Read Poumei Naga JEREMIAH 23 Bible Online

JEREMIAH 23 - Poumei Naga bible

JEREMIAH 23

¹MAPAO nou puhvei maitaoye souha peiyu ae sourarou peiyu peikho maitaoye chikure hai daizhou koute ngaopi laisa!

²Südonou Israel maivei Ramai MAPAO nou puhvei maitaoye kikopeia zhupeire peikho maitao hi haibüa paoe, “Neletao nou avei maitaoye kaozü soua zhupei more; neletao nou puletaoye sü sourarou laiwure, ae puletaoye hulaiwure. Chuo neletao nou vah ashi soukhai touyu vanou Enou neletaoye tudee laire.

³Enou soupho rarou laikhai touyu avei maitaoye sü pove jüloulai, ae puletaoye Enou lah puletao vei teidei hisü sa-a dakhaive peilai. Puletao hai tou-nah taoli hrüloulai ae mai pousho palai.

⁴Puletaoye khopeire mai sü Enou dopeilai. Avei maitao sü ngaopi pulai moe, ae Enou puletaoye sü tudee peipulai more. Haisü MAPAO Enou paowe.”

⁵MAPAO nou paoe, “Checheyu vemai ali Enou David vei tyaosholea hinou dopa peire teile sü velaire. Veo süna nou dokai veisho-a teidei sü kholoulai, ae kaozü nasü teidei veishi hi soupeilai.

⁶Puhnou veo souyu kisü, Judah hi maitao sü kaozhou vei-a buloulai, ae Israel mai-a kaona-a bulai. Puh zhih sü ‘MAPAO hai Etaoye Khailupa-apeio’ tea kulai.”

⁷MAPAO nou paoe, “Israel maiye Ejipt teidei hinou sapa peiyu hriyu Ramai zhih hinou tea maikhe mainou chaachou soupulai moyu teile sü velaire.

⁸Ana puletao nou Israel maiye reikou teidei hinou ae teidei kukhetao hinou hupho rarou khaitouyu hinou sapoa ve jüpeiyu hriyu Ramai zhih hinou tea chaachou soulai. Süthaisü puletao nou lahvei teidei hinou hrülai.”

⁹Alethou pere, ae E sü pingure. Daiolouzü MAPAO donou, daiolouzü puhvei sheeyu chipao donou, Esü zhaoh shozhi loua laiyu mai ali büa baire.

¹⁰Teidei hisü khulou souyu nou pouleyu donou teidei sü chaa ngao-a dopfü loure, ae heiphao khesü kitare. Puletao hai kaozü moyu hinou hrüa baire, ae puletao vei khouko sü macha moyu hinou poa vah soua bubaire.

¹¹MAPAO nou paoe, “Rachipaola maitao ae napao maitao nou Ramai ye sümore; Rathoki hi koutea puletao nou hashi souyu sü Enou ngaoloure.

¹²Südonou puletao vei ludu sü jülealea bailai ae zhitei-a bailai; Enou puletaoye panou phi süloua dutalai. Enou puletao hisü veahoyu hai pove peilai; puletaoye tudee peilaiyu teile sü velaire. Haisü MAPAO Enou paowe.

¹³Samaria hinou buyu rachipaola maitao mah sü Enou ngaoloure: puletao nou Baal zhih hinou rachi paowe, ae avei maitaoye sü süthaimah peiwure.

¹⁴Ana Jerusalem hinou buyu rachipaola maitao hai süjünou shipua Enou ngaoloue: puletao hai khulou vah soure ae mada chi paore; puletao nou vah ashi souyu maiye soukha peie, sübüa maikhe maiye panou ashi hinou bailou moe. Eye donou puletao mai hrülai sü Sodom ae Gomorah hi maitao büre.

¹⁵“Südonou Kukulai MAPAO nou Jerusalem hi rachipaola maitao hi haibüa paoe: Enou puletaoye panou khataoyu pouhou nou toulai, ae thailou veiyu poudzü panou kelai, daiolouzü teidei teitei hisü puletao nou zhaidou ashi sünou poa raota peire.”

¹⁶Akukulai MAPAO nou Jerusalem maitao hisü paoe, “Rachipaola maitao nou paoyu chi sü keiso; puletao nou cheche moyu chi paopeia panou hamako hinou neletaoye areih buwe. Enou paoyu chi moa nou puletao hai lah tsücho loua pao-a baie.

¹⁷Achi kei ba-a buyu maitao nou puletao hisü haveishi nou vei-a bailai tea pao-a nou bue, ae puletao nou rochiyu mai hrülai hisü veahoyu hashi nasü puletao hi velou hoe tea paowe.”

¹⁸Enou paoe, “Rachipaolayu mai haitao hai MAPAO vei kheitsü taosü sümoe. Mai haitao sü puhnou paoyu chipao khesü chou moe, moa sükulou moe, moyuma kei-a keipei moe.

¹⁹Puhvei rarou lekha sü teikhai teirü ashi büa ashi souyu maitao pei hi vere donou tapare,

²⁰ae puhnou soulai tea lichoyu taosü souche loumo koute khailai moe. Nakinou haihai cheche touyu sü puhvei maitao nou süloulai.”

²¹MAPAO nou paoe, “Enou rachipaolayu mai haitaoye leta moe, ana puletao nou lah ta-a baie. Enou puletao hi chipao aliro peimoe, ana puletao nou azhih hinou pao-a baie.

²²Puletao nou avei kheitsü sülouzü, puletao nou avei chipao taosü maikhe mai hi paopayu phae ae maikhe mainou vah ashi ae kaomo ludu tayu khesü thaoyu phae.

²³“E hai buh veishi hinou buyu Ramai-e ae buh alikhi hi bubai moe.

²⁴Enou ngaolou hoyu buh hinou mailia tutsülou süvu? Raki ae deiphao teitei hinou E bue touyu neletao nou sümowu?

²⁵Rachipaola maitao nou azhih hinou mada-a ‘E memue, E memue!’ tea paoyu Enou choue.

²⁶Da-a rachipaola maitao nou lah puletao vei tsüle hinou teile kazhou koute avei maitaoye süthaimah peilaige?

²⁷Puletao nou memuyu nasü paopei louzü avei maitao hai puletao vei puopao maitao büa Eye ngaiwua Baal rahye thota shulai tea puletao nou tsüchowe.

²⁸Me muyu rachipaola maisü panou mesü paokhaio, ana achipao paoyu maitao sü panou checheyu hinou achipao sü shapao khaio. Thouba sü thou hinou daie veiyu bue?

²⁹Avei chipao hai mei büwe, ae chuhdu daphe sasa louyu hubao büwe.

³⁰Südonou, zhukhaio, rachipaola mai alinou ali hinou achi vaoloua rachi paoyu maitao pei hi Enou aetoulai moe.

³¹Alia lahvei tsü hinou achipao soua paoyu rachipaola maitao hisü Enou aetoulai moe.

³²MAPAO Enou paoyu sü keilo! Dahrührüa me paoyu rachipaola maitaoye sü Enou aetoulai moe. Puletao nou da-a me sü paopeia avei maitaoye sü süthaimah peiwure, ae puletao nou khaophu soua bue. Enou puletaoye sü seita moe, moyuma takhaio tea kharochi peimoe, ae puletao hai avei maitaoye donou koyu liro hae. Haisü MAPAO Enou paowe.”

³³MAPAO nou ahi haibüa nou paoe, “Jeremiah, avei mai taralinou, moa rachipaola mai linou moyuma napao mailinou ne hinou ‘MAPAO vei chipao sü daiki bue?’ tea nouyuki, nenou puletao hi haibüa paolai, ‘Neletao hai puhye donou veakou ali soua baire, südonou neye sü puhnou hulaiwulai.’

³⁴Hakinou avei mai taralinoua moa rachipaola mai moyuma napao mai tara linoua ‘MAPAO vei veakou’ tea paoyu nasü Enou puhye ae puhvei kikhamaitao sü tudee peilai.

³⁵Süna thaosü puletao nou alinou ali hi ‘MAPAO nou dai chila peiwe? MAPAO nou daitea paowe?’ tea noulai.

³⁶Puletaoye panou ‘MAPAO vei veakou,’ tea paopulai moe, daiolouzü mai taralinoua sübüa paopu louzü, Enou puhye sü cheche vujünou avei chipao nou souvea peilai. Maikhe mainou puletao vei hriyu Ramai, Khoukhoulai MAPAO vei chipao sü souzhaiwure.

³⁷Jeremiah, rachipaola maitao hisü haibüa noukhaio, ‘MAPAO nou neletao hisü dai chila peie? MAPAO nou dai paowe?’

³⁸Hakinou puletao nou achi züba-a ‘MAPAO vei veakou’ tea paopu louzü, puletao hi paopeio,

³⁹Enou veimosoua puletaoye sü Enou puletao vei puopao maitao hi peikhai touyu teidei noupu puletaoye sü anghingao hinou khilaiwulai.

⁴⁰Enou puletao pei hi teisa nou ngailou hoyu haongu ae chaa sü pove peilai.”