Read Poumei Naga JEREMIAH 20 Bible Online

JEREMIAH 20 - Poumei Naga bible

JEREMIAH 20

¹Rathoki hi peikhowo Immer nahpoutu napao Pashhur nou MAPAO vei chipao Enou paoyu choulouyu phaki,

²puhnou Eye dapeiwu-a hurai nou phuloua Rathoki vei Benjamin Robomü reilova hi popa khaio tea kharochi peie.

³Thainesho shona, Pashhur nou Eye phukhai touyu hinou phapeiyu thaisü, Enou puh hi paoe, “MAPAO nou ne zhih hai Pashhur tea sapei moe, ana ‘Buh teitei hi Pirayuna’ tea sapei khaitoue.

⁴Daiolouzü MAPAO nou haibüa paoe, ‘Zhukhaio, Enou neye panou lah neye ngaopiyu alia nevei sakhe maitaoye ngaopiyu soupeilai. Nevei nghingao hinou puletaoye panou ngaoba maivei khoche hinou kaotalai, ae Enou Judah maitao hai Babilon veo bah hi thaothou peiwulai; puhnou puletao kamai-a hukhamai soua nüpoa talai ae kukhe maitao hai khoche nou daothalai.

⁵Süpei hinou nuhdu hai navei kini teitei, muh teina veishi, alia Judah hi vemaitao vei kini pokhai touyu hi buyu nangi veishi neletao vei ngaobayu maitao nou Babilon hi potawulai.

⁶Alia Pashhur, ne ae nevei kihikhamai hrülaiye hukhamai soua Babilon hi nüpoa talai. Sühinou neye sü nenou da-a rachi alao paopei khaitouyu nevei samai hrülaiye koa nou thailai ae daovu bailai.’ ”

⁷Oh MAPAO, nenou ahi dawure, ae Eye laloure. Ajünou Ne-a khoupu hie, ae nenou ajünou veiloure. Mai hrülai nou Eye pahnü soure; teithetsü puletao nou Eye konüa bure.

⁸Enou chi paolai touyu chüsü, E hai krapa-a baire, ae “Taida-a bure! Soukanghiwure!” tea shapa bure. MAPAOwo, Enou nevei chipao paoyu vanou Ewo teisa nou mai chaa pfüa maiye panou pahnü sou-a baire.

⁹Ana Enou “Ewo MAPAO ye ngai-a bailaire, ae puh zhih hinou chi paopulai more” tea paoyu phaki, nevei chipao sü mei taoyu büa ale hinou tao-a buloure. Enou soulousü koute nuloure donou te-e, ana halia nushalou hore.

¹⁰Mai hrülai nou “Buliki hai ngaopiyu khaibaire,” tea kheikheisoua phakuyu sü Enou chou-e. Südonou Etao nou puhye peikho maitao hi paopei laikhe tea bure. Avei samaitao koute-a E kaodu tare sü kho-a bure. “Puhye lalou laishe, süthaisü Etao nou puh jünou veiloulai, ae puh pei hi khüngu phouloulai,” tea puletao nou paoe.

¹¹Ana MAPAO nou soureih veishoyu mai ali büa Eye khosalai peie. Südonou Eye souveayu maitao sü kaoduta-a bailai. Puletao hai teisa nou haongu ngao-a bailai, daiolouzü puletao nou veilou laimoe. Puletao vei haongu nasü teisa nou ngailai moe.

¹²Ana Khoukhoulai MAPAO, kaozü hinou nenou maikhe maiye sü zhupeie; maikhe maivei tsüle teitei sü nenou süwe. Südonou puletao pei hi nenou khü phoupeiyu Eye panou ngaokhaio, daiolouzü Enou neye likhei zhi-a bubaie.

¹³MAPAO hi lou soukhaio! MAPAO ye paosholo! Daiolouzü puhnou veahoyu maiye mai ashimai bah hinou vupa peie.

¹⁴Eye nayu teithesü chaa ngaoyu teithe soupeio! Apfü nou Eye napeiyu teithe nasü lichopu khaiso!

¹⁵Apuo hi “Ne nahpoutu ali ngaoloure,” tea ko pove peiyu maina sü panou chaa ngaotheo.

¹⁶Mai sünasü panou MAPAO nou zhuveayu ha-a souha laiyu nuhdutao büpeio. Puhye sü panou shona hi soua nou krayu pai ae hea teile hi soureih souyu pai-kho chou-o,

¹⁷daiolouzü puhnou Eye apfüpou hinou southa peimore; E apfüpou hinou thaiyu thaio, apfüpou hai akhü soua bailai.

¹⁸Daidonou Eye pa apfüpou hinou nakou peia panou tateiyu ae veayu sü ngaowe, ae avei teithetao hai panou hraongu ngao-a buwe?