Read Poumei Naga JEREMIAH 44 Bible Online

JEREMIAH 44 - Poumei Naga bible

JEREMIAH 44

¹MAPAO nou ahi Ejipt maivei Migdol nuhdu, Tahpenhes, Memphis ae teidei khelova (Pathros) nou buyu nuhdutao hinou hrüyu Jihudimai vanou haibüa paoe.

²Khoukhoulai MAPAO, Israel maivei Ramai nou paoe, “Enou Jerusalem alia Judah vei nuhdu kukhetao soushi khaitouyu teitei sü neletao ngaore. Chukoute-a sütao sü shi-a nou buhie, ae mai linoua sütao hisü hrümo hie.

³Daiolouzü puletao nou vah ashi sü soure ae avei lekha soupa peire. Puletao nou moa puletao vei puopaoh maitao nou tho moyu rah kukhe hi puletao nou posheela peire ae puletao vei kuvah sü soutare.

⁴Enou tobai soumoa neletao hi avei kilai rachipaola maitaoye seive Enou ngaorayu vah haso soupfüso tea paopeie.

⁵Ana neletao nou süsü keipei bare, ae neletao nou rah kukhe hi posheela peia vah ashi soupfüyu khesü thaobare.

⁶Südonou Enou avei lekha rarou nasü Judah vei nuhdutao hi ae Jerusalem vei duvatao hisü lakou peie, ae sütao sü meideilai peie. Sütao sü soushiloua khaiwure ae zhou koute ngaopi shopoa nou buhie.

⁷“Südonou Khoukhoulai MAPAO, Israel maivei Ramai Enou neletao hisü nouwe, süolouzü neletao daisounou haibüa hashi khesü soupfü peia lah neletao hi hakayu ae Judah teidei hinou buyu naotu poutu, ae nahmaitao tousü panou lahvei teidei thaowua tawe?

⁸Daisounou neletao nou ve hrüa buyu Ejipt teidei hai hinou rah kukheye posheela peia bashara khesü tho-a avei lekha soupa peiwe? Neletao lah neletaoye soushi loulai ae deiphao hi tyahrü hrülaiye panou neletaoye ngaora-a neletao vei zhih sü panou chaa soua pore donou vah ashi hai khesü soupfüvu?

⁹Neletao vei puopaoh, Judah hi vemaitao ae vemai pfütao, neletao alia neletao vei maipfü nahmaitao nou Judah nuhdutao hinou ae Jerusalem vei duvatao hinou vah ashi soupfü khaitouyu khesü neletao nou ngairevu?

¹⁰Zhou koute neletao nou tainou soua hrüloumo hie. Neletao nou Eye tsükhou moe, moyuma Enou neletao vei puopaoh maitao hi peikhai touyu chikha thaifüa hrülou moe.

¹¹“Südonou chuo Khoukhoulai MAPAO, Israel maivei Ramai Enou Judah veishi sü souhare donou azhu sü neletao hi pfüa nou reivelai.

¹²Shokhai toua buyu Judah maitao, Ejipt hinou taho hrüa bailai tea lela khaitouyu maitaoye souhakhai toumo koute Enou puletaoye zhulai. Taidu sümoa puletao mai hrülai sü Ejipt hinou souhawulai; puletaoye sü soureih hinou moa touha sohayu hinou pa thailai. Puletaoye maikhe mai panou ngaora shoyu soupeilai, ae maikhe mai panou puletaoye konüa puletao vei zhih sü chaa soua polai.

¹³Enou Jerusalem ye soureih, touha sohayu ae sounou ashi sünou tudee peiyu büa Ejipt hi taho hrütayu maitaoye sü tudee peilai.

¹⁴Shokhai toua buyu Judah maitao, Ejipt hi taho hrütayu mailia panou turei paloua hrilai moe. Puletao mai ali koutea puletao nou jüpa-a buyu Judah hisü dakhai veloulai moe, shetumai daotu likhei dakhai veloua bailai.”

¹⁵Süthaisü puletao chapfü maitao nou rah kukhe hi posheela peiyu süa buyu poutu mai hrülai, ae sühinou la-a buyu naotumai hrülai, alia Ejipt vei teidei khelova nou hrüa buyu Israel mai hrülai nou ahi haibüa paoe,

¹⁶“Ne nou MAPAO vei zhih hinou Etao hi paoyu chipao khesü Etao nou kei peilai moe.

¹⁷Etao nou soulai tea paokhai touyu veishi sü Etao nou soupfüa bailai. Etao vei rahpfüpai, Rakiva Vepfüpai hisü Etao vei puopaoh maitao, vemaitao ae süthai-apei maitao nou Judah nuhdutao hinou ae Jerusalem hinou soupfüyu büa Etao nou poukai nüvei sü meidei peilai, ae puh hi zhaoh nghoupeilai. Sübüa soupfüa buyu teile hio Etao hai touso hamoe, ae haveishi hinou veahoyu daomoa kaozhou vei-a bubaie.

¹⁸Ana Etao nou Rakiva Vepfüpai hi posheela sü peimo khaie, ae zhaoh nghoupei mokhaie, Etao sü veaho tare, ae Etao vei maitao hai soureih hinou thaitare alia touha soha tare.”

¹⁹Naotu maitao nou paopue, “Etao nou raokhao hai Rakiva Rahpfüpai zhurai hinou khaoyu, honapai hi poukai nüvei meidei peiyu, ae zhaoh nghou peiyu khesü Etao vei maipuo maitao-a aetou baie.”

²⁰Süthaisü haibüa ahi chila peiyu naotu poutumai hrülai hi Enou paoe,

²¹“Neletao nou, neletao vei vemaitao ae süthai-apei maitao nou Judah nuhdutao hinou ae Jerusalem duvatao hinou poukai nüvei meideia posheela peiyu khesü MAPAO nou sümoe, moyuma puhnou sükhesü ngaire tea neletao nou tsüchowu?

²²Neletao nou vah ashi ae ngaorayu vah souyu khesü MAPAO nou healou hore, südonou zhou teithe hai neletao vei teidei sü soushi khaiwua panou mai liro hrümore, para tare, ae chaa ngaoyu teidei ali soutare.

²³Neletao hi haibüa veahoyu veyu khesü neletao nou rah kukhe hi poukai nüvei meidei peia MAPAO nou neletao hi chikha peiyu khesü zümoyu vanou vepawe.”

²⁴Enou Ejipt teidei hi ho hrütayu Judah maitao, matsü soua naotu maitao hi Israel maivei Ramai MAPAO nou paoyu chipao khesü paopeie, “Neletao ae neletao vei maipfü maitao noupu Rakiva Rapfüpai ye poukai nüvei meidei peilai ae zhaoh nghou peilai tea honapai hi chaachou soua paohwure. Süsü veishore, neletao nou paohkhai touyu thaifüa soupeio!

²⁶Ana MAPAO Enou Ejipt hinou hrüyu Israel maitao hi khouko bushoyu avei zhih hinou chaachou soukhai touyu nasü keilo: neletaoye panou azhih kua haibüa chaachou sü soupukhai toulai moe: ‘Hriyu Ramai MAPAO zhih hinou chaachou souwe!’

²⁷Enou neletaoye panou savapa moa haka tare donou zhua bulai. Neletao hai hakata khaimo koute neletaoye panou soureih hinou moa sounou ashi hinou thaikhai toulai.

²⁸Ana mai daotuli hai athai hinou tureipa loulai, ae puletaoye panou Ejipt hinou Judah hi dakhaive loulai. Süthaisü shokhai toua buyu maitao nou thaovei chipao nou cheche-e, neletao vei nouho moa avei chipao nou cheche-e touyu sü süloulai.

²⁹MAPAO Enou neletaoye teidei hai hinou tudee peilai ae kanghi tayu sü neletao hi pove peilai tea Enou paohkhai touyu sü cheche-a vepare touyu shee sü neletao hi peilai.

³⁰Enou Judah hi Veo Zedekiah ye puhnou ngaoba-a puhye southalai tea phouyu Babilon hi Veo Nebukhadnezzar bah hi thoupeiyu büa Ejipt hi Veo Hophra ye puhye southa nüa phouyu ngaoba maitao bah hi thoupeiwulai.”