Read Poumei Naga LEVIMAI LARÜBVÜ 18 Bible Online

LEVIMAI LARÜBVÜ 18 - Poumei Naga bible

LEVIMAI LARÜBVÜ 18

¹MAPAO nou Moses hi haibüa Israel mai hi paopeio tea paoe, “E hai neletao vei Ramai MAPAO nasüe.

³Neletao nou vuli hrüa buyu Ejipt maivei zhaihrü moyuma Enou neletaoye peilaiyu teidei Kanaan hi mainou hrüyu zhaidou nasü thaifüso.

⁴Avei chikha khesü zülo ae Enou kharochi peikhai touyu khesü soulo. E hai neletao vei Ramai MAPAO nasüe.

⁵Enou peikhai touyu zhaihrü ae chikhatao hai zülo; neletao nou sütao hai soupfü louzü neletao vei hrirai hai khailupa loulai. E hai neletao vei Ramai MAPAO nasüe.”

⁶MAPAO nou zhaihrü haitao hai peie. Neletao hai lahvei kityarai maiye koa sazü sabulai moe.

⁷Ne nou ne pfüye sazü sabu peiyu vanou ne puoye hraongu soupeilai moe. Ne nou ne pfüye hrao soupeiso.

⁸Ne puo vei maipfü taralia nenou sabu sazü peia ne puoye hrao soupeiso.

⁹Ne nou ne tupfü maiye moyuma ne pfü vei nahnaotu mai moa ne puo vei nahnaotu mai taralia sabu sazü laimoe.

¹⁰Nevei tyao nahmai taralia nenou sabu sazülai moe, süsü ne lah ne hi hrao souloua baie.

¹¹nenou ne puo kihikha mai naotumai taralia sazülai moe, süsü nevei tupfü baie.

¹²Ne puo toupfü sü nevei nai baie, ae ne pfü vei tupfü mai-a nevei pfü baie, südonou puletaoye sü nenou sazülai moe.

¹⁴Ne puo thaihou maivei chapfü maiye nenou sazülai moe, daiolouzü honapai hai nevei pfü napai-e.

¹⁵Nenou nevei mou maiye sazülai moe,

¹⁶moyuma ne thaihou jürai maivei chapfüye sazülai moe.

¹⁷Nenou sahsou zhoyu naotupai vei nahnaotu moa tyaomaiye sazülai moe, daiolouzü süsü nevei kityarai mai baie.

¹⁸Nenou nevei chapfü vei chinamai aliye honapai hria bubusa sü nevei chapfü soupure donou polai moe.

¹⁹Naotumai ali nou zhe ta-a buyu phaki nenou honapaiye sü sazülai moe, daiolouzü puh sü naanou hinou shee moe.

²⁰Maivei keapfü maiye sazü sabuso, süsü ne lah neye souzhai loua baie.

²¹Neletao vei nahmai taralia Molek rahye poa sheela peiso, daiolouzü süsü Ramai MAPAO zhih soushi peia baie.

²²Poutumai ali nou poutumai ali hi vah ashi sü soulai moe, süsü Ramai nou ngaora-e.

²³Poutumai moa naotumai taralia hrikhaonaye koa sazü sabulai moe, süsü lahnou lahye naanou hinou souzhai loua baie.

²⁴Haibüyu vah haso tarali hinou neletao hai lahye shee moyu sü souso, daiolouzü neletao nou teidei hai hi veloumo jünou hrüa buyu maitao hai sübüa sheemoyu vah haso soupfüyu donou MAPAO nou hulaiwure.

²⁵Puletao nou soupfüyu vah haso sünou teidei hai nasü souzhaiwure, südonou MAPAO nou teidei nasü tudee peia sühi hrüa buyu maitaoye sü teidei nou malaiwure.

²⁶Puletao nou ngaorayu vah teitei sü soupfü peia teidei nasü souzhai peiwure, ana neletao nou sübüyu vah haso sü soupfülai moe. Neletao mai hrülai, Israel mai-a moyuma shetu maitao-a MAPAO vei chikhatao ae kharochi khesü züa bulouzü,

²⁸teidei sünanou raichoki hrüa buyu maitaoye laiyu büa neletaoye sü malaiwu laimoe.

²⁹Neletao nou süwe, süolouzü mai talinoua haibüa ngaorayu vah haso soupfüyu maiye sü Ramai vei mai soua popu peilai moe.

³⁰MAPAO nou paoe, “Enou kharochi peikhai touyu khesü zülo, ae raichoki teidei hai hinou hrüyu mai büa vah ashi khesü soupfüa nou lah neletaoye sheemoyu sü souso. E hai neletao vei Ramai MAPAO nasüe.”