Read Poumei Naga JEREMIAH 48 Bible Online

JEREMIAH 48 - Poumei Naga bible

JEREMIAH 48

¹Moab mai vanou Khoukhoulai MAPAO nou haibüa paoe: “Nebo hai daizhou koute veade sarou— puletao vei nuhdu khesü soushi souhawure! Kiriathaim sü haongu soupeiwua potare; puhvei reihkhaobu khesü soupho laire, ae maitaoye sü hraongu soupeire.

²Moab mainou zhih tayu sü hatare. Heshbon sü ngaoba mainou poloure, ae Moab tyahrü sü souhare donou shodo souloure. Voyu maivei nuhdu nasü panou zei tea bua bailai; reihmaitao nou hai hisü tapoa nou loulai.

³Horonaim maitao nou shusoua krayu sü kei khaio, ‘Taidayu ae Soukanghiyu nou phouloure!’

⁴“Moab sü soushiwure; nahmai nou krayu pai sü kei khaio.

⁵Puletao nou Luhith hi kra hohopoa takheyu pai sü kei khaio, Horonaim hi dopfüa krapoa nou kouyu pai sü kei khaio.

⁶‘Tutalo! Lah neletaoye vupalo!’ tea puletao nou paoe. ‘Radeiki hi rheisüh bülo!’

⁷“Moab, neletao sü lah neletao vei khouko ae kini nou louche loure, ana chuo neletao sü pah shiyu ngaolai; neletao vei rah Khemosh sü puhvei napao maitao ae veo nahpoutu maitao noupu koa hukhamai soua vakou nüpoa talaire.

⁸Nuhdu ali koutea soushi moa nou shokhai peilai moe; deikho deirao teitei noupu koa soushi khaiwulai. Haisü MAPAO Enou paowe.

⁹Moab maiye shouh soupeio, daiolouzü puh sü zhaota laire. Honapai vei nuhdu khesü soushikhai toulai, ae sütao hisü mai lia hrüpulai moe.”

¹⁰(MAPAO vei kuvah hai puletao vei tsüle veishi peia soumoyu maisü panou chaa ngaotheo! Soureih souba-a puletao vei khoche pokhai tayu mai sü panou chaa ngaotheo!)

¹¹MAPAO nou paoe, “Moab sü nahle-a bukinou chukoute hai vaphi tea nou hrüe ae vakou nüpoa takhai timoe; puhye sü bvü ali hinou ali hi lada moyu zhaoh büa bubaie. Südonou puhvei kainüvei nasü hatakhai moe.

¹²“Südonou chuo haibüyu teile sü velai, süolouzü zhaoh hai lee hinou lapayu büa Enou Moab ye panou lapare maiye seive peilai. Puletao nou zhaokhou sü lapa khailoua souphe sasalai.

¹³Süthaisü Israel mai nou louche-a buyu Bethel vanou hraongu daoyu büa Moab mai-a puletao vei rah Khemosh vanou hraongu ngaolai.

¹⁴“Moab maitaore, neletao daivanou khoukayu na-e, ae soureih souyu hie souvei kayu nare tea khawe?

¹⁵Moab alia puhvei nuhdu khesü souhalaiwure; puhvei veikayu nahle maitao sü southare. Khoukhoulai MAPAO Enou veo süe, ae haisü Enou paowe.

¹⁶Moab mainou hakatare teile sü ngheire; puhye soushi peire sü thasho-a nou laire.

¹⁷“Tyahrü süna pehao hinou hrüyu maitao, puhvei kathe süyu mai hrülai puhye donou dopfülo. Haibüa paokhaio, ‘Kabüa khouchi sho-a buyu puhvei vebuh sü pepota desa; puhvei kathe ae khouko sü hatare.’

¹⁸Dibon hinou hrüa buyu maitaore, neletao nou khaophu soua buyu buh hinou taokoulo, ae deiphi hinou kou bulo! Daiolouzü Moab ye soushi peikhai touyu maitao nou ne pei hi aetou more; puletao nou nevei reihkhaobu veishi soushi laiwure.

¹⁹Aroer hinou hrüa buyu maitaore, ludu pe kinou la-a nou kholo; tutayu maitao hinou noukhaio, daie vepare touyu khesü puletao hinou noulo.

²⁰‘Moab sü kaodu tare,’ tea puletao nou chila peilai, ‘Puhye donou dopfüa kra peio; puh sü hraongu ngaore. Arnon Reipe sasasü Moab ye soushiwure tea shapao peio!’

²¹“Teidei kuyu hinou deikho-a buyu nuhdu haitao hisü chikuyu teile hai vere: Holon, Jahzah, Mephaath,

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Kerioth, ae Bozrah alia Moab maivei nuhdu veishi hisü tudee peiyu hai vere.

²⁵Moab maivei kai sü dashawure, ae puhvei baokao sü souchare tea MAPAO nou paoe.”

²⁶MAPAO nou paoe, “Moab maiye panou zhaoh sozhilo, daiolouzü puletao nou Eye dure. Moab mainou lah rüpakhai touyu hinou danapoa nou talai, ae maikhe mainou puhye konülai.

²⁷Moab, nenou kabüa Israel maiye konüe touyu sü licho khaio! Nenou puhye sü vomai liye nülouyu büa ngaora-a ne pei sü züe.

²⁸“Moab hinou hrüa buyu maitaore, neletao vei nuhdu khesü thaowua talo! Khao nou lyapei hinou phe soubuyu büa chuhlya hinou ho hrütawo.

²⁹Moab mai hai khaophu soushore! Puletao nou khaophu souyu, zhosouyu, rochiyu, ae lahye veishoa tsüchoyu khesü Enou choure.

³⁰MAPAO Enou puletao vei rochiyu sü süwe. Puletao nou khaophu souyu sü hamako bailai, ae puletao nou haliro soulou hoe.

³¹Südonou Enou Moab mai hrülaiye donou dopfüa kralai, ae Kir Heres maitaoye donou dopfülai.

³²Enou Jazer maitao jünou la-a Sibmah maitaoye donou kralai. Sibmah nuhdu, ne sü darkhabe ali nou puhvei bo hai Athai Zai hi keikouyu büa ae Jazer hi koute keitayu büa bue, ana chuo nevei houki rashithoutao ae nevei darkha shithoutao sü soushiwure.

³³Savayu nasü Moab maivei teidei aveih hinou potawure. Enou darkhadzü süyu buh hinou darkhadzü khesü nuchao laiwure; mailinoua darkhadzü sü sümore ae asah soua mailinoua shusoua ramore.

³⁴“Heshbon ae Elealeh nou shusoua krare, ae puhai nou krayu sü Jahaz hi koutea chouve-e; haisü Zoar hi maitao alia Horonaim ae Eglath Shelishiyah koute hia chouve-e. Nimrim hi reidzü koutea thetare.

³⁵Moab mainou poukai nüvei meidei-a posheela peiyu buh khesü Enou souhalai, ae puletao nou puletao vei rahtao hi posheela peiyu khesü Enou souhawulai. Haisü MAPAO Enou paowe.

³⁶“Südonou Moab maiye donou ae Kir Heres maitaoye donou ale sü thaizhayu mai alinou sha nghouyu büa leveawe, daiolouzü puletao nou kujükhai touyu kini veishi sü hare.

³⁷Daiolouzü puletao mai hrülai nou puletao vei pei ae mümai sü saiwure; puletao mai hrülai nou puletao vei bah vasü zhimü soupa loure ae soukhousah nou banou loure.

³⁸Moab maivei kiphao veishi hinou ae kijü teitei hisü dopfüa krayu khaikho baire, daiolouzü Enou Moab sü mainou jüpamoyu habvü ali dakho laiyu büa dakho peiwure tea MAPAO nou paoe.

³⁹Kabüa haisü petare! Kabüa puletao nou dopfüe! Moab mai sü pah shi-a dakhai tare! Südonou Moab sü puhvei pehao hi hrüyu maitao vei jünü soure, ae puhvei kinapamai hrülai nou ngaopiyu sü soutare.”

⁴⁰Daiolouzü MAPAO nou paoe, “Zhukhaio, tyahrü ali nou Moab maiye sü lüche ali nou shouh topaloua zhaokouyu büa velai,

⁴¹ae puletao vei nuhdutao alia veishoa soukhai touyu reihkhaobu khesü poloulai. Süzhou teithe sü Moab maivei reihmaitao hai naotumai ali nou nah nare phaki ngaopiyu büa ngaopilai.

⁴²Moab sü souhawulai ae tyahrü ali soua bupulai moe, daiolouzü puhnou Eye due.

⁴³Pirayu, deiqulu, ae shorü southou khaitouyu sünou Moab maiye kho-a buloure. Haisü MAPAO nou paoe.

⁴⁴Pirayu sü ngaopi-a tutayu maitao nou deibvü hi deloulai, ae deibvü hinou ngaopa louyu maitao sü shorü soukhai touyu hinou muloulai, daiolouzü MAPAO nou Moab maiye souhare teile sü dade khaire.

⁴⁵Soureih souyu hinou tuta-a buyu maitao nou Veo Sihon nou teile ali hi khasa-a buyu Heshbon nuhdu vei vupa-apei sü phoutare, ana hai nasü meikei-a nou bure. Soureih souyu jüpa-a buyu Moab maivei deichi veishi sü mei nou deihawure.

⁴⁶Moab mai sü daizhou koute veasarou! Khemosh ye tho-a buyu maitaoye sü souhawure, ae puletao vei nahnaotu poutu khesü hukhamai soua nüpoa tare.”

⁴⁷Ana haithai vere teile hiolouzü MAPAO nou Moab maiye sousava peipulai. Haitao veishi hai MAPAO nou Moab mai hi vepalai tea paokhai toue.