Read Poumei Naga JEREMIAH 38 Bible Online

JEREMIAH 38 - Poumei Naga bible

JEREMIAH 38

¹Mattan nahpoutu Shephatiah, Pashhur nahpoutu Gedaliah, Shelemiah nahpoutu Jukal, ae Malkhiah nahpoutu Pashhur nou maikhe mai hi Enou MAPAO nou haibüa paowe tea paoyu sü chouloure,

²“Maitaralia nuhdu hinou buyu mai sü soureih hinou moa houzüyu hinou moa sounou ashi hinou thai-a bailai. Ana Babilon mai hi tuho louyu maitao sü hriloulai; puletao vei hrirai hai khailu loulai.”

³MAPAO nou haibüa paowe tea Enou puletao hi paoe, “Enou nuhdu hai nasü Babilon mai hi peiwulai ae puletao nou nuhdu hai nasü poloulai.”

⁴Süthaisü peikho maitao nou veo hisü taho haibüa paoe, “Mai haina hai southa molouzü shire, daiolouzü puhnou haibüa paopeiyu donou nuhdu hai hi buyu soureihmai hrülaiye khuh souha peire, ae nuhdu haina thaowua tayu mai hrülai hia raibütoua soupeire. Puhnou maikhe maiye soukhare donou temore, anou maikhe maiye soushi peia baire.”

⁵Veo Zedekiah nou chila peie, “Puh sü neletao bah hi bua baie, Enou halia neletaoye nulai moe.”

⁶Südonou puletao nou Eye poloua peikho maitao nou vejüa buyu Veo nahpoutu Malkiah vei dzükhao hi rai nou khiloua laithou khaiwure. Dzükhao hisü dzü ha-e, ana konai khaiko bua baie, ae Esü konai hinou leitare.

⁷Jüthou jülakhai toua veo vei ki hinou vah soua buyu Ethiopia puona Ebedmelek nou Eye dzükhao hi laithouwure touyu ko hai chouloure, süphaki veo hai Benjamin vei Rokhubomü hinou chikhai-a nou bue.

⁸Südonou Ebedmelek nou veo hisü taho haibüa paoe,

⁹“Oh puo veo, maikhe mainou rachipaolawo Jeremiah ye dzükhao hi laithouyu sü kaomoe, puh sü thai-a bailai, daiolouzü nuhdu hisü raokhao hazei toure.”

¹⁰Süthaisü veo nou Ebedmelek ye mai asü saloua Eye thaimo jünou dzükhao hinou popalo tea kharochi peie.

¹¹Südonou Ebedmelek nou maitao sü saloua veo vei nakhaiyu kide hinou sabanü shiyu khesü poloua rai hi khiloua ahi laithou peie.

¹²Puhnou sah shiyu nanou abaokao kohi khailo, sükulouzü rai nou Eye zhiwulai moe tea paopeie. Enou sübüa souloue,

¹³ae puletao nou Eye dzükhao hinou paipa peie. Süthaisü Eye reihkhao maivei hukhaki hi khaipeie.

¹⁴Veo Zedekiah nou haithai-a vuli Eye sapoa ve Rathoki hi talouyu bomü asüna hinou haibüa paoe, “Enou ne hi hali noulai, ae chechetou tea ahi paopeio.”

¹⁵Enou chila peie, “Enou ne hi checheyu chi paopei louzü, nenou Eye southa bailai, ae Enou ne hi paodou peiyuma süsü nenou popeilai moe.”

¹⁶Süthaisü Veo Zedekiah nou kheikhei soua ahi haibüa chaachou soua paoe, “Etaoye hrirai peiyu Ramai, hriyu Ramai zhih hinou chaachou soua paowe, süolouzü Enou neye southa khaitoulai moe, moa neye southa nüa buyu maitao bah hi thou peilai moe.”

¹⁷Süthaisü Israel maivei Ramai, Khoukhoulai MAPAO nou haibüa paowe tea Enou Zedekiah hi paoe, “Nenou Babilon veo vei peikho maitao phi hi veloure toulouzü, nevei hrirai hai vupa loulai, ae nuhdu hai nasü meidei hawulai moe, ne alia nevei kihikha maitao vei hrirai hai vupa loulai.

¹⁸Ana nenou Babilon maivei phi hi velou more toulouzü, nuhdu hai nasü Babilon mai bah hi peithouwulai, ae puletao nou hai nasü meideiwulai, alia ne sü turei paloulai moe.”

¹⁹Ana Veo Zedekiah nou haibüa chila peie, “Babilon mai hi tuho buyu Jihudi maitaoye Enou ngaopi-e, Eye puletao vei bah hi thoupeiwua panou souvea shulai.”

²⁰Enou paoe, “Neye puletao vei bah hi thou peilai moe. Enou ne hi MAPAO vei chipao sü züloua baio tea khonüwe, sükulouzü hateitei nou vei-a bailai, ae nevei hrirai sü vupa loulai.

²¹Ana nenou süsü souba louzü MAPAO nou ahi haibüa zho kounou ngaopei khaitoue.

²²Zho kounou Judah hinou buyu naotumai hrülaiye veo vei ki hinou Babilon maivei peikho maitao nou süthaisa-a tapayu sü Enou ngaoe. Puletao nou ta-a lukhu haibüa nou paoe: ‘Veo vei louche kayu samaitao nou puhye sü süthaimah peiwure, ae puletao nou puh jünou veiloure. Chuo puhvei phi sü konai hinou füloure, puhvei samaitao sü puhye thaowua tare.’ ”

²³Süthaisü Enou haibüa paopu peie, “Nevei naotu maitao ae nahmai hrülaiye sü Babilon hi nüpoa tawulai, ae ne sü tureipa loulai moe. Neye sü hukhamai soua Babilon hi veo nou nüpoa talai, alia nuhdu hai nasü meidei laiwulai.”

²⁴Süthaisü Zedekiah nou ahi chila peie, “Ahai nou chi phayu haisü panou mailia süso, ae sükulouzü ne sü kaozhou ashi daolai moe.

²⁵Enou neye chi phayu sü peikho maitao nou chouloure toulouzü, puletao nou ne hi ve daichi paowe tea noulai. Nenou veo hi paoyu veishi sü Etao hi pao louzü Etao nou neye southalai moe tea puletao nou paolai.

²⁶Nenou ahi hukhaki hi seiho panou thaiso tea kho-a baie tea puletao hi pao-a baio.”

²⁷Süthaisü peikho maitao nou ahi tave chi noue, ae Enou puletao hisü veo nou paoyu bütoua paopeie. Puletao nou halia soulou shire, daiolouzü veo ahai nou chi phayu sü mailia choumoe.

²⁸Ae Eye Jerusalem nuhdu polouyu teithe hi koute hukhaki hi khaipeie.