Read Poumei Naga JEREMIAH 34 Bible Online

JEREMIAH 34 - Poumei Naga bible

JEREMIAH 34

¹Babilon hi Veo Nebukhadnezzar ae puhvei reihmaitao, alia puhnou veilouyu tyahrütao vei reihmai hrülai nou Jerusalem ae süpehao hi buyu nuhdutao hi soureih huloua buyu teile phaki MAPAO vei chipao sü ahi ve-e.

²Israel maivei Ramai MAPAO nou Eye taho Judah hi Veo Zedekiah hisü haibüa paopeio tea paoe, “MAPAO Enou nuhdu hai nasü Babilon vei veo bah hi thaothou peiwulai ae puhnou hai nasü meidei laiwulai.

³Ne tureipa loulai moe; neye sü nüloua puh bah hi peiwulai. Nenou puhye sü zhu haohao nou ve daolai ae puhye chakulai; süthaisü neye sü Babilon hi sapoa ta-a bailai.

⁴Anou MAPAO nou paoyu sü keilo, Oh Judah hi Veo Zedekiah! Ne sü soureih hinou thailai moe.

⁵Ne sü kaona-a nou thailoulai, ae ne jünou rai-a vemaitaoye nevei puopao maitao nou poukai nüvei meidei-a daovu peiyu büa neye daovu peilai. Puletao nou dopfüa haibüa paolai, ‘Etao veo sü thaire!’ Haisü MAPAO Enou paowe.”

⁶Süthaisü Enou Jerusalem hinou Veo Zedekiah hisü chipao haitao hai paopeie,

⁷süteile phaki Babilon hi veo vei reihmaitao nou Jerusalem ae Judah vei shokhai toua buyu nuhdutao, Lakhish ae Azekah hisü reih soua nou bue, daiolouzü Judah teidei hi kaopo veisho-a pokhai touyu nuhdu sü haina hai likhei bua baire.

⁸Veo Zedekiah alia Jerusalem hi maitao nou qila maitaoye lahdo soupeiwulai tea ae-ao souloure,

⁹süolouzü Hebrew mainou qila souyu naotu, poutumai hrülaiye panou lahdo soupeiwulai, sübüa panou mailia lahvei thaihou jürai soua buyu Israel maiye panou qila soupulai moe.

¹⁰Mai hrülai ae puletao vei süthai-apei maitao nou puletao hi qila soua buyu mai hrülaiye lahdo soua phapeiwulai tea ae-ao souloure, alia puletao panou dakhailou maivei qila soupulai moe tea chidei souloure. Südonou puletao nou qila maitaoye sü lahdo soua phapeiwure,

¹¹ana phapeiyu thaisü puletao nou ledaloua qila maitaoye sü sadakhailoua panou puletao vei qila sü soupu tare.

¹²Süthaisü Israel maivei Ramai MAPAO nou ahi haibüa maikhe mai hi paopeio tea paoe, “Enou neletao vei puopao maitaoye Ejipt maivei khakhe hinou vupapeia panou lahdo soulouyu phaki puletaoye koa haibüa nou vo soukhai toue.

¹⁴‘Neletao hi Hebrew mai tarali nou zhothou peiwua puletao nou po arou koute neletao vei qila soure toulouzü, po anai kousü lahdo soua phapeilai.’ Ana neletao vei puopaoh maitao nou achi sü keipei bare.

¹⁵Teile shomo hie, neletao nou ledaloua Enou jüpayu nasü soupeie. Neletao mai hrülai nou anghingao hinou lahvei thaihou jürai soua buyu Israel maitao nou qila soua buyu maitaoye sü lahdo soupeiwulai tea Eye thoyu Rathoki hinou vo soukhai toue.

¹⁶Ana neletao vei tsüle sü datare, ae Eye tsükhou more. Neletao vei jüpa thaifüa neletao nou lahdo soua phapei khaitouyu qila maitaoye sü neletao nou sa-a dakhailou panou qila sü soutapure.

¹⁷Südonou chuo MAPAO Enou paowe: Neletao nou lahvei thaihou jürai soua buyu Israel maitaoye sü panou lahdo soulo tea paoyu achi sü zübare. Südonou chuo Enou neletaoye soureih hinou, rahta rahvu hinou, ae tokaa veyu hinou lahdo soua panou thailai. Enou neletao hi soupeiyu vah haso khesü panou deiphao mai hrülaiye ngaoloua ngaopi soulai.

¹⁸Eye koa vo soukhai touyu Judah ae Jerusalem hi peikho maitao, veo vei peikho maitao, napao maitao, alia süthai-apei mai hrülai nou chode ali sü ahai soua daode khaitouyu ko hinou takhai toure. Ana puletao nou vo soukhai touyu nasü pfüthowure. Südonou mai haitaoye sü Enou chode süna büa soupeilai.

²⁰Puletaoye sü Enou puletaoye southa nüa buyu ngaoba maitao bah hi thoupeiwulai, ae puletao vei thaiphao sü panou raohou ae rekhaona nou touloulai.

²¹Enou Judah hi Veo Zedekiah ae puhvei peikho maitaoye sü puletaoye southa nüa buyu mai bah hi peiwulai. Soureih soulai more tea dakhai tayu Babilon maivei reihmaitao bah hi Enou puletaoye sü peiwulai.

²²Enou kharochi peiwua panou puletaoye nuhdu haihi dakhai velai. Puletao nou nuhdu hai hisü soureih hulou poloua meideiwulai. Enou Judah vei nuhdutao sü soushi laiwua panou mailia hrüpulai moe. Haisü MAPAO Enou paowe.”