Read Poumei Naga JEREMIAH 16 Bible Online

JEREMIAH 16 - Poumei Naga bible

JEREMIAH 16

¹MAPAO nou ahi haibüa ve paopue,

²“Haibüyu buh hisü neye panou kilo soulai moe, nahmai pa hülai moe.

³Buh hai hinou nah nalouyu maitao vanou ae puletaoye napeiyu pfüpuo maitao vanou dai vepalai touyu Enou ne hi paongao peilai.

⁴Puletao hai sounou ashi souloua thai bailai, puletaoye donou mai linoua dopfü peilai moe, moa daovu peilai moe. Puletao vei thaiphao khesü dei hi nghoushi büa bubailai. Puletao sü khoche mü hinou moyuma tokaa vanou thai-a bailai, ae puletao vei thaiphao sü raohou ae rekhaonatao vei touso soua bailai.

⁵“Kra nou dopfüa buyu ki hisü ne talouso. Mai tarali donoua ne dopfüso. Daiolouzü Enou avei maitaoye sü kaonayu vei shiha peipu khailai more, moa puletaoye sü zhuvea leshiyu sü ngaopulai more.

⁶Teidei hai hisü toungiyu mai ae touhayu mai-a thailai, ana puletaoye mailinoua povu peilai moe, ae mai linoua puletaoye donou kra-a dopfüyu vei shee soua zhimü soupalai moe, moyuma pei hopfülai moe.

⁷Mai talinou thaiyu donou tea le souva peire donou koa touso zholai moe, moa pfüpuo thaiyu vanou le souva peilai tea mailinoua zhuvea peilai moe.

⁸“Khonüh nüa vasho nou buyu mai ki hisü ne talou puletaoye koa touso touzhoso.

⁹Daiolouzü Israel maivei Khoukhoulai Ramai MAPAO Enou paoyu sü keilo. Zhukhaio, Enou asah soua buyu paikho ae shanghi vei vasho-a khonüh nüyu kho khesü panou choupulai moe. Haibüa vepayu khesü sühinou hrüyu maitao nou ngaolai.

¹⁰“Nenou puletao hi chipao haitao paoyu phaki, puletao nou ne hi haibüa noulai, ‘Daisouyu donou MAPAO nou Etao pei hi tudee dushoyu hai peilai touwe? Etao nou dai mah souge, ae Etao nou Etao vei Ramai MAPAO pei hi daimah souwure?’

¹¹Süthaisü nenou puletao hi MAPAO nou haibüa paowe tea paopeio, ‘Neletao vei puopao mainou Eye thaowure, ae rah kukhe thaifü tare ae puletao vei kuvah soutare. Puletao nou Eye malaiwure ae achi zümore.

¹²Ana neletao vei puopao maitao jünou neletao hai shipure, daiolouzü neletao mai hrülai nou rochih sholoua achi zübare, ae hashi tsüchoyu thaifüa vah sü soutare.

¹³Südonou Enou neletaoye teidei hai hinou neletao nou ae neletao vei puopao mainou sükhai timoyu buh hi huho khaiwulai, alia sühinou neletao nou rah kukhe taoye hea-khei sümoa puletao vei kuvah sü soulai. Enou neletaoye zhuvea peilai moe.’ ”

¹⁴MAPAO nou paoe, “Israel maiye Ejipt teidei hinou sapa peiyu, hriyu Ramai MAPAO azhih poa chaachou soupulai moyu teile sü velaire.

¹⁵Süna thaosü, Enou soupho rarou khaitouyu hinou, puletao nou Israel maiye reikou teideitao hinou ae tyadei kukhetao hinou puletaoye save peiyupu, hriyu Ramai MAPAO zhih hinou chaachou soulai. Daiolouzü Enou puletaoye puletao vei puopao maitao hi peikhai touyu puletao vei teidei hisü save peilai. Haisü MAPAO Enou paowe.”

¹⁶MAPAO nou paoe, “Zhukhaio, Enou kha phoumai alao seive puletaoye panou nüloulai. Süthaisü Enou sou huyu mai alao seive peilai, ae puletao nou puletaoye deichi teitei hinou ae lyaqulu veishi hinou hupoa talai.

¹⁷Puletao nou soupfüyu vah teitei sü Enou ngaowe, puletao nou ahinou tutsülou hoe; puletao vei mah sü anghingao hinou pokulou hoe.

¹⁸Puletao nou mah soukhai touyu ae vah ashi souyu paotao sü zha ahai panou khalai, daiolouzü puletao nou avei teidei sü thaiphao büa buyu basharatao ae cheche moyu rahtao nou pove souzhai peiwure.”

¹⁹MAPAOwo, Eye vupa peiyu ae khouko peiyu sü ne baie; nenou Eye veahoyu teile hi soukha peie. Teidei akhai hinou buyu tyahrütao nou ne hi tave haibüa paolai, “Eh puopao mainou cheche moyu rahtao ae komoyu basharatao sü tho baie.

²⁰Mainou lah puletao vei ramai sü soulou süwu? Moe, hakinou soulouyuma, puletao hai ramai moe.”

²¹MAPAO nou paoe, “Südonou, zhukhaio, Enou akhai sü soua tyahrütao hisü avei khouko ae pfüchi hai popa ngaopeilai; alia puletao nou E hai MAPAO cheche-e touyu sü puletaoye panou süloulai.”