Read Poumei Naga JEREMIAH 37 Bible Online

JEREMIAH 37 - Poumei Naga bible

JEREMIAH 37

¹Babilon hi veo Nebukhadnezzar nou Josiah nahpoutu Zedekiah panou Jehoiakim nahpoutu Jehoiakin thaosou Judah hi veo souloure.

²Ana Zedekiah moa puhvei peikho maitao moyuma maikhe maitao nou ahi paopeiyu MAPAO vei chipao sü mailia louche more.

³Veo Zedekiah nou Shelemiah nahpoutu Jehukal, ae Maaseiah nahpoutu napao Zephaniah ye ahi seive tyahrü donou Etao Ramai MAPAO hinou veachi paopeio tea paoe.

⁴Süphaki Eye hukhaki hi thoumo hie, südonou Enou lahdo soua maikhe mai hi takou takhe-a nou buhie.

⁵Pharaoh veo vei reihmaitao nou Ejipt hinou tapare touyu ko hai choulouyu phaki, Jerusalem hi reih huloulai tea buyu Babilon maivei reihmaitao sü dakhai tare.

⁶Süthaisü Israel maivei Ramai MAPAO nou Zedekiah hi haibüa paopeio tea ahi paoe, “Ejipt maivei reihmaitao nou neye soukhare donou tapare, ana puletao hai lah ki hi dakhai ta-a bailai.

⁸Süthaisü Babilon mainou dakhaive nuhdu hai nasü reih hulou poloua bailai ae meidei bailai.

⁹MAPAO Enou neletao hisü paopi peiwe, süolouzü Babilon mainou dakhai velai moe tea lah neletaoye lawuso, daiolouzü puletao hai dakhaive vuzülai.

¹⁰Hakinou neletao nou Babilon reihmai hrülai jünou reih veiloure touyuma, zhizhu khaitoua puletao vei sahpao hinou dazüa buyu maitao nou tashuloua nuhdu hai nasü meidei laiwulai.”

¹¹Ejipt maivei reihmaitao nou takouyu donou Babilon maivei reihmaitao sü Jerusalem hinou dakhai tare.

¹²Südonou Enou Jerusalem sü thaokhaiwua avei kihikhamai vei navei khesü pore donou Benjamin teidei hi vetare.

¹³Ana Enou Benjamin vei Robomü hi velouyu phaki, reihkhao soua buyu peikhomai ali Hananiah tyao, Shelemiah nahpoutu Irijah nou Eye nuchao loure ae haibüa paoe, “Ne hai Babilon mai hinou tutare!”

¹⁴Enou chila peie, “Sükumoe, E Babilon mai hinou tuta moe.” Ana Irijah nou achi sü keipei moa Eye nüloua peikho maitao hi savere.

¹⁵Puletao nou lekha sholoua Eye dapeio, ae rü-apeio Jonathan ki hinou bekhaio tea kharochi peire, daiolouzü puh ki hai hukhaki souwure.

¹⁶Eye dei khevai hinou teithe taoli hai khaipeie.

¹⁷Veo Zedekiah nou maiye seive Eye saloue, ae puhnou kheikhei soua puhvei ki hinou ahi noue, “MAPAO hinou chipao ali-a buhage?” Enou chila peie, “Bue! Neye sü Babilon vei veo bah hi peiwulai.”

¹⁸Süthaisü Enou Veo Zedekiah hi noue, “Enou ne hi moa nevei peikho maitao hi daimah souwua Eye hukhaki hi thouwe?

¹⁹Babilon hi veo nou ne pei hi ae teidei hai hi soureih souloulai moe tea paoyu nevei rachipaola maitao sü daiki bue?

²⁰Oh Puo Veo, Enou paoyu sü keipeio ae Enou khoyu sü zhuvea nou aetou peio. Zhuvea Eye Jonathan vei ki hi seidakhai peiso. Sühi hoyu thaio, E thai-a bailai.”

²¹Südonou Veo Zedekiah nou kharochi peia Eye veo vei ki hinou bekhaiwure. Nuhdu hi raokhao hamo koute, Eye teithe ali hinou raokhao ali peikoute-a Enou sühinou bue.