Read Poumei Naga LEVIMAI LARÜBVÜ 27 Bible Online

LEVIMAI LARÜBVÜ 27 - Poumei Naga bible

LEVIMAI LARÜBVÜ 27

¹MAPAO nou Moses hi zhai haitao hai Israel maiye soulo tea nou peie. Mai ali nou MAPAO hi peilai tea chaachou soukhai toulouzü, mai honaye sü khelo peikhai touyu muh thaifüa puhye panou lahdo soupei louvei-e,

³maisou nou tayu muma thaifüa: — poutumai ali, po kai hinou poa po rairou payu mai hai shahu raingou noulai — tsümai naotumai ali hai shahu shirou noulai — nahleyu poutumai ali hai po angou hinou poa po kai khete hai shahu kai noulai — nahleyu naotumai ali hai shahu kirou noulai — po angou khenou buyu poutumai hai shahu angou noulai — po angou khenou buyu naotumai hai shahu asü noulai — po rairou layu poutumai ali hai shahu kiangou noulai — po rairou layu naotumai ali hai shahu kirou noulai.

⁸Mai ali nou MAPAO hi peilai tea chaachou soukhai toua puh hai touhayu donou puhnou peilai touyu hai peilou hore toulouzü, mai naye sü napao hi savelai, ae napao nou zhuloua maina nou peilou süyu hinou tsücholoua phapeilai.

⁹Hakinou hrikhaona nou MAPAO hi popeilai tea chaachou soukhai toulouzü, posheela peikhai touyu na taralia shee khai-a baie,

¹⁰ae puhnou peilai tea paokhai touyu hrikhaona nasü hrikhaona kukhe linou poa lealou shi-e. Puhnou sübüa soulouzü, hrikhaona ahai khinou MAPAO vei soulai.

¹¹Hakinou puhnou peilai tea chaachou soukhai touyu hrikhaona nahai naanou hinou sheemoa MAPAO hi posheela peilou shi louzü, maina nou hrikhaona nahai napao hi pove peilai.

¹²Napao nou süna vei muma hai zhuloua dade peilai, ae muma sünanou akhai soua bailai.

¹³Hakinou mai sünanou hrikhaona süna hai hüdakhai loulai toulouzü, puhnou sünavei muma pei hinou zha kaih hinou zha kai lihai thoupuloua peilai.

¹⁴Mai ali nou puhvei ki hai MAPAO hi poa peithou louzü, napao nou ki nasü veishiyu zhuloua ki vei muh hai dade peilai, ae süna nou akhai soua bailai.

¹⁵Hakinou MAPAO hi peithou khaitouyu mai nanou ki hai hüdakhai loulai toulouzü, ki vei muh pei hinou zha kaih hinou zha kai hai thoupuloua peilai.

¹⁶Mai ali nou puhvei füdei hai MAPAO hi posheela peilouzü, dei muh hai taimou kazhou peilou süe touyu thaifüa southou sühcho kai ngaolouyu hisü shahu kirou nou talai.

¹⁷Puhnou puhvei füdei hai Podakhai louyu Po thaibü hinou posheela peilouzü, dei muh hai chekho-a nou peilai.

¹⁸Hakinou puhnou na-a posheela peilouzü, napao nou Podakhai louyu Po nasü kazhou buyu potao hai choloua muh hai khai-a nou peilai.

¹⁹Mai ali nou puhvei dou hai posheela peiwua puhnou hüdakhai loulai toulouzü, puhnou dou vei muh pei hinou zha kaih souloua zha kai hai thoupu peilai.

²⁰Puhnou posheela khaitouyu dou na hai MAPAO hinou hüdakhai loumo jünou mai hi zhothou peiwu louzü, puhnou haithai hüdakhai loure vei zü hai hare.

²¹Podakhai louyu Po kouyu phaki, dou nasü MAPAO vei teisa nou soua bailai, ae süsü napao maivei soulai.

²²Puhnou hüdakhai louyu dou ali hai puhnou MAPAO hi posheela peilouzü,

²³napao nou süna vei muh hai takou daore Podakhai louyu Po kazhou buyu sü zhuloua muma hai paopeilai, ae mai nanou muh hai süzhou teithe hinou peilai, ae pousha sütao hai MAPAO vei soulai.

²⁴Podakhai louyu Po kouyu phaki dou nasü paopu hi moyuma puhvei kityarai mai hi lukhai peilai.

²⁵Hataralia maisou nou ta-a buyu muh thaifüa talai.

²⁶Kikhaorü tourai raikai nasü MAPAO vei baie, südonou mai talia süna hai MAPAO hi poa sheela peilai moe. Cho toutu, zhaotu toutu, ae nghitu toutu hai MAPAO vei-e,

²⁷ana naanou hinou shee moyu kikhaorü tourai khayu nawo louzü maisou nou ta-a buyu muma thaifüa hüdakhai loua bailai, ae süna vei muh pei hinou zha kaih hinou zha kai hai thoupu peilai. Hakinou sünasü puhnou hüdakhai loumo louzü muh thaifüa mai kukhe mai hia zhohlou vei-e.

²⁸Ana mai talinoua sheesha tea nou MAPAO hi posheela khaitouyu tarali hai süsü maiyuma, moa kikhaorüa, moyuma füdeiyuma zhohlai moe, moyuma lukhai loulai moe. Sünasü teisa donou MAPAO hinou shee-a bua bailai.

²⁹Haibüa posheela khaitouyu mai koute-a hüdakhai loushi-e, puhye sü southa bailai.

³⁰Teidei hinou payu thoudzü moa shinamara taralia zha kirou hinou zha ali hai MAPAO vei-e.

³¹Puhnou süna hai hüdakhai loulai toulouzü, maisou nou ta-a buyu muh pei hinou zha kaih hinou zha kai hai thoupu loua peilai.

³²Kikhaorüa kirou buyu hinou ali hai MAPAO vei-e. Kikhaorü phouyu phaki phoupoa kou kirou nahai MAPAO vei-e.

³³Kikhaorü paopu nanou lelou hoyu moa shiyu nanou dopa peilai moe, ae puhnou kikhaorü kukhe ali nou poa lealou lai moe. Hakinou puhnou poa lealoure toulouzü kikhaorü sühai khinou MAPAO vei soua bailai, ae sünasü panou hüdakhai loulai moe.

³⁴Chikha haitao hai MAPAO nou Moses hi Sinai Deichi hinou Israel maiye donou peie.