Read Poumei Naga JEREMIAH 12 Bible Online

JEREMIAH 12 - Poumei Naga bible

JEREMIAH 12

¹“Oh MAPAOwo, Enou ne hi chi paoyu phaki, nenou cheche loua baiwe. Ana Enou ne hi kaozü vanou chi paolai. Daivanou mai ashi mainou vasapalou-a duso louge? Daidonou tsüle sheemoyu mainou veilouwe?

²Nenou puletaoye shopeie, ae puletao nou maa tsülou loure; Puletao nou vipaloua rashithou shiloure. Puletao nou teisa sü neye paovei peiwe, Anou puletao tsüle louzü ne hinou dousho-a bue.

³Ana MAPAOwo, nenou Eye süwe, Enou soupfüyu vah khesü nenou ngaowe, ae Enou neye leshiyu sü nenou süwe. Zhaotu aliye pailoua dathare buh hi salouyu büa puletaoye soupeio; puletaoye datha laiyu teile koumo koute puletaoye kholo.

⁴Etao vei teidei hai teile kazhou koute kirü tea bulai, ae pounghoutao kazhou koute ki-vüa bukou laige? Etao vei maitao nou maishiyu donou soukhaona ae raohou khesü hatare, daiolouzü puletao nou haibüa paoe, ‘Etao nou soupfüa buyu hai Ramai nou ngaomoe.’ ”

⁵MAPAO nou paoe, “Jeremiah, nenou maiye tuvayu koutea veayu thaisü kabüa rheiye tuvalou khailaige? Nenou teidei aveih hinou lalouho louzü, kabüa Jordan vaohro hisü nenou talou khailaige?

⁶Ne thaihou jüraimaitao, nevei kihikhamai koute nou ne hi shodo ashi soulouzü; puletao nou neye duyu maitaoye koa neye dure ae paoshia laire. Puletao nou ne hi chi la aveih nou keayuma puletaoye loucheso.”

⁷MAPAO nou paoe, “Enou Israel maiye thaowure; Enou avei tyahrü soure donou dopakhai touyu nasü malaiwure. Enou leshi peiyu maitaoye sü ngaoba maitao bah hi peiwure.

⁸Enou dopakhai touyu avei maitao sü Eye dutare; Vaohro hinou ra-a laiyu khaosouveo ali büa puletao nou ahi ravewe. Südonou Enou puletaoye ngaorae.

⁹Enou dopakhai touyu maitao sü raohou ali büa puletaoye sü lüche nou nütoure donou ngousühao loure. Rekhaona khesü kuloua panou khonüh nüyu hisü tave loulo!

¹⁰Vakou teidei khomai alao nou avei darkha toupei sü soushiwure; puletao nou avei dou sü taika chichiwure; puletao nou veishoa buyu avei teidei sü radeiki soupeire.

¹¹Puletao nou haisü hihro vaohro soulaiwure; anghoujü hinou haitaosü soushi peire. Teidei teitei sü mainou bulou shiyu radeiki soupeire, ae mai linoua lenou peimore.

¹²Radeiki thailo teidei kuyu hinou hrüyu maitao nou souhare donou tave loure. Teidei veishi panou souhare donou soureih sü Enou seive peie; mailia panou kaonayu sü ngaolai moe.

¹³Avei maitao nou thoutai aveih vuthoue, ana shu chachilou baire; puletao nou vah veasho-a nou souwe, ana haliro ngaolou more. Daiolouzü Enou rarou shoyu donou puletao nou halia chachilou moe.”

¹⁴MAPAO nou paoe, “Avei Israel maiye donou peikhai touyu teidei soushi peiyu kinapa maitao hisü Enou chi paongaolai. Enou teidei sütao hinou mai ashi maitaoye sü süümaa paila laiyu büa pailawulai, ae Enou Judah maiye sü puletao hinou vupa peilai.

¹⁵Ana Enou puletaoye polaiyu thaisü, Enou puletaoye zhuvea leshi peilai; Enou tyahrü ali linou lahkuku vei teidei hi save peilai.

¹⁶Hakinou puletao mai hrülai nou avei maitao nou hrüa tayu ludu nasü phoua ta louzü, ae Baal zhih hinou chaachou soulo tea doupeia buyuma azhih hinou haibüa ‘MAPAO sü hriyu thaifüa,’ tea chaachou soulouzü— puletaoye sü Avei mai hrohinou soudu sousopa peilai.

¹⁷Anou tyahrü taralinoua keipei molouzü, Enou maa noupu lapa loua souhawulai. Haisü MAPAO Enou paopawe.”