Read Poumei Naga JEREMIAH 33 Bible Online

JEREMIAH 33 - Poumei Naga bible

JEREMIAH 33

¹Enou hukhaki hi buyu teile hinou MAPAO vei chipao sü ahi haibüa vepue.

²Teideiphao soupeipu, MAPAO ae hai nasü lahbuh hi khaipeipu nou ahi haibüa paoe. Puh zhih sü MAPAO touwe,

³“Eye lakhaio, ae Enou neye chila peilai; nenou sükhai toumoyu khupayu ae veishoyu khesü Enou ne hi paongao peilai.

⁴Israel maivei Ramai MAPAO Enou Jerusalem hi kitao alia Judah hi veo vei ki sü soureih souyu donou soushiwulai tea paopeie.

⁵Kamai-a nou Babilon maiye soureih soulai, ae avei lekha rarou hinou southa peiyu maitao vei thaiphao sünou kitao hisü phoutaolai, daiolouzü puletao nou vah ashi souyu donou Enou avei zhu sü nuhdu hai hinou pfüvai poa nou tare.

⁶Ana Enou nuhdu hai nasü souveipu peilai ae maikhe maiye sü pfüphao aveih peipulai. Enou puletaoye vasa payu ae kaonayu sü peilai.

⁷Enou Judah ae Israel sü kaozhou aveih peipulai, ae Enou puletaoye sü raichoki büa soushupu peilai.

⁸Puletao nou apei hi soumah khaitouyu teitei sü Enou soushee peilai, ae Enou puletao vei mahmo khesü khaipeilai.

⁹Süthaisü Jerusalem hai Eye donou savayu, tsükhouyu ae khaophu souyu buh ali souwulai; alia Jerusalem hi buyu maitaoye donou Enou haveili soupeia ae savayu pove peia bushe touyu ko khesü deiphao hi tyahrü veishi nou chouloua ngaopi shopoa ngulai.”

¹⁰MAPAO nou haibüa paoe, “Maikhe mainou buh hai nasü radeiki büa mai liro moa hrikhaona ali-a hrümore tea paoyu sü cheche-e; Judah vei nuhdutao ae Jerusalem vei duva khesü sakhai-a mai lia tamoe ae hrikhaona liro hrümoe. Ana buh haitao hinou

¹¹asah soua shura souyu ae lounghi sa-a vasayu paikho khesü choupulai. Neletao nou avei Rathoki hisü maikhe mainou kalo vei posheela khesü pove peia haibüa paolai, ‘Khoukhoulai MAPAO hi kalo paokhaio, daiolouzü puh sü vei-e, ae puhvei leshiyu hai akhai hae.’ Enou teidei hai nasü raichoki büa souveipu peilai. Haisü MAPAO Enou paowe.”

¹²Khoukhoulai MAPAO nou paoe, “Radeiki ali büa buyu teidei ae mai moa hrikhaona lia hrümoyu hai nasü panou maiye hrüyu buh ali soupu peilai ae zhaokho maitao nou puletao vei zhaotu khesü heiphao hinou kho-a buyu soupeilai.

¹³Deichitao hinou buyu nuhdutao, deichiphi hinou buyu nuhdutao, ae Judah vei nuhdutao hinou zhaokho maitao nou puletao vei zhaotu khesü phoua nou bulai. Haisü MAPAO Enou paowe.”

¹⁴MAPAO nou paoe, “Enou Israel ae Judah maitao hi soupeilai tea paohpeiyu teitei sü souchekhou peiyu teile sü velaire.

¹⁵Teile süphaki Enou David vei tyaosholea hinou checheyu mai aliye panou veo soure donou dopa peilai. Veo sünanou teidei veishi hisü acheche ae kaozü vah sü soupeilai.

¹⁶Judah ae Jerusalem maitaoye sü vupa peilai alia panou kaozhou vei-a hrüloulai. Nuhdu süna zhih sü ‘MAPAO hai Etao vei Khailu-apeio nasüe,’ tea kulai.

¹⁷Daiolouzü MAPAO Enou David vei tyaosholea ye panou teisa nou Israel mai hi veo sü soulai tea paohpei khaitoue,

¹⁸ae avei kuvah panou soua meidei-a posheela ae thoudzü vei posheela khesü teisa panou soure donou napao maiye sü Levimai hinou pa bukou telai.”

¹⁹MAPAO nou ahi haibüa paoe,

²⁰“Enou hea ae khei teile ye koa panou teisa nou teile macha soua puhai vei teile sü teisa bulai tea vo soukhai toue, vo hai nasü souphe soupho khaitoulai moe.

²¹Sübütoua Enou avei kilai David hia puhvei tounah panou Israel mai hi veo sü soukoute peilai tea vo soukhai toue, alia Levi mai khü hinou teisa panou avei kuvah soua bure donou napao sü bukoute peilai tea vo soukhai toue; vo haitao sü souphe khailai moe.

²²Enou avei kilai David vei toudzü ae Levi khü hinou napao maitao sü soupoupa peilai, sübüa puletaoye sü panou teivuh büa ae zaipe hinou vonai büa cholou holai.”

²³MAPAO nou ahi haibüa paoe,

²⁴“Enou dopakhai touyu Israel ae Judah maiye Enou malaiwure tea maikhe mainou paoyu sü nenou chouho moe? Südonou avei maitaoye sü puletao nou ngaora-e ae maikhe mainou puhaiye sü tyahrü ali-e tea popei more.

²⁵Ana MAPAO Enou hea ae khei ye koa vo soukhai toue, alia Enou ratei ae deiphao sü kholoure vei chikha soukhai toue.

²⁶Enou haisü cheche vuzünou soukhai touyu thaifüa Enou Jakob vei tyaosholea ae avei kilai David hi vo soukhai touyu sü soupeilai. Enou David vei tounah hinou pa Abraham, Isaak ae Jakob vei tyaosholea maitaoye panou khore donou veo ali sü dopa peilai. Enou avei maitaoye zhuvea peilai ae puletaoye panou kaozhou vei-a hrüpu loulai.”