Read Poumei Naga LEVIMAI LARÜBVÜ 25 Bible Online

LEVIMAI LARÜBVÜ 25 - Poumei Naga bible

LEVIMAI LARÜBVÜ 25

¹MAPAO nou Moses hi Sinai Deichi vanou kharochi haitao hai Israel mai hi peio tea paopeie. MAPAO nou puletaoye peilaiyu teidei hi neletao nou talou polouyu thai, MAPAO ye tsükhoua po anai chühai neletao vei teidei sü tadaotou moa panou solai.

³Neletao nou po arou koute hai ta daotoua, kipei mara thoutoua thoudzü khesü pojü khailo.

⁴Ana po anai nava louzü teidei teitei hai MAPAO hi popeiwua panou potei sasasü solai. Neletao vei dou hi taimou thouso, ae neletao vei kipei khesü phi soupeiso.

⁵Taimou daothou moa lah paopayu chamou hai neletao nou chachilai moe, ae phi soupei moa rashithou shiyutao hai neletao nou hraitoulai moe; po sünasü teidei hai panou solai.

⁶Po sünasü neletao nou taimou thoumoyuma neletao nou tousore, neletao vei qila maitao nou toure, neletao vei vah souyu maitao, ae neletaoye koa buyu shetumai,

⁷neletao vei kikhaorü, ae rekhaona veishi nou toure touso sü ngaoloua bailai.

⁸Neletao nou po anai teanou anai hai phou louzü, süsü po raidaikü palai.

⁹Süthaisü khouh anai vei khoukha kirou zhou hai Khailupa louyu vei Teithe soua mai seiho teidei veishi hisü shabe nghoupeio.

¹⁰Hai zhaibüa neletao nou po raingou nasü pokupalo ae teidei hi hrüyu mai hrülaiye lahdo soupeiyu vei shapaopa peio. Po haina hi hai raichoki zhotou zhoso louyu füdei moa na taralia paopu na hisü moa puhvei kityarai mai hi dakhai peilai, ae mai talia qila soua zhokhai touyu na-a puhvei kihikhamai hisü dakhaive loulai.

¹¹Po haina hisü neletao nou taimou hai thoulai moe, moyuma lah paopayu chamou moa phi soupei moa rashithou shiyu khesü neletao nou hraitoulai moe.

¹²Potei sasasü neletaoye donou sheeyu po ali soua reilai; neletao nou dou hinou papeiyu khesü toua bailai.

¹³Neletao nou hülouyu na taralia leh paopu hisü lukhai peilai.

¹⁴Südonou neletao vei teidei hai lah neletao vei thaihou jürai mai hi zhopei louzü, moa puletao hinou hülouzü, ali nou ali hi shodo ashi hai soulai moe.

¹⁵Füdei nasü Podakhai loure Po kazhou buyu sü zhuloua sükohi thoudzü kazhou hai füdei sünanou pa peilou süe touyu hinou muma hai polai.

¹⁶Hakinou po taoli bulouzü muma hai pulai, ana po poumo louzü muma hai khailai, daiolouzü füdei zhotouyu hai sühinou papei lousüyu thoudzü likhei bailai.

¹⁷Lah vei thaihou jürai mai hi da-a nou shodo ashi souso, ana neletao Ramai MAPAO chi zülo.

¹⁸MAPAO vei chikha teitei ae kharochi khesü zülo, sükulouzü neletao vei teidei hinou neletao hai kaozhou vei-a hrüloulai.

¹⁹Teidei sünou thoudzü hai veisho-a nou papeilai, ae neletao nou jüpayu khesü ngaoche loulai alia vasa-a nou teidei hisü hrüloulai.

²⁰Ana kamai-a nou po anai na hisü taimou hai thoulai modao ae thoudzü hai ngaolai moe, südonou po süna hisü dainou toua hrülai tea noulou vei-e.

²¹MAPAO nou po arou nahai teidei sü shiha peilai, sübüa thoudzü hai po ahai koute-a touhaolou hoyu sü papeilai.

²²Neletao nou po acha nava taimou daothouyu teile hi koute-a po arou hinou ngaolouyu chamou hai toua nou bulai, ae neletao nou daothouyu taimoutao hai pa chachiyu phaki-a neletao vei thoudzü hai chezümoa nou bukoua bailai.

²³Neletao vei füdei hai teisa donou zhotou laimoe, daiolouzü dei hai neletao vei moe; haisü Ramai vei baie, ae shetumai ali büa teile daotuli donou neletao hisü ngapei khaitoua baie.

²⁴Füdei taralia zho louyuma, paopu naye panou hüdakhai loure vei zü hai peilai.

²⁵Hakinou Israel mai talinou touhayu donou puhvei füdei hai zholai toulouzü, puhye nghikayu kityarai mai aliye panou hüloulai.

²⁶Puhvei kityarai mai ali-a süsü hüdakhai louhoyuma, haithai naki puhnou toungi palouzü füdei nasü hüdakhai loua bailai.

²⁷Puhnou haibüa soulai toulouzü, Podakhai loure Po nasü kazhou buhie touyu choloua puhvei füdei polouyu maina hisü muma hai pei-a hüdakhai loulai.

²⁸Ana puhnou hüdakhai loure vei muma hai chezü louzü, puhvei füdei hai Podakhai louyu Po koutemo koute hai puhnou zhoh peiyu maina vei soua bailai, ae Podakhai louyu Po kousü dei paopu hi lukhai peilai.

²⁹Mai ali nou nuhdu kaopo pokhai touyu khevai buyu ki ali hai zhoh louzü, puhnou po ali lüvai hinou hüdakhai louvei-e, po ali koute hai hüdakhai loure vei zü hai puh hi bue.

³⁰Ana po ali lüvai hinou puhnou ki nasü hüdakhai loumore toulouzü, haithai hai puhnou hüdakhai loure vei zü hai ha-a bailai, ae puh ki hai hülouyu maina vei teisa nou soua bailai, Podakhai louyu Po hia puhvei ki hai lukhai peilai moe.

³¹Ana kaopo pomoyu nuhtao hinou buyu ki louzü füdei zhohyu zhai thaifüa ta-a bailai; ki paopu nanou teile tarali hia hüdakhai loure vei zü hai bulai, ae Podakhai louyu Po hi kou lukhai peia bailai.

³²Anou Levi mai louzü, puletao hi peikhai touyu nuhdutao hinou buyu puletao vei ki-lu sü teile tarali hia hüdakhai loure vei zü bue.

³³Hakinou hüdakhai loumoa buyuma Levi maitao nou zhohkhai touyu ki-lu hai Podakhai louyu Po hiolouzü dakhai peilai, daiolouzü Levi maitao nou buyu ki khesü Israel mai hrohinou puletao vei panou teisa soure donou peiwure.

³⁴Ana Levi maivei nuhdutao pehao hinou buyu füdeitao hai zhohtoulai moe; haisü teisa nou puletao vei zha soure donou puletao hi peiwure.

³⁵Neletao vei thaihou jürai mai ali hai touha-a nou lah hrilou hoa bulouzü, nevei kuvah souyu mai ali büa puhye soukha peia panou neye koa bulo.

³⁶Puh hi puo-pao peiyu sü vea lia potouso, ana Ramai chi zülo, ae ne thaihou jürai mainaye sü ne pehao hinou koa hrülo.

³⁷Nenou puhye pousha pou-pao peikhai touyu hai pousha vea poso, ae na taralia puh hisü patoua zhotou laimoe.

³⁸Neletao vei Ramai soure donou neletaoye Ejipt teidei hinou sapaloua neletaoye Kanaan maivei teidei peiyu Ramai MAPAO nou chikha hai nasü neletao hi peiwe.

³⁹Neletao nghiki nou buyu thaihou jürai mai ali hai touhayu donou ne hi qila soure donou zhohthou peilouzü, nenou puhye sü hülouyu qila mai ali büa panou nevei kuvah hai soulai moe.

⁴⁰Puhye sü zho kutouyu mai ali büa panou nevei kuvah soua Podakhai louyu Po hi koute bulai.

⁴¹Süthaisü nenou puhye ae puhvei nahmai noupu panou lah vei kihikhamai hisü dakhai veloulai.

⁴²Israel mai hai MAPAO nou Ejipt maivei teidei hinou hüpa louyu puhvei qila maitao-e; puletaoye sü qila soure donou zhohlai moe.

⁴³Neletao nou puletaoye sü taitsü poa sa-a vah soulai moe, ana neletao Ramai chi zülo.

⁴⁴Hakinou neletao nou qila mai jüpawe toulouzü, neletao vei pehao hinou buyu tyahrü kukhe mainou hülo.

⁴⁵Neletao hinou hrüzho-a buyu vakou maivei nahmai nou hüloua bailai. Neletao vei teidei hinou nathouyu maitao hai neletao vei navei soulou vei-e,

⁴⁶ae neletao nou puletaoye sü neletao vei nahmai hi kikaa soua peilou vei-e, ae puletao hria bukisa sü neletao vei kuvah soulai. Ana neletao nou neletao vei thaihou jürai soua buyu Israel maiye sübüa souvea laimoe.

⁴⁷Neletao hinou koa hrüzhoyu vakou mai ali nou toungi paloua puh nghiki nou hrüyu Israel mai ali nou hatouha-a vakou maina hi qila soure donou zhohthou peilouzü,

⁴⁸puhye sü hüdakhai palouyu vei zü bue. Puhvei thaihou jürai,

⁴⁹moa puh puo thaihou jürai mai, moa puhye nghitei-a buyu kityarai mai ali nou puhye sü hüdakhai palou vei-e; moyuma puhnou toungi palouzü puh lah hüdakhai palou vei-e.

⁵⁰Puhnou puhye hülouyu paopu naye koa phazho loua puhye hülouyu teile hinou poa takou daore Podakhai louyu Po hi koute hai teile kazhou bue touyu sü phouloulai, sübüa muma nasü zho kutouyu mai ali nou ngaoyu thaifüa phaloua lah puhye hüdakhai paloulai.

⁵¹Puhnou po kazhou buhie touyu thaifüa puhye hülouyu vei muma hai dakhai peilai,

⁵²

⁵³zho kutouyu mai aliye potei hi ngayu vei muma thaifüa puhnou dakhai peilai. Puhvei paopu nanou puhye sü taitsüpoa vah panou soulai moe.

⁵⁴Haibüa puhnou lahdo soua phalou hore toulouzü, puh ae puhvei nahmaitao hai takou daore Podakhai louyu Po hisü lahdo soua phapeilai.

⁵⁵Israel mai aliye panou teisa vei qila hai soulai moe, daiolouzü puletao hai MAPAO vei qila maitao-e. Puhnou puletaoye sü Ejipt hinou hüpa loure; puh hai puletao vei Ramai MAPAO-e.