Read Poumei Naga LEVIMAI LARÜBVÜ 9 Bible Online

LEVIMAI LARÜBVÜ 9 - Poumei Naga bible

LEVIMAI LARÜBVÜ 9

¹Teithe acha zhousü Moses nou Aaron ae puh nahpoutu maitao alia Israel maivei süthai-apei maitaoye kuve jüloure.

²Puhnou Aaron hi paoe, “Chaa hayu chode ali ae nghitu ali hai MAPAO hi mah vei posheela ae meidei-a posheela peiyu soure donou pove peio.

³Süthaisü Israel mai hi nghitsü ali hai puletao vei mah vei posheela peire donou, po ali payu chotoutu ali, meidei-a posheelare donou chaa hayu zhaotu ali,

⁴ae chavei lathao-a hrüloure vei posheela soure donou chode ali ae zhaotu ali hai pove peio. Puletao nou sütao hai thoudzü vei posheela peiyu koa theadzü thouhrüloua MAPAO hi posheela peilai. Neletao nou hai sü soulai, daiolouzü MAPAO nou zhou teithe hai neletao hi tave zhu ngaopeilai.”

⁵Moses nou kharochi peikhai touyu büa puletao nou sütao teitei hai Sahpao kijü hi pove khaipeiwure, ae mai hrülai nou MAPAO ye thore donou tave jüloure.

⁶Moses nou paoe, “MAPAO nou buyu vei ava nasü neletaoye panou ngaoloure donou Puhnou kharochi haitao sü soulo tea peikhai toue.”

⁷Süthaisü puhnou Aaron hi paoe, “Posheelabu hisü talouloua mah vei posheela peiyu ae meidei-a posheela peiyu nasü ne vei mahtao ae maikhe maivei mah khesü pota loure donou posheela peio. MAPAO nou kharochi peikhai touyu thaifüa posheela hai nasü maikhe maivei mah panou potare donou posheela peio.”

⁸Aaron nou posheelabu hisü louloua lah puhvei mahmo donou posheela peire chode nasü datha loure.

⁹Puhvei nahpoutu maitao nou souzhe sü puh hi pokou peie, ae puhnou souzhe sü puh bah nou süloua posheelabu kainghou hisü napeie, ae zhe kukhetao hai posheelabu phi hi lazü peie.

¹⁰Süthaisü MAPAO nou Moses hi kharochi peikhai touyu thaifüa puhnou southeatao, chithou ae sousü veikayu taosü posheelabu hinou meidei peie.

¹¹Ana puhnou sou kukhetao ae souhee hai puletao vei fühao vakou hi popaloua meidei peie.

¹²Lah puhvei soua meidei-a posheela peire kikhaorü nasü puhnou datha loure, ae puh nahpoutu maitao nou souzhe sü puh hi pokou peie, ae puhnou souzhe sütao hai posheelabu kainghou veishi hisü lazü peie.

¹³Puletao nou puh hisü pei ae sou kukhetao hai pokou peie, ae puhnou sütao hai posheelabu hinou meidei peie.

¹⁴Süthaisü puhnou lesoutao ae souphi ahai sü dzüthea loua meidei-a posheela peiyu phao hi khailoua meidei-a posheela peie.

¹⁵Süthainou, Aaron nou maikhe maivei posheela peiyu khesü posheela peie. Puhnou maikhe maivei mah donou posheela peiyu nghitu nasü poloua datha loure, ae lah puhvei mah donou posheela peiyu büa sünasü posheela peie.

¹⁶Meidei-a posheela soure kikhaorü nasü puhnou pokouloua posheela peiyu zhai thaifüa puhnou posheela peie.

¹⁷Puhnou thoudzü vei posheela peiyu nasüa poukou loure, ae puhnou sou bahzü ali hai poloua posheelabu hinou meidei peie. (Teithechü meidei-a posheela peiyu pei hinou hainasü posheela peie.)

¹⁸Puhnou chavei lathao-a hrüloure vei posheela hai maikhe maiye donou chode ali ae zhaotu ali hai datha loure. Puh vei nahpoutu maitao nou souzhe hai puh hi pokou peie, ae puhnou souzhe hai posheelabu kainghou teitei hisü lazü peie.

¹⁹Aaron nou chode vei ae zhaotu vei southeatao hai

²⁰sou khaorao phaova sü khailoua puhnou posheelabu hinou pokou meidei peie,

²¹ae MAPAO nou Moses hi kharochi peikhai touyu thaifüa soukhaorao ae phi zhoulova hai napao maitao vei zha soua MAPAO hi posheela peie.

²²Aaron nou posheela peiyu khesü souche louyu thai, puhnou maikhe mai pei hi bah laloua puletaoye sü shiha peia puhsü takou tare.

²³Moses ae Aaron puhai nou MAPAO nou buyu Sahpao hisü takou tare, ae puhai nou kijü tapayu phaki, puhai nou maikhe maiye ha peie, ae MAPAO vei ava nasü mai hrülai hi ngaopeie.

²⁴Süteile bü hinou MAPAO nou mei seikou posheelabu hinou meidei-a posheela peikhai touyu ae southeatao sü meitaoh peie. Maikhe mainou haina sü ngaolou khaie, puletao nou shusoua raore, ae deiphi nakou khurüa ratho-e.