Read Poumei Naga JEREMIAH 17 Bible Online

JEREMIAH 17 - Poumei Naga bible

JEREMIAH 17

¹MAPAO nou paoe, “Judah hi maitaore, neletao mah sü hu vei rüsüü nou rükhaitoue; haisü neletao vei lethou pei hi chuh mutei diamond nou larücha daopei khaitoue, ae neletao vei posheelabutao hisü rükhai peiwure.

²Neletao vei maitao nou daiyu süübe phi ae deichi kuyu kinou posheelabu khesü souloua ratho tare ae Ashera rapfüpai zhurai souloua thotare,

³ae deichi kuyutao ae nuh kijü hia sübüa soua laire. Neletao teidei teitei hisü neletao vei mah vanou neletao vei kini ae thoudzü veishi sü pa ngaobayu maitaoye nou saopoa talai.

⁴Neletao mah donou Enou neletao hi peikhai touyu teidei sü neletao nou thaowua bailai, ae Enou neletaoye panou neletao nou sümoyu teidei hinou ngaobayu maitao vei kuvah soutalai, daiolouzü avei lekha rarou sü mei büloure, ae haisü teisa nou tao-a bubailai.”

⁵MAPAO nou haibüa paoe, “Thai-a bailaiyu maivei khouko hi ae deiphao maiye loucheloua Ahinou tarei tayu maikhe maiye Enou chaa peiwulai.

⁶Puletao hai radeiki hi poube ali büa bailai, haveih liro puh hinou velai moe. deithe hinou buyu poube ali büa puh hisü veiyu halia vepalai moe.

⁷“Ana Eye loucheyu maiye sü Enou hra peilai.

⁸Puletao hai reipe hinou shokhai touyu süübe ali büa puhvei beimaa sü dzü hi tsülou loure. Puletao nou teinai souyuma piyu hae, daiolouzü puletao vei nghou sü dai-a bue; puletao nou teirü moa teikoyuma piyu hae; tobai soumoa rashithou shipeiwe.

⁹“Thaonou mai ali vei tsüle hai süloulai? Hai nasü veishi jünou shikayu nasüe; hai nasü souvei loure hai tatei shore.

¹⁰MAPAO Enou deiphao maivei tsüle sü kabüa busa tea nou phou-a zhuwe. Enou mai ali liye puhnou soupfüyu ae puhvei vah thaifüa ngaozü nasü peie.”

¹¹Kaozü moyu hinou kini ngaolouyu maitao hai raohou alinou dzü dzükhai toua toutu komoyu bütoua baie. Puhnou vasho-a buyu teile hinou puhvei nangi khesü hata-a bailai, ae akhai hisü vomai ali büa puhsü halia bulai moe.

¹²Veishoyu vebuh ali büa Etao vei Rathoki hai shurai nou kushoyu deichi pei hinou bue.

¹³Oh MAPAOwo, Israel maitao vei areih nasü ne baie; neye thaowua tayu mai hrülai hai hraongu ngaolai. Puletao vei zhih sü vonai phaohi rükhai touyu büa ngaomota bailai, daiolouzü puletao hri-a buyu dzüla, MAPAO neye thaowure.

¹⁴Oh MAPAOwo, Eye souvei peio, sükulouzü Esü veiloua bailai. Eye vupa peio, sükulouzü Esü kaozhou vei-a bailai. Daiolouzü Enou paoshoyu nasü ne baie.

¹⁵Maikhe maitao nou ahi haibüa paoe, “MAPAO nou Etao pei hi paopiyu taosü daiki bue? Sütao sü puhye panou chunou pove peikhaio!”

¹⁶Ana MAPAOwo, puletao pei hi hashi vepeio tea Enou ne hinou khomoe; moa tateiyu teithe sü puletao hi veyu Enou jüpa moe. MAPAOwo, nenou haisü süwe, Enou paokhai touyu chipao khesü nenou süwe.

¹⁷Eye donou pihiyu sü soupeiso, teile ashi veyu phaki, ne hai Enou baichao loure buh-e.

¹⁸Eye souveayu maitao hisü hraongu pove peio, ana MAPAOwo, Eye pa haongu daoso. Puletao hi peishiyu sü pove peio, anou Eye panou ngaopiyu ngaoso. Veahoyu sü puletao hi pove peio ae puletaoye souha peio.

¹⁹MAPAO nou ahi haibüa paoe, “Jeremiah, taho Maikhe maivei Robomü, Judah hi veomaitao nou tapa talouyu robomü hinou avei chipao sü shapao peio; süthaisü Jerusalem vei robomü kukhetao hia taho paopeio.

²⁰Judah hi vemaitaore, Judah hi mai hrülai, alia Jerusalem robomü hinou tapa talou-a buyu mai hrülai MAPAO nou paoyu chipao sü keilo.

²¹Haibüa puletao hi paopeio, süolouzü puletao nou lah vei hrüye leshia bulouzü, Soteithe zhou halia pfü talai moe; puletao nou Jerusalem robomü hi halia pfü loulai moe,

²²moa Soteithe zhou puletao vei ki hinou halia pfütapa laimoe. Enou puletao vei puopao maitao hi kharochi peikhai touyu thaifüa Soteithe zhou neletao vahlia soulai moe, sheeyu teithe ali sou reilai.

²³Enou paoyu chi sü puletao vei puopao maitao nou keipei moe. Süna thaosü, puletao nou rochi sholoure; puletao nou achi sü zübare ae ahinou doulou bare.

²⁴“Mai haitao hisü Enou kharochi peikhai touyu teitei hai zülo tea paopeio. Puletao nou Soteithe zhou sü hanalia nuhdu vei robomü hi pfülou laimoe. Puletao nou Soteithe zhou hai sheeyu teithe ali soua reilai ae vah lia soulai moe.

²⁵Sükulouzü puletao vei vemaitao ae veo nahpoutu taonou Jerusalem vei robomütao hinou taloulou-a David veo büa khouko sü pfülai. Jerusalem ae Judah hi maitao-a puletao nou rheiluki ae rhei sü pfüa talai, alia teisa nou nuhdu hisü mainou hrüphou-a nou bukou telai.

²⁶Judah vei nuhdu kukhetao hinou alia Jerusalem pehao hinou hrüyu maitao nou nuhdu sühisü velou bulai; Benjamin teidei hi mai, deikho deichi ae Judah khekou hi maitao-a tave loulai. Puletao nou avei Rathoki hisü meideia posheelayu natao, poukai nüveiyu na, thoudzü vei posheela ae kalo vei posheela khesü pove peilai.

²⁷Ana puletao nou achi sü zülai, ae Soteithe sü sheeyu teithe soua reilai. Puletao nou Jerusalem vei robomütao hinou süzhou hai hanalia pfülou moa pfüpa laimoe. Hakinou Enou paoyu zümoa puletao nou soupfü louzü Enou Jerusalem vei robomü khesü mei deiwulai. Mei nou Jerusalem vei vebuh-a deilaiwulai ae mai linoua mei sü sounghi loulai moe.”