Read Poumei Naga LEVIMAI LARÜBVÜ 26 Bible Online

LEVIMAI LARÜBVÜ 26 - Poumei Naga bible

LEVIMAI LARÜBVÜ 26

¹MAPAO nou paoe, “Neletao nou bashara moa zhurai souloua, moyuma chuh sholaloua tholai moe. E hai neletao vei Ramai MAPAO-e.

²Neletao nou Soteithe nasü tsükhoua reilai, ae Eye thoyu buh nasü khuhaolai. E hai MAPAO-e.

³“Neletao nou avei chikhatao thaifüa hrülouzü, ae avei kharochi khesü züa bulouzü,

⁴Enou teile macha hinou teirü sü seive peilai, sübüa teidei nou chamou hai veisho-a panou peilai, ae süübe khenou rashithou alao shipeilai.

⁵Neletao nou chachi chelou moa bukinou darkhashi sü haitou talai, ae darkhashi haitou chelou moa bukinou taimou thoukhai touyu khesü phoutou talai. Neletao nou tounüyu veishi hai ngaoloulai, ae neletao vei teidei hinou kaozhou vei-a hrüloulai.

⁶“Enou neletao vei teidei hisü kaonayu hai peilai, ae neletao nou ngaopiyu halia ha-a nou züzhi loulai. Enou khaosou ashi khesü neletao vei teidei hinou hulai peilai, ae neletao vei teidei hisü panou soureih soupulai moe.

⁷Neletao nou ngaobayu maitao jünou reih veiloulai.

⁸Neletao mai angou nou mai kaihli hai duloua bailai, ae neletao mai kaihli nou mai thekirou hai duloulai.

⁹Enou neletaoye shiha peilai ae toudzü alao peilai; Enou neletaoye koa vo soukhai touyu nasü soupeilai.

¹⁰Neletaoye panou veisho-a chachi loulai, ae thouthou vapove thoure donou thouvo buyu khesü panou buh soudupua hrüyu sü soulai.

¹¹Enou avei sheeyu Sahpao hinou neletaoye koa bulai, ae Enou neletao hinou tarei tavai khaitou peilai moe.

¹²Enou neletaoye koa bulai; Enou neletao vei Ramai sü soulai, ae neletao nou avei mai soulai.

¹³Neletaoye panou qila soua bumore donou neletao vei Ramai MAPAO Enou neletaoye sü Ejipt hinou sapa peikhai toue. Enou neletaoye soutai sounou pei-a buyu khouko nasü souha peiwua neletaoye panou pei pfülapoa tayu sü soupeie.”

¹⁴MAPAO nou paoe, “Hakinou neletao nou avei chikhatao hai zümore toulouzü, neletaoye sü Enou tudeelai.

¹⁵Neletao nou avei chikhatao ae kharochi khesü züba louzü, ae Enou neletaoye koa vo soukhai touyu nasü pfütho louzü,

¹⁶Enou neletaoye sü tudeelai. Enou neletao hisü ngaopi shoyu veahoyu khesü seive peilai, neletaoye soukanghi peiyu ae rachi-a southou nghithou chayu ae neletao vei hrüh hai soukhai laiwulai. Neletao nou taimou daothouyuma süsü hamako hinou panou thou-a bailai, daiolouzü neletaoye ngaobayu maitaoye panou süsü touloua bailai.

¹⁷Enou neletaoye sü dutalai; sübüa neletaoye panou hraongu ngao-a bailai, ae neletaoye ngaora-a buyu maitaoye panou neletaoye tukha poa hrülai; mailia neletaoye thaihu moyuma neletao hai ngaopi shopoa nou tuta-a bailai.

¹⁸“Haibü peia buyuma neletao nou achi züba louzü, Enou veahoyu hai avu anai thoupuloua neletaoye tudeepu peilai.

¹⁹Enou neletao vei khaophu soua rochiyu nasü souha peilai; neletao vei teidei hisü panou teirü peilai moe, ae neletao vei dei sü thekei teanou pa huh büa khoulai.

²⁰Neletao nou veasho-a nou vah souyu telai veishi sü panou hamako bailai, daiolouzü neletao vei teidei sü thoudzü lia papeilai moe, ae rashibe khesü rashithou shipeilai moe.

²¹“Neletao nou achi züba-a Eye khaityapu louzü, Enou neletao hisü avu anai hai veahoyu sü thoupu peilai.

²²Enou neletao hisü soukhao ashi khesü seive peilai, ae puletaoye panou neletao vei nahmaitaoye southawulai, kikhaorü khesü panou nütou loulai, ae neletaoye panou hrüshi louta-a ludu khesü panou mai haomo ta-a bailai.

²³“Haibüa tukha peia buyuma neletao nou ahi dakhai vemoa Eye khaitya bulouzü,

²⁴Enou neletaoye sü avu anai hai le veahoyu pei hinou thoupuloua tudee peilai.

²⁵Neletao nou vo soukhai touyu nasü pfüthoyu donou Enou neletaoye soureih nou seive peia tudee peilai. Hakinou neletao nou nuhdutao hinou tuve jüloua buyuma Enou neletao hisü rahta-rahvu sünou seive peilai, sübüa neletaoye panou ngaobayu maitao nghoujü nou hraongu sü ngaolai.

²⁶Neletao nou ngaotou ngaoso-a buyu ludu khesü Enou soude laiwulai, sübüa naotumai kirou nou hakouyu thaobvü ali hinou hakhotoua bailai. Puletao nou süna hai zhitoulai, ana pouphou laimoe.

²⁷“Hai koute-a neletao nou achi züba-a Eye khaitya louzü,

²⁸avei lekha rarou hinou neletaoye raichoki veahoyu jünou bakha anai hai souveapu peilai.

²⁹Neletao nou houzü zhuleyu donou lah neletao vei nahmai koute-a panou toulai.

³⁰Neletao nou deichitao hinou soukhai touyu rathobuh khesü Enou soushiwulai, neletao vei poukai nüvei meidei-a posheelabu khesü Enou dakho laiwulai, ae neletao vei thaiphao khesü panou kaodua buyu neletao vei basharatao pei hi laikhai peilai. Enou neletaoye ngaorayu hinou

³¹neletao vei nuhdu khesü soukanghi khaiwulai, neletao nou rathoyu buh khesü soushiwulai, ae neletao nou posheela peiyu khesü Enou popeilai moe.

³²Enou neletao vei teidei sü soushi sousasa khaiwulai, sübüa teidei hai hi tave füshoyu neletao vei ngaobayu maitao hai khupa soulai.

³³Enou neletao hisü soureih pove peilai ae neletaoye vakou maivei teidei hisü soupho rarou khaiwulai. Neletao vei teidei hisü panou mai hrülai moe, ae neletao vei nuhdu khesü soushi khaiwulai.

³⁴Süthaisü neletao vei teidei hai panou vaphi tea soyu ngaoloulai, neletao nou ngaobayu maitao vei teidei hinou bubusa sü neletao vei teidei hai soyu ngaoloulai.

³⁶“Vakou maivei teidei hi nüpoa tayu maitaoye sü Enou ngaopi shoyu soupeilai, sübüa puletaoye panou teikhai nou süünghou ali hüle peiyu kho koute-a choulouyu phaki panou ngaopi-a tutalai. Mai linoua thaihu moyuma soureih hinou tutayu büa panou tutalai, ae ngaobamai hai nghiki ha-a buyuma panou kaodu ta-a bailai.

³⁷Mai linoua thaihu moa buyuma neletao hai alinou ali hinou hraloua kaodu ta-a bailai, ae ngaoba maiye dulou ho-a bailai.

³⁸Neletao hai vakou maivei teidei hinou thaita-a bailai, ae ngaobayu maivei teidei hinou neletaoye sü poa daovua bailai.

³⁹Shokhai toua buyu maitao hai lah puletao vei mahmo donou ae puletao vei puopao maitao vei mah donou ngaobayu maitao vei teidei hinou hakata-a bailai.

⁴⁰“Ana puletao vei nahmai tyaomaitao nou puletao vei mah ae puletao vei puopao maitao nou soumah khaitouyu ae Eye khaitya khaitouyu khesü mahwure tea mahla loulai,

⁴¹ae süvanou Enou puletao pei hi rarouloua puletaoye sü ngaobayu maitao vei teidei hi seiho khaiwure. Akhai hikou haibüa neletao vei nahmai tyaomaitao nou leda louzü ae puletao vei mah donou veahoyu hai ngaoloure toulouzü,

⁴²Enou Jakob, Isaak ae Abraham hi vo soukhai touyu nasü licho peilai, ae Enou avei maitao hi teidei nasü peilai tea chaachou soukhai touyu vo nasü soudakhaipu peilai.

⁴³Daiolouzü rai-a nou teidei nasü panou mai hrümoa thaokhailai, sübüa teidei sü panou soyu hai ngaoche loulai, ae puletao nou lah vei mahmo donou veahoyu sü ngaolai, daiolouzü puletao nou avei chikhatao ae kharochi khesü züba-a malaiwure.

⁴⁴Ana puletao nou ngaobayu maitao vei teidei hinou buyuma, Enou puletaoye sü souhakhai toupeilai moe. Sübüa soure touyu thaio, Enou puletao vei Ramai MAPAO soulai tea vo soukhai touyu nasü ha-a bailai.

⁴⁵Enou puletao vei puopao maitaoye tyahrü kukhe maitao nghoujü hinou avei khouko soungao-a puletaoye Ejipt teidei hinou sapa peie, ae Enou puletao vei Ramai MAPAO soulai tea vo soukhai touyu nasü soupu peilai.”

⁴⁶Haitao teitei hai MAPAO vei Chikha ae kharochi soulai tea puhnou Sinai Deichi hinou Israel maiye donou Moses hi peie.