Read Poumei Naga JEREMIAH 43 Bible Online

JEREMIAH 43 - Poumei Naga bible

JEREMIAH 43

¹MAPAO nou Eye seive maikhe mai hi paopeio touyu chipaotao sü paopei cheyu thaibü,

²Hoshaiah nahpoutu Azariah, Kareah nahpoutu Johanan ae rochiyu maitao nou ahi haibüa paoe, “Ne da-a nou pao-a baie. Etao Ramai MAPAO nou Etaoye Ejipt hi taho hrüso tea neye seive paopei moe.

³Ana Neriah nahpoutu Baruk nou Etaoye ngaobayu hinou neye panou haibüa paopeia baie, sükure toulouzü Babilon mai bah hi Etaoye thoupeiwua panou southawulai moyuma Babilon hi panou nüpoa tare donou soua baie.”

⁴Südonou Johanan moa reihmai peikhoyu maitao alia maikhe maitao nou Judah hi bua baio tea MAPAO nou paoyu chi sü zübare.

⁵Süthaisü Kareah nahpoutu Johanan, ae reihmai peikhoyu maitao nou Judah thaokhaiwua tapayu maitao ae teidei kukhe hinou dakhai veyu mai hrülai:

⁶poutumai, naotumai, veo vei nah naotumai hrülaiye sü saloua Ejipt hi hotare. Reihmai peikhowo Nebuzaradan nou Gedaliah ye panou kiko peire donou shokhai peiyu maitao, Baruk alia Eye noupu puletao nou saloua Ejipt hi hotare.

⁷Puletao nou MAPAO vei kharochi zümoa dousho-a buyu Ejipt maivei Tahpanhes nuhdu hi tare.

⁸Süthaisü MAPAO nou ahi haibüa paoe,

⁹“Chuh dushoyu ali poloua Tahpanhes nuhdu hinou Pharaoh vei veoki hi talouyu ludu hinou daovu peio, ae nenou soua buyu nasü panou Israel maiye zhingaolo.

¹⁰Süthaisü Israel maivei Ramai MAPAO Enou avei kilai Babilon hi Veo Nebukhadnezzar ye buh hai hi save peilai, alia nenou daovu khaitouyu chuh haina phao hinou puhvei vebuh sü soushulai tea puletao hi paopeio.

¹¹Nebukhadnezzar nou Ejipt hi soureih hulou poloulai, ae rahta rahvu hinou thaire maitao sü rahta rahvu hinou thailai, hukhamai soua nüpoa tazü maitao sü nüpoa talai, ae soureih hinou thai züa buyu maitao sü soureih hinou thailai.

¹²Enou Ejipt teidei hi rathoki buyu taosü meideiwulai, ae Babilon hi veo nou puletao vei rahtao sü kamai-a meideilai ae kamai-a puhnou potawulai. Zhaokhomai ali nou puhvei soumaisah sü sousheesha touyu büa Babilon hi veo nou Ejipt maivei teidei sü sousheesha toupeilai, ae puhnou veiloua talai.

¹³Puhnou Ejipt teidei hi Heliopolis nuhdu hinou veisho-a shukhai touyu chuh khesü soushi peilai ae Ejipt maivei rathoki khesü meidei laiwulai.”