Read Poumei Naga LEVIMAI LARÜBVÜ 19 Bible Online

LEVIMAI LARÜBVÜ 19 - Poumei Naga bible

LEVIMAI LARÜBVÜ 19

¹MAPAO nou Israel mai hi haibüa paopeio tea Moses hi paoe, “Shee-a bulo, daiolouzü neletao vei Ramai MAPAO E hai sheewe.

³Neletao mai hrülai nou pfüpuo ye tsükhoulai, ae Enou kharochi peikhai touyu büa Soteithe sü reihlai. E hai neletao vei Ramai MAPAO-e.

⁴“Eye thaowua basharaye sü tho taso, moa neletao hai hu nou ramai zhurai souloua sütao hai tholai moe. Neletao vei Ramai MAPAO sü E baie.

⁵“Neletao nou chavei lathaoyu vei posheela peiyu kikhaorü dathayu phaki, Enou kharochi peikhai touyu thaifüa soulo, sükulouzü Enou neletao vei posheela khesü popeilai.

⁶Neletao nou sou khesü dathayu teithe hinou moa thainesho teithe zhou nou touche loulai. Teithe asü zhou pa lia buyu sou veishi sü meideiwulai,

⁷daiolouzü sou sütao hai shee more, ae mai talinoua sou sütao tou louzü, Enou posheela peikhai touyu nasü popeilai moe.

⁸Mai talinoua sou süna tou louzü, puh sü mah souwure, südonou puhye sü avei mai soua popeipu khailai moe.

⁹“Neletao nou dou vayu phaki, dou kainghou hi buyu khesü valouso, ae valou moa shokhai touyutao hai dakhai kou vapu louso.

¹⁰Neletao nou darkha shithou hraikhai touloulai moe, moa neletao nou darkhashi de-rai kouyu khesü koloulai moe; neletao nou sütao hai touhayu mai ae shetumaiye donou shokhai peilai. E hai neletao vei Ramai MAPAO-e.

¹¹“Neletao hai maivei vaolai moe, maiye lalai moe, moa dalai moe.

¹²Neletao nou da-a azhih kua chaachou sü soulai moe, ae sübüa neletao nou Ramai zhih sü souzholai moe. E hai neletao vei Ramai MAPAO nasüe.

¹³“Neletao nou kinapa maiye souchoro laimoe, moa puhvei na sü shaolai moe. Neletao nou maiye zhoku poa vah soukhai touyu puletao vei zhohabo nasü khei zhou ali koute-a peimoa khaiso.

¹⁴Noubei peyu maiye chaaso, moa nghichayu mai ali vei nghoujü hi hanataralia panou hraloure donou pokhai peiso. Eye ngaopilo; E hai neletao vei Ramai MAPAO-e.

¹⁵“Neletao nou maichi kuyu phaki tsüle shee-a kaozü hinou chiku peio; touhayu maiye souku peiso, moa toungiyu maiye ngaopiso.

¹⁶Neletao hai da-a nou maiye paoshilai moe, nenou mai aliye southalai tea buyu phaki, nenou chi paokha peilou süa bulouzü puhye donou chi paokha peilai. E sü neletao vei MAPAO-e.

¹⁷“Neletao hai maitarali hia lekhevai nou vamoyu sü soulai moe, ana neletao nou puh hisü taho kaozü hinou phakulo, sübüa souloumo louzü puhvei mah nasü neletao nou pfüa bailai.

¹⁸Mai tarali hia khüngu sü phouso, moa puhye ngaora-a bukouso, ana nevei kinapa maiye lah neye leshiyu büa leshi peio. E hai neletao vei MAPAO-e.

¹⁹“Avei chikha khesü zülo. Neletao nou kikhaorü hai tyakuyu tya ahai sü pove koa pa pyalai moe. Dou ali hi taimou tya ahai thouhrülai moe ae sabanüa tyakuyu sah ahai koa rüpaloua banoulai moe.

²⁰“Poutumai ali nou maivei qilapfü soua muma peia lahdo soua hüpaloumo kinou honapaiye sazü sabulouzü, puhye sü tudeelai, ana puhye sü southalai moe, daiolouzü honapai hai qilapfü ali baie.

²¹Ana puhnou soumahyu vei posheela peire donou zhaotu ali hai Sahpao hi taloure bomü hisü pove MAPAO ye sheela peilai,

²²ae napao nou sünasü poloua mai navei mahmo souha peire donou naanou soua puhye sü soushee peilai, ae Ramai nou puhye sü khaipeilai.

²³“Neletao nou Kanaan maivei teidei hi veloua rashibe taralia shothou loure toulouzü, rashitao hai po asü koute shee moe touyu sü licholo. Süteile hi neletao nou rashi sü toulai moe.

²⁴Po adai na hisü neletao nou MAPAO ye kalo paoyu vei shee soua rashitao sü puhye posheela peilai.

²⁵Po angou na hiolouzü neletao nou rashi khesü toua bailai. Neletao nou haibüa souloure toulouzü rashibe khesü rashithou alao shipeilai. E hai neletao vei Ramai MAPAO-e.

²⁶“Neletao nou sou taralia souzhe koa nou toulai moe. Neletao nou kheikhupado taralia souso.

²⁷Neletao hai thaimai donou dopfüa pei bilai moe, moyuma mümai hai saiso, moyuma neletao vei vasou hi zhimü soupaso, moa cha daokhai pfülai moe. E hai neletao vei Ramai MAPAO-e.

²⁹“Neletao vei nah naotumaiye panou rathoki vei khakhapfü soutaso; sübüa neletao nou soure toulouzü, teidei sü khakhapfü datawulai ae hashi nou phoutao-a bailai.

³⁰Soteithe sü reilo, ae Eye thoyu buh nasü tsükhoulo. E hai neletao vei MAPAO-e.

³¹“Thaiyu maivei chipaoh paola-apeimai moyuma keinguyu maiye phouso, puletaoye chaku louzü, lah neletaoye souzhai lou bailai, E hai neletao vei MAPAO Ramai-e.

³²“Tsümaiye khuhaolo ae puletaoye tsükhoulo. Neletao nou Eye ngaopia achi sü zülo; E hai MAPAO-e.

³³“Neletao vei teidei hinou hrüyu shetumai ali hi kaomo zümoyu vah soulai moe.

³⁴Neletao nou puletaoye sü neletao vei thaihou jürai mai ali bütoua popeilai, ae lah neye leshiyu büa leshi peilai. Daiolouzü daoh vuli neletao-a Ejipt teidei hinou shetumai ali soua hrüe touyu nasü licholo. E hai neletao vei Ramai MAPAO-e.

³⁵“Neletao nou mai tarali hia da-a nou sa-jha douyu, süh-thayu moa pouyu chiyu nasü poa doupeilai moe.

³⁶Neletao nou checheyu dourai, sühchokhao, ae sühchovou nou polai. Neletaoye Ejipt teidei hinou sapa peiyu Ramai MAPAO nasü Enou-e.

³⁷Avei chikha teitei ae kharochi khesü zülo. E hai MAPAO-e.”