Read Poumei Naga JEREMIAH 39 Bible Online

JEREMIAH 39 - Poumei Naga bible

JEREMIAH 39

¹Zedekiah nou Judah hi vekou louyu po akü vei khouh kirou navasü Babilon hi Veo Nebukhadnezzar nou puhvei reihmai hrülaiye saloua Jerusalem hi reih huloure.

²Zedekiah nou veo soulouyu po kiali, khouh adai vei teithe akü zhou nuhdu vei kivo sü souphe soupho laiwure.

³(Jerusalem polouyu thai, Babilon veo vei peikhomai hrülai nou talou Rokhubomü Toutsü hinou buloure. Mai sütao sü: Nergal Sarezer, Samgar Nebo, Sarsekim, Nergal Sarezer, ae Babilon hi veo vei peikhomai kukhe noupu buloure.)

⁴Veo Zedekiah ae puhvei reihmaitao nou vepa-a buyu khesü zhingaolou khaie, puletao nou tupa loure donou puletao nou veo vei kipei, kivo ahai kohinou robomü buyu nahinou tupaloua Jeriko Deikho hilova tutare.

⁵Ana Babilon vei reihmai nou puletaoye thaihukou Jeriko deikho hinou Zedekiah ye nüloure. Süthaisü puletao nou puhye Veo Nebukhadnezzar hi savere, süphaki puh hai Hamath maivei teidei, Riblah nuhdu hinou bue, ae puh pei hi Nebukhadnezzar nou haibülai touyu chidei soupeie.

⁶Babilon hi veo nou Zedekiah nahpoutu maitaoye Riblah hinou puhvei nghoujü nou southa peie, ae Judah vei peikho maitao-a southawure.

⁷Süthaisü puhnou Zedekiah nghithou sü reila paloua puhye hurai nou phuloua Babilon hi nüpoa tare.

⁸Babilon mainou veo vei ki ae maikhe maitao vei ki khesü meidei laiwure alia Jerusalem vei kivo sü daphe daphore.

⁹Süthaisü reihmai peikhowo Nebuzaradan nou nuhdu hinou shokhaitoua buyu maitao ae puh hi tuveyu maitaoye hukhamai soua Babilon hi nüpoa tare.

¹⁰Puhnou Judah teidei hi touha kayu maitao, ki-lu haliro hayu maitao bah hi Judah teidei sü thaodai khaipeie.

¹¹Ana Veo Nebukhadnezzar nou reihmai peikhowo Nebuzaradan hi haibüa kharochi peie:

¹²“Taho Jeremiah ye phoulo ae puhye zhutou toupeio. Puhye souveaso, ana puhnou jüpayu teitei sü puh hi soupeio.”

¹³Südonou Nebuzaradan, Rabsari hi Nebushazban, Rabmag hinou Nergal-sharezer, ae Babilon veo vei peikho maitao nou

¹⁴Eye reihkhao maivei hukhaki hinou sapa peie. Puletao nou Shaphan tyao, Ahikam nahpoutu Gedaliah ye panou Eye kikoa zhupeire donou soupeie. Südonou Enou maikhe maitaoye koa bue.

¹⁵Enou veo vei reihkhao maivei hukhaki hinou buyu teile hinou MAPAO nou ahi

¹⁶taho Ethiopia puona Ebedmelek hisü Israel maivei Ramai, Khoukhoulai MAPAO nou haibüa paowe tea paopeio, “Enou soulai tea paokhai touyu bütoua Enou soupeilai, Enou nuhdu haina hisü vasayu moanou veahoyu ae kanghiyu sünou pove peilai, ae haitao vepayu sü nenou ngaolai.

¹⁷Ana MAPAO Enou neye vupa peilai, ae neye nenou ngaopiyu maitao bah hi thoupeilai moe.

¹⁸Enou neye panou kaozhou ashi daolai moe, ae neye panou southalai moe. Nenou Eye loucheyu vanou ne sü tureipa loulai. Haisü MAPAO Enou paowe.”