Read Poumei Naga JEREMIAH 29 Bible Online

JEREMIAH 29 - Poumei Naga bible

JEREMIAH 29

¹Nebukhadnezzar nou Jerusalem hinou hukhamai soua nüpoa Babilon hi tayu napao maitao, rachipaola maitao, süthai-apei maitao alia mai hrülai hisü Enou seiko rüloua seita-e.

²Enou hai nasü Veo Jehoiakin, puh pfü, veo vei ki hi peikho maitao, Judah ae Jerusalem hi süthai-apei maitao, shamara souyu maitao, ae vah souveiyu maitaoye nüpoa tayu thainou rüta-e.

³Enou seiko nasü Judah hi Veo Zedekiah nou Babilon hi Veo Nebukhadnezzar hi seitayu Shaphan nahpoutu Elasah ae Hilkiah nahpoutu Gemariah bah hinou seitae. Süsü haibüe:

⁴“Khoukhoulai MAPAO, Israel maivei Ramai nou hukhamai soua Jerusalem hinou nüpoa Babilon hi satayu mai hrülai hisü haibüa paowe:

⁵‘Ki souloua puletaoye koa hrülo. Kipei soulo ae sühinou payu khesü toukhaio.

⁶Shanghi soulo ae nahmai hrülo. Süthaisü neletao vei nahmaitao-a panou shanghi soulo, ae tounah pa hrülo. Buh sühinou mai sü panou poupalo, ae panou mai sü khaitaso.

⁷Enou neletaoye hukhamai soua seitayu nuhdutao donou te-a vah aveih soupeio. Puletao thaosou veachi paopeio, daiolouzü puletao nou sava louzü, neletao-a vasalai.

⁸Daiolouzü Khoukhoulai MAPAO, Israel maivei Ramai nou haibüa paoe: Neletao hrohinou koa buyu rachipaola maitao ae vepare ngaoyu maitaoye panou neletaoye lalouso, ae puletao nou memuyu khesü keiso.

⁹Daiolouzü puletao nou neletao hi azhih hinou da-a nou pao-a baie; Enou puletaoye seita moe. Haisü MAPAO Enou paowe.’

¹⁰“MAPAO nou haibüa paoe, ‘Babilon maiye donou po rainai cheyu phaki Enou neletao hi velai, ae Enou paokhai touyu khesü Enou neletao hi souche peilai alia neletaoye buh haihi sa-a dakhaive peilai.

¹¹Daiolouzü Enou neletaoye donou tsüchoda khaitouyu sü Enou süwe tea MAPAO nou paoe, ashi moa nou aveih nou soupeilai, ae haithai panou areih nou phoutao-a buyu sü soupeilai.

¹²Süthaisü neletao nou Eye kulai. Neletao nou ahi tave veachi paolai, ae Enou neletaoye chila peilai.

¹³Neletao nou Eye phoulai ae Eye ngaoloulai, daiolouzü neletao nou Eye neletao vei tsüle veishi nou peia nou phoulai.

¹⁴Ovai, neletao nou Eye ngaoloulai tea Enou paowe, ae Enou neletaoye neletao vei teidei sü dakhai peilai. Enou neletaoye teidei kukhe hi soupho rarou khaitouyu buhtao hinou save jüloulai, ae Enou neletaoye hukhamai soua panou nüpoa tayu teidei hinou sa-a dakhaive peilai. Haisü MAPAO Enou paowe.’

¹⁵“Daiolouzü neletao nou haibüa nou paoe, ‘MAPAO nou Etaoye donou Babilon hinou rachipaola maiye seive peie.’

¹⁶MAPAO nou David vei vebuh hinou buyu veo hi ae vedei sühinou hrüa buyu maitao, süolouzü neletao vei thaihou jürai, hukhamai soua nüpoa tamoyu maitao donou paoyu sü keilo:

¹⁷Khoukhoulai MAPAO nou haibüa paoe, ‘Enou puletao hisü soureih, tokaayu, ae rahta rahvu seive peilai, ae Enou puletaoye sü doushi meilale-a toulou shiyu büa soupeilai.

¹⁸Enou puletaoye khoche, tokaayu, ae rahtayu sünou thaingou talai, ae puletaoye hupove khaitouyu buh veishi hinou puletaoye mai hrülai panou ngaopiyu, chaa, pihiyu, ngaohiyu ae chaa peiyu sü soupeilai.

¹⁹Haibüa puletao hisü vepalai, daiolouzü Enou tobai soumoa avei kilai rachipaola maitaoye sü puletao hi seive peie, ana puletao nou avei chipao sü zübare.

²⁰Enou Babilon hi hukhamai soua seitayu mai hrülai, MAPAO Enou paoyu chi sü keilo.’

²¹“Khoukhoulai MAPAO, Israel maivei Ramai nou puh zhih hinou da-a rachipaolayu Kolaiah nahpoutu Ahab ae Maaseiah nahpoutu Zedekiah vanou haibüa paoe: Zhukhaio, Enou puhaiye sü Babilon hi Veo Nebukhadnezzar bah hi thaothou peilai, ae puhnou puhaiye sü neletao vei nghingao hinou southawulai.

²²Puhai vanou Jerusalem hinou Babilon hi hukhamai soua nüpoa tayu mai hrülai nou chaa peiyu phaki haibüa chaalai: ‘MAPAO panou neye Babilon hi Veo nou Zedekiah ae Ahab ye hria mei nou deithayu büa soupei theo!’

²³Puletao nou Israel mai hrohinou vah ashi sü soupfüre, maichimai nahmaiye sapare, ae Enou kharochi peimo lukhu azhih hinou da-a rachi sü paoyu donou haibülai. Enou süwe, ae Enou shaki nasüe tea MAPAO nou paowe.”

²⁴Khoukhoulai MAPAO, Israel maivei Ramai nou Nehelam puona Shemaiah vanou ahi haibüa chipao ali peie, daiolouzü puhnou Jerusalem hi hrüyu mai hrülai hi ae napao Maaseiah nahpoutu Zephaniah, alia napao mai hrülai hi lah puhvei zhih hinou seiko sü haibüa rüpeie:

²⁶“MAPAO nou neye sü Jehoiada thaosou napao sü soupeie, ae chuo nenou MAPAO vei Rathoki hi peikhowo nasü soure. Südonou vo-a nou rachipaolayu mai hrülaiye sü hurai nou ngu hinou phumure sü nevei vah-e.

²⁷Ne daisounou Anathoth puona rachipaolawo Jeremiah ye sübüa soupei moe?

²⁸Daiolouzü puhnou Babilon hinou haibüa Etao hi paoe, ‘Neletao hai hukhamai soua vakou nou bure teile hai taoli bulai, südonou ki souloua bulo, ae kipei souloua sühinou payu khesü toukhaio,’”

²⁹Napao Zephaniah nou seiko nasü ahi phoungaoe,

³⁰ae süthaisü MAPAO nou ahi haibüa

³¹Babilon hi hukhamai soua nüpoa tayu mai hrülai hisü Shemaiah vanou paopeio tea paoe, “MAPAO Enou Shemaiah alia puhvei tyaosholea veishi sü tudee peilai. Enou puhye sü seita moe, ana puhnou neletao hi rachipaolayu mai ali büa da-a nou paopeia panou neletaoye louche loure. Puh sü panou tounah halai. Enou avei maitaoye panou vasa-a hrülaiyu teile nasü panou puhye ngaolai moe, daiolouzü puhnou Eye khaityare. Haisü MAPAO Enou paowe.”