Read Poumei Naga JEREMIAH 24 Bible Online

JEREMIAH 24 - Poumei Naga bible

JEREMIAH 24

¹Babilon hi veo Nebukhadnezzar nou Jerusalem hinou Judah vei veo Jehoiakim nahpoutu Jehoiakin ye hukhamai soua Judah vei vemai nahtao, shara soulou sümai, hukumai noupu Babilon hi satayu thai, MAPAO nou ahi zho haina hai ngaopeie: Zhukhaio, doushi sülai ahai MAPAO vei Rathoki hi khaitoue.

²Sülai arai na hisü doushi meipa layu büa veishoyu doushi bue, ana sülai kukhe alina hisü shishoyu doushi, toulou shiyu doushi nou bue.

³Süthaisü MAPAO nou ahi paoe, “Jeremiah ne dai ngaoe?” Enou chila peie, “Doushi ngaoe. Veiyu doushitao hai veishore, ae shiyu doushitao hai shishore, toulou shi-e.”

⁴Süthaisü MAPAO nou ahi paoe,

⁵“Israel maivei Ramai MAPAO Enou Babilon teidei hi hukhamai sou-a nüpoa tayu maitao sü veiyu doushi büe tea powe, ae Enou puletaoye zhuvea peilai.

⁶Enou puletaoye teidei hai hi sa-a dakhaive peilai. Enou puletaoye soushu peilai, souhawulai moe; Enou puletaoye shothou peilai, pailai peilai moe.

⁷E hai MAPAO süe touyu puletaoye panou süloure tsüle sü peilai. Süthaisü puletao hai avei mai soulai, ae Enou puletao vei Ramai soulai, daiolouzü puletao vei tsüle alia hrümai teitei nou peia ahi dakhai velai.

⁸“Ana MAPAO nou haibüa paoe: Judah hi Veo Zedekiah, puh khehi buyu peikho maitao, teidei hai hinou shokhai touyu maitao, ae Ejipt teidei hi hotayu maitao sü toulou shiyu doushitao büwe.

⁹Enou puletao hi veahoyu sü seive peia panou deiphao mai hrülaiye ngaopi shoyu soupeilai. Maikhe mainou puletaoye ngaophou moa konü peilai, ae Enou puletaoye soupho laiyu buh veishi hisü panou puletao vei zhih sü chaa soua poa talai.

¹⁰Enou puletao poupao hi peikhai touyu teidei hinou hrüyu mai hrülaiye souha khaimo koute Enou puletao hi soureih, tokaa, ae rahta rahvu sü seive peilai.”