Read Poumei Naga JEREMIAH 30 Bible Online

JEREMIAH 30 - Poumei Naga bible

JEREMIAH 30

¹Israel maivei Ramai MAPAO nou

²ahi haibüa paoe, “Enou ne hi paoyu veishi sü larübvü hi rüthoulo,

³daiolouzü Enou Israel ae Judah, avei maitaoye panou savare teile pove peire sü velaire. Enou puletao vei puopaoh hi peikhai touyu teidei hisü Enou puletaoye sa-a dakhaive peilai, ae puletao nou haisü teisa vei soure donou kathao loulai. Haisü MAPAO Enou paowe.”

⁴MAPAO nou Israel ae Judah maitao hisü paoe:

⁵“Enou ngaopi sho-a nou krayu pai chou-e, kaonayu moa nou pisho-a krayu pai choue.

⁶Noukhaio, ae zhukhaio! Poutumai alinou nah nalou süvu? Sütoumo louzü daisounou poutu mai hrülai nou naotumai ali nou nah nare phaki pou souyu büa puletao vei pou sü bah nou dei-a nou buwe? Daisounou mai hrülai vei zhu hai hanghoubou-a nou buge?

⁷Ngaopi shoyu teithe sü velaire; teithe kukhe ali-a hai nasü paonada louhoe— haizhou sü avei maitao nou veaho sholai, ana puletao nou hriloulai.”

⁸Khoukhoulai MAPAO nou paoe, “Teithe süna veyu phaki, Enou puletao vei ngu hinou khapfüa buyu phaodao nasü souphe peiwulai, ae puletaoye phupfüa buyu hurai nasü polai peiwulai, ae puletaoye panou vakou maivei qila sü soupulai moe.

⁹Anou puletao nou puletao vei Ramai MAPAO, avei kuvah sü soulai, alia David vei tyaosholea hinou Enou pa veo soua vebuh hi bulai.

¹⁰“Avei maitaore, ngaopiso; Israel maitaore, chathai taso. Enou neletaoye kadou shoyu buh hinou vupa peilai, ae neletaoye hukhamai soua buyu teidei hinou khailupa peilai. Neletao nou lahvei teidei hi dakhaive kaona-a hrüloulai; neletao hai kaozhou vei-a mai linoua neletaoye soupilai moe.

¹¹Daiolouzü Enou neletaoye tave vupa peilai. Enou neletaoye hupho rarou khaitouyu tyahrü veishi sü souhakhai toupeilai, ana Enou neletaoye souhalai moe. Neletaoye tudee peimoa panou talai moe; ana Enou neletaoye kaozü hinou tudee peia bailai. Haisü MAPAO Enou paowe.”

¹²MAPAO nou puhvei maitao hi haibüa paoe, “Neletao vei zhimü sü kulou hore, neletaoye zhizhu khaitouyu khesü veilou hore.

¹³Neletaoye soukha peire mai ali-a hare, neletao vei zhimü sü souvei loure pou liro hare, neletaoye souvei loure areih halia hade.

¹⁴Nevei leshi mai hrülai nou neye ngaiwure; puletao nou neye donou tea tsücho peimore. Enou neye sü ngaobamai ali büa dukhaire; neletaoye zhuveayu ali-a ha-a nou souvea shopeire, daiolouzü neletao vei mah sü alao loure ae neletao vei ashi khesü pousho loure.

¹⁵Neletao zhizhu louyu vanou daisounou neletao nolealeawe? Neletao nou souyu sü veilou hoe. Enou neletaoye haibüa tudeeyu hai daisou nouge touyuo neletao vei mah pousho loure, ae neletao vei ashi sü dusho-a buloure.

¹⁶Ana chuo, neletaoye soushiyu mai hrülaiye sü soushi peiwulai, ae neletaoye ngaobayu mai hrülaiye sü hukhamai soua nüpoa tawulai. Neletaoye souveayu mai hrülaiye sü souvea peilai, ae neletaoye soushi peiyu mai hrülaiye sü soushi peilai.

¹⁷Enou neletaoye souveipu peilai; Enou neletao vei zhimü khesü souku peilai, ngaoba maitao nou neletaoye haibüa pao-a buyuma, ‘Zion hai mai nou komore, ae mai linoua zhuvea leshi peimore.’ Haisü MAPAO Enou paowe.”

¹⁸MAPAO nou paoe, “Enou avei maitaoye sü puletao vei teidei hi sa-a dakhaive peilai ae kihikhamai alili nou zhuvea peilai; Jerusalem nuhdu sü soushu dakhai peilai, ae vebuh sü panou raichoki büa bulai.

¹⁹Sühinou hrüa buyu maitao nou paoshoyu lou soulai; puletao nou asah soua ralai. Avei shiha vanou puletao hai mai tyaka palai; avei ha sünou puletaoye tsükhouyu sü pove peilai.

²⁰Puletao vei nahmaitao sü panou tsümai ali büpeilai, ae puletao vei maime sü anghoujü hinou veishoa soushu peilai; Enou puletaoye souchoro peiyu mai hrülaiye sü tudee peilai.

²¹Puletaoye khasa-a hrülai mai hai lah puletao vei tyahrü hinou bailai, puletao vei veo nahpoutu sü lah puletao vei mai hinou palai. Enou puhye ahi soungheikou peilai, ae puhnou ahi takoulai, daiolouzü thaonou ahi Enou kumoa takou nghilou laige? Puletao nou avei mai soulai, ae Enou puletao vei Ramai soulai. Haisü MAPAO Enou paowe.”

²³MAPAO vei lekha rarou hai teikhai teirü ashi büe, teikhai teirü ashi sünou mai ashi maitao hisü hüvelai. Hai nasü soulai tea buyu nasü souche loumo koute chaolai moe. Vere teile hisü haitao hai puhvei maitao nou sheesha teanou süloulai.