Read Poumei Naga JEREMIAH 13 Bible Online

JEREMIAH 13 - Poumei Naga bible

JEREMIAH 13

¹MAPAO nou ahi haibüa paoe, “Ne taho khyakho sah deizüzüyu ali hülo, ae sünanou ne khya hi kholo, ana sünasü dzü hi pülouso.”

²Südonou MAPAO vei chipao thaifüa Enou hrüloue ae kholoue.

³Süthaisü MAPAO nou ahi dakhai haibüa paopue,

⁴“Nenou hülouyu khyakho nasü poloua Euphratis Rei hi taho lyaqulu ali hi pokukhaio.”

⁵Südonou MAPAO nou paoyu büa Enou taho Euphratis Reipe hi poku khaiwure.

⁶Teithe daoli thaisü MAPAO nou Euphratis hi poku khaitiyu khyakho nasü polou tea ahi paoe.

⁷Südonou Enou taho kukhai touyu buh hinou poloue. Enou zhuyu phaki, khyakho nasü shitare, poa vah ali-a soulou shire.

⁸Süthaisü MAPAO nou ahi haibüa paoe,

⁹“Enou hai zhai büa Judah maivei khaophu ae Jerusalem nou khaosou shoyu sü souha peiwulai.

¹⁰Maishiyu haitao nou achi sü zübae. Puletao hai rochi shoe ae raichoki bütoua mai shi-e, alia rah kukheye tho tare ae puletao vei kuvah soutare. Südonou puletao shitayu, poa havei lia soulou shiyu khyakho büa bailai.

¹¹Daiolouzü khyakho alinou mai ali khya hinou taotei tea buyu büa Enou Israel mai ae Judah maiye panou ahinou taotei-a buyu sü sounüe. Enou puletaoye panou avei mai sou-a ae Eye paoshoyu alia azhih souvei peishulai tae nou choue, ana puletao nou achi zübare.”

¹²Israel maivei Ramai MAPAO nou ahi haibüa paoe, “Jeremiah, Israel maitao hisü puletao vei darkha zhaoh leekhou teitei hisü darkha zhaoh thoupoulo tea paopeio. Puletao nou ne hi zhaoh leekhou teitei hisü zhaoh nou lithou phouyu kao-e touyu Etao-a süwe tea chila peilai.

¹³Süthaisü nenou puletao hi MAPAO nou teidei hai hi maitao — David vei tyaosholea hinou veyu vemaitao, napao maitao, rachipaola maitao alia Jerusalem hinou hrüyu mai hrülaiye zhaoh shozhimo koute zhaoh sü peilai tea puletao hi paopeio.

¹⁴Süthaisü Enou puletaoye leekhao poloua daphe peiyu büa puletaoye taidu ae tsü-le sümoa daphe daphosasa peilai. Enou puletaoye southayu phaki, zhuvea leshi peiyu halinoua Eye khuloulai moe.”

¹⁵Keinoulo, khaophu souso, daiolouzü MAPAO nou paoe.

¹⁶Ramai nou azhi pfüvemo jünou ae deichi hinou neletao phi süloumo jünou; neletao nou vuzhi-a buyu ava nasü puhnou zhitei hi soudathou peimo jünou neletao vei Ramai MAPAO ye tsükhoulo.

¹⁷Hakinou neletao nou keipei molouzü, neletao vei khaophu vanou kheikhei soua Enou kralai; Enou kradu kra-a anghidzü koulai, daiolouzü MAPAO vei maitao sü hukhamai sou-a nüpoa tare.

¹⁸MAPAO nou ahi paoe, “Veo ae puhvei pfüye sü vebuh hinou taokoulo tea paopeio, daiolouzü hüveiyu puletao vei vepeirü sü puletao pei hinou deiphi dekoure.

¹⁹Judah vei teidei khekou buyu nuhdu khesü mainou poloure, mai linou-a puletao hisü taloulou hore. Judah mai hrülaiye sü hukhamai soua nüpoa takhaire.”

²⁰Jerusalem haisü zhukhaio! Neletaoye ngaobayu maitao sü reikou nou laire! Neletao hi peikhai touyu zhaokhome sü daiki vetare? Neletao nou khaophu soua buyu neletao vei maitao sü kalova vetare?

²¹Neletao vei samai baie tea neletao nou tsücho-a buyu maitao nou neletao pei hi reih sou-a veilou-a neletaoye tukhasa-a hrülouzü neletao dai chi paolaige? Naotu mainou nah nayuki veashoyu büa neletao veasholai mowu?

²²Neletao nou haisü daidonou vepare tea noulouzü, ae daivanou neletao vei sabanü paipha peiwe ae mainou nüloua sazü sabu peiwe tea noulouzü — haisü neletao nou ngaopi shoyu mahmo souyu donoue.

²³Ethiopia mai alinou puh vasou teiyu sü soudalou süwu, moa shirakhao nou puh chah souda lousüwu? Süku lousüe toulouzü, neletao hashi khaikho soua buyu mainou havei sü souloulai.

²⁴MAPAO nou neletaoye radeiki hinou teikhai hüveyu sünou thouba hüpoa tayu büa soupho raroulai peiwulai.

²⁵Neletaoye donou souda khaitouyu zha sü haibülai tea MAPAO nou paoe, daiolouzü neletao nou puhye ngaiwure, ae cheche moyu rahtaoye louche tare.

²⁶MAPAO nou neletao vei sabanü sü laopa laipeilai ae neletaoye panou hrao ngaolai.

²⁷Puhnou ngaorayu vah haso khesü neletao nou souyu puhnou ngaoloure. Neletao nou deichi vanou ae deikho kinou khakhayu mai ali büa moa reshiyu rhei ali büa cheche moyu rahtaoye thaihua laiyu sü puhnou ngaoloure. Jerusalem hi maitaore, neletao hai daizhou koute vealaisa! ngaopeisa! Neletaoye sousheeyu hai teile kasho loulaige?