Read Poumei Naga JEREMIAH 11 Bible Online

JEREMIAH 11 - Poumei Naga bible

JEREMIAH 11

¹MAPAO nou ahi paoe,

²“Chaachou soua vo soukhai touyu chipaotao sü keilo. Judah alia Jerusalem maitao hi paopeio,

³süolouzü Israel maivei Ramai MAPAO Enou vo soukhai touyu chipao khesü zümoa pfüthoyu mai hrülai pei hisü chaa khaipeiwure.

⁴Vo hai nasü Enou puletao vei puopao maitaoye koa Ejipt teidei, puletaoye donou soushoyu thaobvü ali büa buyu teidei hinou sapa peiyu teile hinou soukhaiwure. Enou puletao hisü achi zülo ae Enou kharochi peiyu teitei sü soulo tea paopeire. Enou puletao hisü paopeire, süolouzü puletao nou achi zü louzü puletao hai avei mai soulai ae Enou puletao vei Ramai sü soulai.

⁵Süthaisü Enou puletao puopao maitao hi zhou neletao nou buyu teidei, chonaodzü ae laivoudzü nou küa buyu nasü peilai tea paokhai touyu nasü souvete peilai.” Süthaisü Enou chila peie, “MAPAOwo, süsü cheche-e.”

⁶MAPAO nou Ahi paoe, “Vo soukhai touyu chipaotao sü Judah vei nuhdutao hi alia Jerusalem vei maisou ludutao hisü taho paosü peio, ae maikhe maitao hisü chipao sütao hai keilo alia zülo tea paopeio.

⁷Neletao vei puopao maitaoye Ejipt hinou sa-a palou nou zhou koute Enou puletao hi Achi soutaosou zülo tea paopi peie.

⁸Ana puletao nou achi zü bare ae keipei bare. Süna soure thaosü, mai hrülai nou le khousho loua vah ashi sü raichoki jünoua soupfüpure. Vo soukhai touyu nasü zülo tea Enou puletao hi kharochi peie, ana puletao nou pfüthowure. Südonou sühinou paokhai touyu chaatao sü Enou puletao vei pei hi pfüve peie.”

⁹Süthaisü MAPAO nou ahi paoe, “Judah alia Jerusalem hi maitao nou Eye dure.

¹⁰Puletao nou achi züba-a puletao puopao maitao vei mah hi dakhai loutare ae rah kukheye thotare. Enou Israel ae Judah maitaoye koa vo soukhai touyu nasü puletao nou pfüphewure.

¹¹Südonou chuo MAPAO Enou puletao pei hi hashi pfüve peilai, ae sühisü puletao nou turei palou laimoe. Puletao nou shusoua Eye la-a soukha khoyuma, Enou kei peilai moe.

¹²Süthaisü Judah alia Jerusalem maitao sü puletao nou posheela peia buyu rah kukhe hinou taho kra-a soukha sü kholai, anou rah sütao nou puletao hi kaozhou ashi veyu phaki, puletaoye khailupa peilou hoe.

¹³Oh Judah hi maitaore, neletao vei rahtao hai neletao vei nuh buyu zhou bure, ae neletao nou ngaorayu Baal rahye posheela-a thore posheelabu hai Jerusalem hi ludu zhou-a bure.

¹⁴Jeremiah, mai haitao donou ahi veachi paoso, moa puletao thaosou-a ahi halia khoso. Puletao nou veahoyu vedao-a ahinou soukha khoyu teile hisü, Enou kei peilai moe.”

¹⁵MAPAO nou paoe, “Enou leshiyu maitao nou hashi sü sou-a bubaire. Puletao nou avei Rathoki hi veyu sü dai zü bue? Chaachou sou-a soukhaona nou meidei-a posheela peiyu sünou puletao hi ashi vedaore nasü nulou süe tea puletao nou tsüchowu? Süthaisü neletao nou sa-a bulou süvu?

¹⁶Vuli hi Enou puletaoye oliv süübe aveih, veisho-a rashithou phou-a buyuna tea kupeie, ana chuo, Enou chishoa teisüyu büa süübe sünasü meinou deiwulai, ae botaosü daodewulai.

¹⁷“Akukulai MAPAO Enou Israel ae Judah sü shothou peie; ana chuo Enou puletao pei hi hashi pove peilai. Veahoyu sü lah puletao hi pfüveloua baie, daiolouzü puletao nou kaomoyu vah sü soupfüre; Baal rahye poukai nüveiyu meidei-a posheela peiyu donou alekha sü soupawure.”

¹⁸Ngaoba maitao nou Eye soushire donou shodo ashi souyu sü MAPAO nou ahi paongao peie.

¹⁹Eye sü southalai tea sa-a tayu nashayu zhaotu ali büre. Puletao nou apei hi shodo ashi sou-a buyu nasü Enou sülou moe. Puletao nou haibüa paoe, “Rashibe nasü rashithou noupu vikhao laikhe; Etao nou puhye sü southawua panou mailia puhvei zhih sü lichopu khailai mokhe.”

²⁰Süthaisü Enou veachi paoe, “Akukulai MAPAOwo, ne hai acheche hinou chiku-apeio nasüe; nenou maivei tsüle kabüa busa touyu zhuwe. Enou ne bah hi avei zü nasü thaothouwure, nenou puletao pei hi khüngu phouyu sü Enou zhua bulai.”

²¹Anathoth hi maitao nou Eye southayu sü jüpawe, ae Enou MAPAO vei chipao hai paopu louzü Eye southawulai tea paowe.

²²Südonou Khoukhoulai MAPAO nou haibüa paoe, “Enou puletaoye tudee-a souvea peilai. Puletao vei nahle maitao sü panou soureih souyu hinou thailai; puletao vei nahmaitu khesü panou tokaayu hinou khüa thailai.

²³Enou Anathoth mai pei hi veahoyu pove peire teile sü dade khaiwure, ae teile sükisü puletao mai ali koutea shokhai peilai moe.”