Read Poumei Naga JEREMIAH 42 Bible Online

JEREMIAH 42 - Poumei Naga bible

JEREMIAH 42

¹Süthaisü soureih souyu hi süthai-apei mai hrülai, Kareah nahpoutu Johanan, Hoshaiah nahpoutu Azariah ae mai hrülai nou ahi tave

²haibüa nou paoe, “Etao nou zhuvea nou khoyu nasü soupeio! Etao Ramai MAPAO hi Etaoye panou hriloure donou veachi paokha peio. Nenou ngaowe, süolouzü raichokio Etao hai mai taoli bue, ana chuo mai daotu likhei bua baire.

³Etao vei ludu panou ngaopeire donou ae daisoulai touyu paopeire donou Etao Ramai MAPAO hi veachi paopeio.”

⁴Enou haibüa chila peie, “Neletao nou khoyu thaifüa Enou Etao Ramai MAPAO hi veachi paopeilai, ae puhnou paoyu veishi sü Enou pokukhai timoa neletao hi paongao peilai.”

⁵Süthaisü puletao nou ahi paoe, “Etao Ramai MAPAO nou ne hi Etaoye donou paopeiyu sü Etao nou soumo louzü MAPAO sü panou Etao pei hi checheyu ae louchelou veiyu shaki sü soulo.

⁶Veiyuma moa shiyuma, Etao nou neye veachi paopeio tea khoyu Etao vei Ramai MAPAO chi sü Etao nou zülai. Puh chi zü louyu thaio, hai veishi nou vei-a bailai.”

⁷Teithe kirou thaisü MAPAO nou Eye kea-e;

⁸südonou Enou Kareah nahpoutu Johanan, puhye salaiyu reihmai peikhotao, ae mai kukhe taoye kupove jüloua

⁹puletao hi paoe, “Neletao nou Eye seiho panou veachi paoyu Israel maivei Ramai MAPAO nou haibüa paowe,

¹⁰‘Neletao nou teidei hai hi hrüa bunü louzü, Enou neletaoye soushu peilai, soushi peilai moe; Enou neletaoye shothou peilai, pailai peilai moe. Enou teidei haina hi hakayu ae veahoyu pove peiyu vanou E-a levea shore.

¹¹Südonou chuo Babilon hi veo ye ngaopi puso. Enou neletaoye koa bupeilai, ae Enou neletaoye puh bah hinou vupa peilai.

¹²Daiolouzü maiye zhuvea süyu nasü E-e, Enou puhye panou neletaoye zhuvea peia neletaoye panou lahvei ki hi dakhaive loulai. Haisü MAPAO Enou paowe.’

¹³“Ana Judah thaokhaiwua tayu neletao nou neletao Ramai MAPAO chi züba-a teidei hai hi bulai moe tea paoso. Neletao haibüa paoso, ‘Moe, Etao nou soureih hayu buh, moa soureih souyu pai chou moyu buh, moyuma houzü moyu Ejipt maivei teidei hi hota-a bailai.’ Neletao nou haibüa paolouzü, Khoukhoulai MAPAO, Israel maivei Ramai nou haibüa paoe, ‘Neletao nou Ejipt maivei teidei hi ho hrüta-a bailai toulouzü,

¹⁶neletao nou ngaopia buyu soureih, ae neletao nou piyu touha soha sünou neletaoye thaifü talai, ae neletao hai Ejipt hinou thai-a bailai.

¹⁷Ejipt hi ho hrüa bailai touyu mai hrülai sü soureih hinou, moa touha sohayu hinou moa sounou ashi hinou thaikhai-a bailai. Enou hashi seive peilaiyu hai hinou maili koute-a tureipa loulai moe.’

¹⁸“Israel maivei Ramai MAPAO nou paoe, ‘Enou avei lekha rarou hai Jerusalem maitao hi lapa peiyu büa neletao nou Ejipt hi hota louzü, Enou neletao hia lapa peilai. Neletaoye sü ngaora sholai; maikhe mainou neletaoye ngaoposhu neletao vei zhih hai chaa soua polai, ae neletaoye konü peilai. Neletao nou teidei hai nasü ngaopu loulai moe.’”

¹⁹Enou süthai-a haibüa paopue, “Judah teidei thaokhaiwua tayu maitao hisü MAPAO nou Ejipt hi taso tea paowe. Zhou teithe Enou neletao hi paopi peiyu sü sütou toulo,

²⁰süolouzü neletao nou talai touyu sü thainüa nou ta-a baie. Neletao nou Eye Etao Ramai MAPAO hinou veachi paopeio tea kho-e, ae puhnou kharochi peiyu veishi sü neletao nou soulai tea paohkhaitoue.

²¹Etao Ramai MAPAO nou Eye seive neletao hi paopeiyu khesü chuo neletao nou zübare.

²²Südonou chuo neletao haisü licholo: neletao nou taho hrünüa buyu teidei hinou neletao hai soureih moa houzüyu hinou moa sounou ashi hinou thai-a bailai.”