Read Poumei Naga LEVIMAI LARÜBVÜ 7 Bible Online

LEVIMAI LARÜBVÜ 7 - Poumei Naga bible

LEVIMAI LARÜBVÜ 7

¹Soumah khaitoua paokha peiyu vei posheela sü haibüa soulai. Hai nasü sheesho-e.

²Posheela haina vei hrikhaona nasü meidei-a posheela peiyu hrikhaona dathayu posheelabu vei reilova nou dathalai, ae haina vei souzhetao hai posheelabu vei kainghou teitei hi lazü peilai.

³Southea veishi hai poloua posheela peilai: mi hi taoyu theatao, lena hi buyu theatao,

⁴kithou ahai ae sühinou taoyu southeatao, alia veikayu sousütao hai poa sheela peilai.

⁵Southea teitei hai napao nou MAPAO hi thoudzü vei posheela soua posheela peilai. Haina sü paokha peiyu vei posheela nasüe.

⁶Napao maivei kihikha hinou buyu poutumai taralia haina sü toua bailai, ana haina sü sheeyu buh hinou toua bailai, daiolouzü haisü sheesho-e.

⁷Mah vei posheela ae paokha peiyu vei posheela haina ahai hinou tare zhai ali bue: süolouzü posheela peikhai touyu soutao hai naanou soupeiyu napao vei-e.

⁸Meidei-a posheela peiyu hi souheetao hai napao vei-e.

⁹Thoudzü vei posheela peiyu hi chuh hinou khaokhai touyu raokhao, moa lee hinou khokhai touyu moa lee hinou sakhai touyu teitei hai naanou soua Ramai hi posheela peiyu hai napao naveie.

¹⁰Ana kho moa posheela peikhai touyutao, süsü theadzü thouhrü khaitouyuma moa thoumoyu teitei hai Aaron tyaosholea hinou hrüveyu napao mai hrülai nou raibütoua zha zhilai.

¹¹Chavei lathao-a buloure donou posheela soua MAPAO hi peire zhaitao sü haibülai.

¹²Mai talinou posheela haina hai kalo vei posheela soua Ramai hi peilai toulouzü, puhnou posheela peire hrikhaona naye koa nou kheih thoumoyu raokhao nou peilai: raokhao süsü oliv theadzü nou thouhrüloua soulai, moyuma raokhaoki hai soupheloua theadzü nou thouhrüloua posheela hai peilai.

¹³Süpei hinou posheela haina hai kheih thoua soukhai touyu raokhao noupu pove peilai.

¹⁴Puhnou raokhao tyachekhei poloua MAPAO hi soukha peiyu vei posheela soua peilai; haitao hai souzhe poa posheelabu hi lazü peia naanou soupeiyu napao vei-e.

¹⁵Posheela soua datha khaitouyu soutao hai süzhou nou toukhai touloulai, süsü panou thainesho koute hai bukoulai moe.

¹⁶Mai talinou chavei lathao loure vei posheela hai chaachou soukhai toua posheela peilouzü, moyuma puhnou peinüa pei bailouzü, soutao hai posheela peiyu zhou hai toukhai lai moe, ana thainesho-a toulai.

¹⁷Anou soutao hai touhao loumoa thaine-a bukou louzü, sütao hai mei deiwulai.

¹⁸Hakinou sou hai teithe asü zhou-a toure toulouzü, puhnou posheela peiyu nasü Ramai nou polai moe. Posheela peiyu nasü sheemore tea polai, ae toulouyu maitao sü veahoyu hai daolai.

¹⁹Posheela khaitouyu sou hai shee moyu na taralia dei louzü, süsü toulai moe, ana mei deiwulai. Mai taralia naanou hinou shee-a buyu mai sü sou hai toua bailai,

²⁰ana naanou hinou sheemoa buyu mai talinou sou sü toure toulouzü, puhye sü panou Ramai vei maitao hi bupulai moe.

²¹Mai taralina sheemoyu na taralia dei-a nou posheela khaitouyu sou hai touloure toulouzü puhye sü Ramai vei mai soua panou phouthou pulai moe.

²²MAPAO nou Moses hi paoe,

²³“Israel mai hi paopeio, süolouzü mai talinoua posheela peikhai touyu southa hai toulai moe.

²⁴Lah thaiyu, moyuma soukhaona nou southa khaitouyu (chüsou) vei southeatao hai neletao nou poa vah kukhe louzü soua bailai, ana toulai moe.

²⁵Mai taralinoua MAPAO hi thoudzü vei soua posheela khaitouyu southea hai toure toulouzü, puhye sü Ramai vei mai soua populai moe.

²⁶Buh tarali hinou hrüa buyuma Israel mai nou raohou zhe moyuma souzhe hai touso soua toukhai toulai moe.

²⁷Mai taralinoua chikha haina hai pfüthoyu maiye sü Ramai vei mai soua populai moe.”

²⁸MAPAO nou Moses hi Israel mainou posheela peiyu phaki, zhai haibüa soupfülo tea nou peie. Mai talinou MAPAO hi chavei lathao loure vei posheela pove peiyu phaki, soukha peiyu vei posheela noupu MAPAO hi pove peilai.

³⁰Thoudzü vei posheela peiyu na hai puh bah hinou puh lah pove peilai. Puhnou southeatao hai khaorao nou koa MAPAO hi soukha peiyu vei sapeina soua pove peilai

³¹Napao nou southeatao hai posheelabu hinou meidei peilai, ana khaorao hai napao maitao vei souloulai.

³²Sou phikao zhoulova hai soukha peiyu vei posheela soua souzhe ae southeatao hai chavei lathao loure donou posheela peiyu napao hisü pove peilai.

³⁴Israel mainou napao maitao hisü khaorao ae phikao zhoulova hai MAPAO hi soukha peiyu vei posheela soua peilai. Vere teile veishi hia Israel mainou haina hai napao maitao hisü peikou telai.

³⁵Haina hai Israel mainou MAPAO hi thoudzü vei posheela peiyu soua Aaron ae puhvei nahpoutu maitao nou napao soure donou kupaloua theadzü napeiyu teithe hinou puletao vei zha soulai.

³⁶Puletaoye theadzü napeiyu teithe hinou MAPAO nou Israel maiye haina hai peio tea kharochi peiwure, ae haisü Israel mainou vere teile veishi hia chikha hainasü züa soukou telai.

³⁷Haitao hai meideia posheelayu, thoudzü vei posheelayu, mah vei posheela peiyu, paokha peiyu vei posheelayu, theadzü napei-a pokupa peiyu vei posheela peiyu, alia chavei lathao loure donou posheela peiyu zhaitao sü haibüa soulai.

³⁸Chikha haitao hai MAPAO nou Moses hi Sinai Deichi hinou Israel maiye posheela peio tea paopeiyu teithe hinou peie.