moa vakou nou velou neletaoye koa hrüyu mai talinou naanou hinou sheeyu rekhaona moa raohou southa louzü, puhnou souzhe hai deiphi zhaolaiwulai ae nai nou poho peilai.

¹⁴Hrikhaona veishi nou hria buyu sü zhe vanou baie, südonou MAPAO nou sou hai souzhe koa touso tea kharochi peikhai toue, ae mai talinou souzhe koa toure toulouzü puhye sü puhvei mai soua popu peilai moe.

¹⁵Israel mai moa shetumai talinou lah thaiyu sou, moa soukhaona nou southa khaitouyu sou hai touloure toulouzü, puhnou puhvei sabanü sü dzüshaowulai, dzükhü sheeloulai, ae koukhe koute hai naanou hinou soushee loumo koute kho-a bulai.

¹⁶Puhnou haibüa soupfümo louzü, veahoyu sü puh hi velai.