Read Poumei Naga JEREMIAH 5 Bible Online

JEREMIAH 5 - Poumei Naga bible

JEREMIAH 5

¹Jerusalem hi maitaore, neletao vei ludu teitei hinou tuhao khaio! Pehao veishi sü zhukhaio! Neletao lah zhulo! Hupobu hia taho phoukhaio! Neletao nou acheche vah soua buyu mai alia Ramai hinou chilee cheche-a hrüyu mai liro ngaomoge? Hakinou neletao nou mai ali koute-a ngaolouzü MAPAO nou Jerusalem sü khaipeilai.

²Neletao nou MAPAO ye thowe tea mü louzü khawe, ana checheyu hrüh hinou hrümoe.

³MAPAO louzü chilee checheyu nasü zhuwe. Puhnou neletaoye dapeie, ana neletao nou süpei moe; Puhnou neletaoye sousasa peie, ana neletao nou sülou moe. Neletao vei tsüle sü khousholou-a mah hinou leda nümore.

⁴Süthaisü Enou paoe, “Puletao hai touhayu mai baie, ae voyu maitao baie; daiolouzü puletao nou MAPAO vei ludu nasü sümoe, ae Ramai nou puletaoye panou soupfü nüyu nasü sülou moe.

⁵Enou khouko buyu maitao hisü velai, ae puletaoye tave chakulai; daiolouzü puletao nou MAPAO vei ludu sü süwe, ae Ramai vei chikhatao sü süwe.” Ana puletao mai hrülai nou MAPAO vei khakhe hi bubare ae puh chi zübare.

⁶Südonou puletaoye sü vaohro hi buyu khaosouveo nou southawulai; radeiki hi buyu lakhaotao nou puletaoye daodesasa peiwulai, ae shirakhao nou tapa puletao vei nuhtao hisü rasühaolai. Sübüa nuh hinou tapayu mai taralia sousasa khailai, daiolouzü puletao nou mah souyu hai poulere, ae puletao nou vu taoli hai Ramai hinou turei tare.

⁷MAPAO nou haibüa noue, “Kabüa Enou avei maitao mah sü khaipeilai? Puletao nou Eye thaowure alia cheche moyu rahtaoye tho tare. Enou avei maitaoye sü sou pouphou peikhai-e, puletao nou khakha vah soutare ae puletao vei teile sü khulou vah souyu hinou souhawure.

⁸Puletao hai chipa hübo veisho khaitouyu rheipou ali büre, mai hrülai nou kinapamai chapfüye thainü loure.

⁹Hai donou E puletaoye tudee zümowu, ae puletao hi E khüngu phouzü movu?

¹⁰Puletao vei darkhabe khesü jülaire donou Enou ngaobamaiye seive peilai, anou puletao mai hrülaiye souhakhai toulai moe. Enou puletaoye panou botao sü vilaiwulai, daiolouzü sütao hai avei moe.

¹¹Daiolouzü Israel alia Judah maitao nou Eye louche peikhai more. Haisü MAPAO Enou paowe.”

¹²MAPAO vei maitao nou puhye malaiwua haibüa paoe, “MAPAO nou halia soulai moe. Hashi lia Etao pei hi velai moe, Etao nou khoche moa tokaayu-a ngaolai moe.”

¹³Rachipaola maitao sü teikhai vita bailai, puletao hi MAPAO vei chipao sü hae. Südonou puletao nou paopayu chitao sü lah puletao pei hi ve-a bailai.

¹⁴Südonou Khoukobu Ramai MAPAO nou paoe, “Jeremiah, puletao nou haibüa paoyu donou zhukhaio, Enou avei chipao sü nevei mü hinou mei ali büa soupeilai, ae puletaoye mei deiyu süü ali büa deiwulai.”

¹⁵Oh Israel maitaore, MAPAO nou kadoushoa buyu tyahrü aliye panou neletao pei hi reih soure donou salaire. Tyahrü süna hai khoushoyu ae daotsümai tyahrü alie; Puletao vei la sü neletao nou sülai moe.

¹⁶Puletao vei voulou poyu maitao hai khouko bushoyu reihmaitaoe ae leshiyu ali-a bumoa neletaoye southawulai.

¹⁷Neletao nou chachi pove khaitouyu thou ae touso khesü puletao nou touloua bailai; neletao vei nah naotu poutu khesü puletao nou southa bailai. Puletao nou neletao vei kikhaorü khesü touloua bailai, alia neletao vei darkhabe ae doushibe tao-a soushi souha bailai. Neletao nou louchesho-a soushu khaitouyu nuhdutao ae bokhatao-a puletao vei reihmai nou soushi bailai.

¹⁸MAPAO nou paoe, “Sükisü, Enou neletao mai hrülaiye souhakhai toulai moe.

¹⁹Enou daidonou haibüa souwe tea puletao nou noulouzü, puletao hi haibüa paopeio, Jeremiah, ‘Neletao nou Eye thaowu-a neletao vei teidei hinou vakou maivei rahye thotayu donou neletaoye panou vakou maivei kuvah soulai.’ ”

²⁰MAPAO nou paoe, “Jakob vei kihikha maitao ae Judah vei maitao hi shapaopeio:

²¹Oh voyu maitao ae tsü hayu maitao, nghithou pfüa ngaomoyu maitao, noubi pfüa choumoyu maitao, soutaosou keilo.

²²Esü MAPAO-e, neletao daisounou Eye pi mowe? Neletao anghoujü hinou daisounou pi-hi moge? Enou venai sü zai dzü panou lapalai more donou teisa vei deirai soua khaipeie. Zaidzü nou hou-a buyuma süna jünou lalai moe, teikhai teirü ashi ve-a sünasü souphe louhoe.

²³Ana neletao louzü, le khousho loure ae khaityare; neletao nou Eye thaowua ahinou tarei tare.

²⁴Enou teile kaovei hinou teirü seive peiyu, pao-hou teile hi teirü peiyu ae po patsü panou chachi loua buyuma Eye tsükhoure donou tsücho moe.

²⁵Neletao vei mah sünou haitao hai porei laiwure, ae neletao vei mah nanou havei khesü pokuwure.

²⁶“Avei maitao hrohinou mai ashimai buloure; raohou muloure donou shorü southouyu mai ali büa puletao nou rüh southou khaitou-a maiye muloure donou da-a bure.

²⁷Raohou thoukhaiyu bvü ali hi raohou nüthou phoukha-a buyu büa puletao vei ki hisü maivei na shaopoa ve phoukha khailoure. Südonou puletao hai khouko buwe ae toungiwe,

²⁸puletao sü hübo veipare ae touso hai veishoa touloure. Puletao vei vah ashi souyu sü akhai hae. Puletao nou pfüpuo hamaitao vei kaozü soupei moe moyuma veahoyu maitao zü zhupei more.

²⁹“Ana MAPAO Enou puletaoye sü haitao donou tudee peilai; tyahrü haina pei hi Enou khüngu phou peilai.

³⁰Ngaopi shoyu ae khukha souyu sü teidei hai hinou vepare:

³¹rachipaola maitao nou acheche chi paomore; napao maitao hai rachipaolayu maitao vei kharochi hinou teidei kho-a baire, ae avei maitao nou haisü jüpa loure. Ana akhai teile veyu kisü puletao nou dai soulai?”