Read Poumei Naga LEVIMAI LARÜBVÜ 21 Bible Online

LEVIMAI LARÜBVÜ 21 - Poumei Naga bible

LEVIMAI LARÜBVÜ 21

¹MAPAO nou Moses hi haibüa napao maitao, Aaron vei nahpoutu maitao hi paopeio tea kharochi peie, “Napao mai talinoua lah puhvei kityarai mai thaiyu buh hisü velou lah puhye naanou hinou sheemoyu sü souso,

²puh hai puh pfüpuo, moa nahpoutu, moa nahnaotu, moa puh thaihou jürai,

³moyuma nghitamoa puhye koa buyu tupfümai molouzü lahye naanou hinou shee moyu sü souso.

⁴Puhnou nghi-sha soulouyu vanou kityarai souloua buyu maitalinou thaiyu buh hisü taho lahye shee moyu sü soulai moe.

⁵“Napao mai talia dopfüyu donou pei sailai moe, mümai bipfülai moe, vasou hi chadaopfülai moe, moyuma vasou hi zhimü soupalai moe.

⁶Napao mai hai shee-a nou bulai, ae avei zhih hai soushilai moe, daiolouzü puletao nou thoudzü vei posheela nasü Eye posheela peiwe, südonou puletao hai shee-a nou bulai.

⁷Napao mai ali nou khakhapfü, moa sheemoyu naotumai, moa reikhai maipfüye nalai moe, daiolouzü napao mai hai sheewe.

⁸Maikhe mainou napao maiye sheewe tea popeilai, daiolouzü posheela khesü puletao nou Eye posheela peiwe. E hai MAPAO-e; E sü shee-e ae Enou avei maitaoye soushee peiwure.

⁹Hakinou napao vei nah naotumai nou khakhapfü souta louzü, puhnou puh puoye hraongu soupeiwure, südonou honapaiye sü mei hinou deithawulai.

¹⁰“Napao Peichana hai nare theadzü sünou puh pei hi lazü peiwure ae napao maivei sabanü banoure donou soushee peiwure, südonou puhnou peiku moa talai moe, moyuma dopfüyu vei shee soua sabanü hai paiphawua banoulai moe.

¹¹Puhnou thaiphao buyu hisü veloulai moe, puh pfüpuo thaiyu buh hi koute-a velai moe, daiolouzü thaiphao buyu hisü veloua lahye naanou hinou sheemoyu sü soulai moe,

¹²moyuma puhnou avei sheeyu Sahpao nasü thaokhaiwua Eye thoyu buh nasü souzhai laimoe, daiolouzü puhye sü sheeyu vah panou soure donou theadzü napeia soukupa khaiwure. E hai MAPAO-e.

¹³Puh hai sheesha touyu loumainah nou nalai,

¹⁴reikhai maipfü moa khakhapfü sü nalai moe. Puhnou lah puhvei khü hinou sheesha touyu loumainah nou na-a bailai.

¹⁵Puhvei nahmai hai sheere pha-e, ana puhnou sheesha touyu loumainah namo louzü puhvei nahmaitao hai naanou hinou shee moa bailai. E hai MAPAO-e, ae Enou puhye panou Napao Peichana soure donou dokupa peiwure.”

¹⁶MAPAO nou Aaron hi haibüa paopeio tea Moses hi kharochi peie, “Nevei tyaosholea mai talia shovai louzü, puhye sü panou thoudzü vei posheela hai Eye posheela peisho. Chikha hai nasü vere teile veishi hia talai.

¹⁸Daiolouzü chaa pfüyu mai, nghichayu mai, phibah shiyu mai, moyuma pah hi cha chemoyu mai, phibah shiyu mai talia Eye posheela hai pokou peilai moe.

¹⁹Phibah shiyu mai,

²⁰soutsü taoyu mai, moyuma tai-dzüyu mai; nghithou shiyu mai moa loukhaora souyu mai, ae dzüthou lakhai touyu mai talia panou posheela sü Eye popeilai moe.

²¹Napao Aaron vei tyaosholea mai taralia shovai louzü, puhye panou posheela hai Eye popeilai moe.

²²Mai sütao hai Eye posheela peiyu touso louzü toua bailai ae sheesheelai thoudzü vei posheela khaitouyu touso louzü toua bailai,

²³ana puletao hai shovaiyu donou sheeyu haosah haokhai touyu nghiki hai koulai moe, moyuma posheelabu hisü koulai moe. Puhnou sheeyu na haitao hai souzhai laimoe, daiolouzü E hai MAPAO-e ae Enou sütao hai soushee khaitoue.”

²⁴Südonou Moses nou Aaron hi, puhvei nahmaitao hi ae Israel mai hi haitao hai paopeie.