Read Poumei Naga JEREMIAH 35 Bible Online

JEREMIAH 35 - Poumei Naga bible

JEREMIAH 35

¹Judah hi veo Josiah nahpoutu Jehoiakim nou veo soua buyu teile hi MAPAO nou ahi haibüa paoe,

²“Rekab mai ki hi taho puletaoye chakhaio. Süthaisü puletaoye Rathoki vei kide ali hi salou loua zhaoh panou shokhaio.”

³Südonou Enou Rakab vei khü hi mai hrülai — Jaazaniah (puh sü Jeremiah vei nahpoutu kukhe mai alie, ae Habazzinah nahpoutue) alia puh thaihou jürai mai hrülai saloure —

⁴ae puletaoye Rathoki hi save loure. Enou puletaoye rachipaolawo Igdalia nahpoutu Hanan vei kide hi salou peie. Hai nasü Rathoki hi matsü shoyu peikhowo Shallum nahpoutu Maseiah vei kide pei hinou bue, ae peikhomai kukhe vei kide nghia nou bue.

⁵Süthaisü Enou Rekab maitao nghoujü hisü zhaoh leekhou ali ae pai khesü popa khaipeie, ae puletao hi paoe, “Zhaoh sholo.”

⁶Ana puletao nou chila peie, “Etaowo zhaohsho moe. Etao vei puopaoh Rekab nahpoutu Jonadab nou Etao hi ae Etao vei tyaosholea-a panou zhaoh shokhai touso tea kharochi peikhai toue.

⁷Süpei hinou puhnou Etao hi ki souso moyuma tataso, ae shira shothou touso moa sütao hai hüso tea paopei khaitoue. Puhnou Etaoye nou teidei hai hi teisa nou hrüloure donou shetumai ali büa sahpao hinou hrüa baio tea paopei khaitoue.

⁸Jonadab nou Etao hi paodou peiyu teitei sü Etao züa soupfüwe. Etao vei hümamai veishi hi Etao, moa Etao vei maipfü nahmai-a panou zhaoh sü sokhai toumoe.

⁹Etao hrüre donou Etao hai ki soubu moe, Etao hai sahpao hinou bua baie, ae Etao hai darkha kipei moa shinamara thoure donou dou hae. Etao vei puopaoh Jonadab nou kharochi peiyu veishi sü Etao nou zükhai toue.

¹¹Ana Babilon hi Veo Nebukhadnezzar nou Etao teidei hi reih hulouyu donou Etao hai Babilon ae Sairia maivei reihmaitao hinou tuvai loure donou Jerusalem hai hi ve hrüa nou bubaie.”

¹²Süthaisü Khoukhoulai MAPAO, Israel maivei Ramai nou ahi haibüa Judah ae Jerusalem maitao hi paopeio tea paoe, “MAPAO Enou neletao hi paodou peiyu sü polai movu, ae achi kei peilai mowu?

¹⁴Rekab nahpoutu Jonadab vei tyaosholea maitao nou zhou koute hai kharochi züa zhaoh sü sokhai toumoe. Ana Enou neletao hio tobai soumoa pao-a nou bue, ae neletao nou achi sü züpei moe.

¹⁵Enou avei kilai rachipaolayu maitaoye neletao hi seive koute peie, ae puletao nou neletao hi vah ashi souyu khesü thaowua kaozü nasü soulo tea paopeie. Enou neletao vei puopaoh maitao hi peikhai touyu teidei hi teisa buloure donou puletao nou neletao hi rah kukheye thoso ae puletao vei kuvah souso tea paopi peie. Ana neletao nou achi sü keipei bare ae popei bare.

¹⁶Jonadab ae Rekab vei nahmaitao hai puletao vei puopaoh mainou kharochi peiyu züloue, ana neletao louzü achi zübare.

¹⁷Südonou chuo Israel maivei Ramai, Khoukhoulai MAPAO Enou Judah ae Jerusalem maiye soushi souhawulai tea apaokhai touyu teitei sü soupeilai. Enou haisü daivanou soulai toulouzü neletao nou achi zübare ae Enou neletaoye kuyu phaki, neletao nou Eye chila peibare.”

¹⁸Ana Khoukhoulai MAPAO, Israel maivei Ramai nou Rekab maitao hisü haibüa paoe, “Neletao vei puopah Jonadab nou neletao hi kharochi peiyu ae paodou peiyu teitei sü neletao nou chi züa soupfü louyu donou,

¹⁹Israel maivei Ramai, Khoukhoulai MAPAO Enou Rekab vei tounah sü panou hakhai toumoa teisa anghoujü nou pa avei kuvah sü soukou telai.”