Read Poumei Naga LEVIMAI LARÜBVÜ 6 Bible Online

LEVIMAI LARÜBVÜ 6 - Poumei Naga bible

LEVIMAI LARÜBVÜ 6

¹MAPAO nou Moses hi zhai haitao hai soulo tea peie.

²Mai talinoua puhvei kinapa mai alinou puhye louche-a khaitouyu na tarali hai sümoe tea lukhai peiba louzü, moa vaoloure toulouzü, moa mai houna hi da-a nou puhye lawu louzü,

³moa khaitouyu na nasü da-a nou hawure ae puhnou sünasü ngaomoe tea chaachou souwulouzü, moyuma haibüa kaomoyu hinou mah soulouzü,

⁴puhnou vaolouyu moa da-a nou polouyu moa puh hi peikhai touyu, moa ha-a nou ngaolouyu na,

⁵moa da-a nou chaachou soukhai toulouzü, puh mahwure tea süloua posheela peiyu teithe hinou na paopu naye zha kaih hinou zha kai hai thoupuloua dakhai peilai.

⁶Puhnou soumah khaitouyu donou MAPAO hi posheela peire donou puhnou chaa hayu zhaotu moa nghitu pou/chü ali hai napao hi pove peilai. Süna vei muma hai maisou nou ta-a buyu hinou phouloua peilai.

⁷Napao nou haibüa puhnou mah soukhai touyu donou posheela peiyu nasü MAPAO hi posheela peilai, ae puhvei mah sü khaipeilai.

⁸MAPAO nou Moses hi paoe,

⁹“Aaron ae puhvei nahpoutu maitao hi hai zhai büa meidei-a posheela peiyu sü soulo tea kharochi peio: Meidei-a posheela peiyu nasü kheimathe hai panou posheelabu phao hinou bulai, ae mei hai panou tao-a bukou telai.

¹⁰Süthaisü napao nou deizüzüyu naazao ae nüjütya thouloua posheelabu hi vounai khesü poloua posheelabu phi hi vekhailai.

¹¹Süthaisü puhnou sabanü hai daloua vounaitao sü puletao nou buyu fühao vakou hi popa naanou soua sheeyu buh hisü khaiwulai.

¹²Posheelabu hi mei hai panou nghikhai toumoa tao-a nou bukou telai. Shonachü hai napao nou posheelabu hisü süü thoudeilai, ae meidei-a posheela peiyu hai soulai, ae southeatao hai chavei lathao-a buloure vei posheela hai sheela peilai.

¹³Posheelabu hisü mei hai panou nghikhai toumoa tao-a bukou telai.”

¹⁴Thoudzü vei posheela peiyu zhai sü haibülai. Aaron tyaosholea hinou hrüveyu napao maitao nou posheela hai nasü MAPAO hi posheelabu nghoujü hinou posheela peilai.

¹⁵Süthaisü puhnou sou bahzü ali, theadzü ae poukai nüvei taosü poloua posheelabu hinou meidei-a MAPAO ye posheela peilai. Haibüa meidei-a posheela peiyu hai MAPAO nou jüpa-e.

¹⁶Lia buyu posheela natao sü napao nou poloulai. Haitao sü kheih thoumoa raokhao khaoloulai, ae MAPAO nou buyu Sahpao, sheeyu buh hinou toulai. MAPAO nou haitao sü thoudzü vei posheela peiyu hinou napao maitao vei soua peiwure. Hai nasü mah vei posheela peiyu ae paozho khapeiyu vei posheela büa sheesha toure.

¹⁸Aaron vei tyaosholea hinou hrüveyu poutumai taralinoua hai nasü toua bailai. Hai nasü meidei-a MAPAO hi posheela peiyu hinou puletao nou ngaozü nasüe. Mai kukhe tarali nou thoudzü vei posheela peikhai touyu hai nasü deilouzü, hai na hi sheeyu vei khouko nanou puhye sü soushi bailai.

¹⁹MAPAO nou Moses hi paoe,

²⁰“Aaron vei tounah hinou mai taralia pokupa theadzü napeiyu teithe zhou sü puhnou MAPAO hi posheela hai peilai: süsü veikayu sou sühcho ali hai pove peilai, dali hai shona noulai ae dali hai koukhe hinoulai.

²¹Hai nasü theadzü thouhrüloua lee ali hinou saloua thoudzü vei posheela peiyu büa sousasaloua posheela peio. MAPAO nou haibüa posheela peiyu hai jüpa-e.

²²Vere teile teitei hia Aaron vei tyaosholea maitao nou pokupa theadzü naloua napao soulai toulouzü posheela hai nasü soulai. Posheela hai nasü teitei nou meidei loua MAPAO hi posheela peilai.

²³Napao mainou peiyu thoudzü vei posheela nasü halia toulai moe, teitei nou poa meidei laikhai-a bailai.”

²⁴MAPAO nou Moses hi haibüa Aaron vei nahmaitao hisü paopeio tea kharochi peie: Mah vei posheela peiyu hrikhaona hai posheelabu reilova, meidei-a posheela peiyu hrikhaona dathayu buh hinou dathalai. Hai nasü shee shoyu posheela ali-e.

²⁶Hrikhaona naye posheela peiyu napao nou haisü sheeyu buh MAPAO nou buyu Sahpao khevai hinou toulai.

²⁷Mai taralinou moa hana taralinou sou nasü deilouzü, sühi sheeyu khouko nou sünaye sü soushilai. Ae souzhe nou hana tarali hi nalouzü, sünasü sheeyu buh hinou dzüshaolo.

²⁸Nailee hinou sou hai kho louzü lee sünasü dakhowo, ae baosahu lee hinou sou nasü kho louzü, lee sünasü sousheesha touloua dzü khüshee khailo.

²⁹Napao maivei kihikha hinou posheela hai nasü poutumai tarali noua toua bailai, haisü sheesha tou-e.

³⁰Ana souzhe hai Sahpao khevai polou mah sousheere donou naanou souwu louzü, hrikhaona sünasü toulou shi-e, posheela süna hai teitei nou mei deiwulai.