Read Poumei Naga JEREMIAH 51 Bible Online

JEREMIAH 51 - Poumei Naga bible

JEREMIAH 51

¹MAPAO nou paoe, “Enou Babilon ae sühinou hrüa buyu maitaoye soushi peire teikhai sü seive peilai.

²Thouba sü teikhai nou hepoa tayu büa Enou vakou maiye seive Babilon sü souhawulai. Süzhou teithe sü puletaoye kainghou veishi hinou reih huvelai ae puletao vei teidei sü soushiwua panou pata bailai.

³Voulou poyu maiye panou puletao vei voulouthou sü kapayu teile peiso, moyuma puletaoye panou reihna pfüyu teile peiso. Nahle maiye shokhai peiso! Reihmai hrülaiye nou southakhai touo!

⁴Puletao hai puletao vei nuhdu ludu hinou zhizhuloua thai-a bailai.

⁵Israel ae Judah maitao nou Israel maivei Amasheeo, Khoukhoulai Ramai MAPAO apei hi mah souyuma, Enou puletaoye sü thaopei moe.

⁶Babilon hinou tutalo! Neletao hriloure donou tupalo! Babilon maivei mah donou neletaoye panou koa southaso. Puletao nou ngaozü thaifüa Enou puletao pei hisü khüngu phoulaire.

⁷Babilon hai abah hinou sana pai ali büa bue, deiphao mai hrülaiye panou sozhi loure. Tyahrütao nou zhaoh sozhi loure ae puletao sü votare.

⁸Babilon sü lichokhai moa buyu hinou kaodu tare ae hakatare! Puhye donou dopfüa krapeio! Honapai vei zhimü souvei loure donou pou phoupeio, sükulouzü puhye souvei loua malae.

⁹Sühinou hrüa buyu shetumaitao nou paoe, ‘Etao nou Babilon maiye soukha peire donou te-e, ana nalea baire. Chuo honapaiye thaokhaiwua lahvei ki hi dakhai ta-a bailaishe. Ramai nou puhvei khouko veishi nou Babilon sü tudee peire ae honapaiye sü souhakhai touwure.’ ”

¹⁰MAPAO nou paoe, “Avei maitao nou haibüa sha-e, ‘Etao nou kao-e touyu hai MAPAO nou soungao peiwure. Etao Ramai MAPAO nou soupei khaitouyu khesü Etao Jerusalem hi taho paopei laishe.’ ”

¹¹MAPAO nou Media maivei vemaitao tsüle sü souhropeiwure, daiolouzü puhnou Babilon sü souhare donou tsüchodawure. Puhnou puhvei Rathoki soushiyu vanou haibüa khüngu sü phoulai. Soureih soutayu hi peikhowo nou haibüa kharochi peie, “Neletao vei vouloushu pei sü hritsülo! Rü pfülo!

¹²Babilon vei kivo dakhore donou shee soungao peio. Reihkhao maitao khaipulo! Reihmaitao panou da-a kholo!” MAPAO nou Babilon maitao hi soulai tea paokhai touyu khesü soupeiwure.

¹³Rei alao küa buyu ae toungi sho-a buyu teidei, nevei teile sü chere, nevei hrirai sü soudewure.

¹⁴Khoukhoulai MAPAO nou lah puhvei hrümai nou poa chaachou souwure, süolouzü puhnou khazü me dushoyu ali büa mai alao nou save Babilon sü soureih soulai, ae puletao panou veilouyu reihvo sü soulai.

¹⁵MAPAO nou teidei sü puhvei khouko nou soupeie; puhvei ratsü nou deiphao sü soupeie ae ratei sü paito peie.

¹⁶Puhnou kharochi peikhaie, ratei hi dzü sü rapa-e; puhnou deiphao akhai hinou teihao sü pove peie, ae puhvei na pokhaiyu kide hinou teikhai sü seive peie.

¹⁷Hai khesü ngaoloua maikhe mai hai vo-a baie ae tsü ha-a baiwe; bashara souyu maitaoye sü hraongu soupeiwure, daiolouzü puletao nou souyu rahtao sü cheche moe ae hrirai hae.

¹⁸Puletao hai mu hae ae hako baie; MAPAO nou veyu phaki puletaoye sü souhawulai.

¹⁹Jakob vei Ramai louzü sütao raimoe; puhnou ha teitei soupeie, ae Israel maiye puhvei mai soure donou dopaloue. Khoukhoulai MAPAO touyu sü puhvei zhih-e.

²⁰MAPAO nou paoe, “Babilon, ne sü avei hubao-e, avei reih basei-e. Enou neye tyahrütao ae vedeitao poa daphe dapho peie,

²¹Enou neye panou rheitao ae rhei pfüyu maitaoye soupho rarou peie, rheiluki ae rheiluki pfüyu maitao soupho raroulai peie,

²²naotu poutu maiye southa peie, tsümai ae nahle maiye southa peie, khemainah ae loumaina ye southa peie,

²³zhaokho maitao ae puletao vei zhaotu khesü datha peie, tata maitao ae puletao vei sa-a tatayu rhei khesü southa peie, teidei khomaitao ae peicho maitaoye sousasa peie.”

²⁴MAPAO nou paoe, “Neletao vei nghingao hinou Enou Babilon ae Babilon hinou hrüa buyu maitao hi puletao nou Jerusalem hi vah ashi soukhai touyu paoh khapeiyu sü ngaolai.

²⁵Oh Babilon hi maitaore, neletao hai deiphao veishi soushi peiyu deichi ali büre, ana MAPAO Enou neletaoye haita laire. Enou neletaoye soushi peire donou abah sü thaipalai, ae neletaoye sounakou khaipeilai, alia neletaoye meidei poshu vonai vipeilai.

²⁶Soushi khaitouyu neletao vei teidei hinou chuh ali-a panou poloua ki sü soupulai moe. Neletao hai teisa panou radeiki ali büa bua bailai. Haisü MAPAO Enou paowe.

²⁷“Soureih soure vei shee soungao peio! Tyahrütao ye panou choure donou shabe nghoupeio! Babilon hi soureih huloure donou tyahrütao ye panou soudalo! Puletao pei hi soureih soure donou Ararat, Minni ae Ashkenaz vedeitao hi paopeio. Rhei khesü khazü me dushoyu ali büa pove jülo.

²⁸Tyahrütao ye panou Babilon pei hi soureih soure donou soudalo. Media hi vemaitao, puletao vei peikho maitao ae süthai-apei maitao alia puletaoye koa zhoyu soureih maitaoye panou souda-a bulo.

²⁹MAPAO nou Babilon sü panou mai hrümoa soushi khaiwulai tea tsüchoda khaitouyu nasü soupfüyu donou deiphao sü ngaopi-a nou ngulüre.

³⁰Babilon vei reihmaitao sü soureih soumoa puletao vei ki hinou bure. Puletao hai khuha tare, ae naotumai ali büa bure. Nuhdu vei rokhubomü sü daphe dakhowure, ae ki khesü meideiwure.

³¹Babilon vei veo hisü puhvei nuhdu hai kainghou veishi hinou daphe dapho loure tea kopomaitao nou tobai soumoa tuve pao-a nou bure.

³²Ngaoba mainou rei tachoyu ludu sü poloure ae reihkhaobu khesü meidei laiwure. Babilon maivei reihmaitao sü choha zeitoua ngaopi-a nou bure.

³³Thasho-a nou ngaoba mainou puletaoye sü soudeloua thaibu hinou thoutaiyu büa taide peilaire. Haisü Khoukhoulai MAPAO, Israel maivei Ramai Enou paowe.”

³⁴Babilon hi veo nou Jerusalem sü soude laipeie ae puhnou touloure. Puhnou nuhdu nasü dzübvü ali büa sousakhai peie; khaosou ali büa puhnou zhaoloure. Puhnou jüpayu veishi poloure ae nakukhe taosü poshilai peie.

³⁵Zion hi maitaoye panou haibüa paokhaio, “Babilon mainou Etaoye taidayu ae southayu mah khesü panou puletao vei pei vetheo.” Jerusalem maiye panou haibüa paolo, “Etao nou veahoyu hai sü panou Babilon mai hi vetheo!”

³⁶Südonou MAPAO nou Jerusalem mai hi paoe, “Enou neye soukha peilai ae nevei khüngu sü phoupeilai. Enou Babilon maivei dzünghou dzüla khesü southe peilai alia puletao vei rei khesü panou theta-a bailai.

³⁷Babilon teidei sü soushi khaiwulai ae rekhaona panou hrüyu buh soulai. Haisü panou ngaopi shoyu buh ali soupeilai; mailia panou hrülai moe, alia süna ngaoyu mai hrülai nou ngaopi sholai.

³⁸Babilon mainou souveo büa ralai, ae khaotoutu büa ralai.

³⁹Puletao hai dutounü moge? Enou puletaoye donou khonüh ali souda peilai, ae puletaoye panou touzhi sozhi loua asah soulai. Süthaisü puletaoye panou zhitalai, ae puletaoye panou kaishupu khaitoulai moe.

⁴⁰Enou puletaoye zhaotu ae nghitu büa dathayu buh hi saho datha peilai. Haisü MAPAO Enou paowe.”

⁴¹MAPAO nou Babilon vanou haibüa paoe, “Kabüa deiphao mai hrülai nou paosho-a buyu nuhdu nasü mainou poloua baidesa! Babilon sü daidosou tyahrütao nou ngaopi shoyu buh ali soubairesa!

⁴²Zai dzü nou nghoupa Babilon sü holoure.

⁴³Puhvei nuhdu khesü radeiki ali büa dzü liro ha-a ngaopi shoyu buh ali soutare, ae mailia hrümore ae mailinoua veihao soua tamore.

⁴⁴Enou Babilon maivei Bel rahye sü tudee peilai, ae puhnou maivei vaolouyu na khesü poloulai. Tyahrütao nou puhye sü thopulai moe. “Babilon vei kivo sü pepo tare.

⁴⁵Israel maitaore, sühinou tuvai talo! Hriloure donou avei lekha rarou hinou turei palo.

⁴⁶Neletao nou cheche moyu ko khesü chouloua chathai taso moyuma ngaopiso. Po patsü sü cheche moyu ko — teidei hi taidayu ae vemai ali nou veo ali pei hi soureih soushe touyu ko khesü choulai.

⁴⁷Südonou Enou Babilon maivei basharatao pei hi tudee laiyu teile sü velaire. Teidei veishi nou pa hraongu ngaolai, ae mai hrülaiye sü southakhai touwulai.

⁴⁸Reilova nou buyu maitao nou tave Babilon ye souha peiyu phaki deiphao hi buyu ae rateiva nou buyu na veishi nou asah soua shalai.

⁴⁹Babilon mainou deiphao mai hrülaiye southayu vanou, ae chuo puhnou Israel mai taoliye southayu donou puh sü kaodu talai. Haisü MAPAO Enou paowe.”

⁵⁰MAPAO nou Babilon hinou buyu puhvei maitao hi paoe, “Neletao hai athai hinou tureipa loure! Chuo talo, chaokhaiso! Neletao hai lahvei teidei hinou dousho-a buyuma, neletao vei MAPAO Eye licholo, ae Jerusalem sü licholo.

⁵¹Neletao nou haibüa paoe, ‘Etao hai chaa ngaore ae hraongu ngaore; Etao sü souloure khouko hazei toure, daiolouzü vakou maitao nou sheeyu buh Rathoki sü poloure.’

⁵²Südonou Enou Babilon maivei bashara taoye tudeere teile sü velaire tea paowe, ae zhizhu khaitouyu maitao nou teidei veishi hinou lüpoa nou bulai.

⁵³Babilon mainou deichi kushoyu hi taopaloua reihkhaobu souloua buyuma, Enou puletaoye souha peire maiye sü seive peilai. Haisü MAPAO Enou paowe.”

⁵⁴MAPAO nou paoe, “Babilon maitao nou krayu pai sü keikhaio, puletao vei teidei soushi khaiyu donou dopfüa buyu pai sü keikhaio.

⁵⁵Enou Babilon sü souhawulai ae panou pai kho lia choumoa zei tea pokhaiwulai. Soureih maitao nou zaidzü nghouyu büa velai, ae shura soua reih huloulai.

⁵⁶Puletao nou Babilon ye souhare donou velai; puhvei soureih maitao sü nüloure, puletao vei voulou khesü soucha peiwure. E hai vah ashi souyu maitaoye tudee peiyu Ramai nasüe, ae Enou Babilon mainou ngaozü thaifüa soupeilai.

⁵⁷Enou puhvei peikho maitaoye panou zhaoh sozhi loulai— tsüveiyu maitao, süthai-apei maitao ae reihmaitao. Puletao nou zhitalai ae kaishupu khaitoulai moe. Haisü veo, Enou paowe, E sü Khoukhoulai MAPAO süe.

⁵⁸Khousho-a soukhai touyu Babilon vei kivo khesü deiphi hi dakho kouwulai, ae kusho-a soukhai touyu reihkhaobu khesü meidei laiwulai. Maikhe mainou terou poa soukhai touyu vah khesü hamako bailai; sütao sü meikei vita-a bailai. Haisü Khoukhoulai MAPAO Enou paowe.”

⁵⁹Mahseiah tyao, Neriah nahpoutu Seraiah nou Veo Zedekiah vei natao peikhowo sü soue. Zedekiah nou vekou louyu po adai kousü, puhnou Babilon hi Seraiah ye koa ta-e, ae Enou puh hi rachi daotu hai paopeio tea paodou peie.

⁶⁰Babilon pei hi hashi vepare teitei sü Enou larübvü hi rüthou khaipeie.

⁶¹Enou Seraiah hi paoe, “Nenou Babilon hi velouzü, rükhai touyu haitao teitei hai maikhe maiye panou chouloure donou phoungao peio,

⁶²ae haibüa paopeio, ‘Oh MAPAOwo, nenou teidei hai nasü soushiwulai, sübüa hrikhaona aliro panou bulai moe, mai moyuma kikhaorü ali-a hrülai moe, ae haisü radeiki ali büa panou teisa bua bailai tea paopei khaitoue.’

⁶³Seraiah, nenou larübvü nasü maikhe mai hi phoungao peiche louzü, larübvü nasü chuh ali koa khipa loua Euphratis rei hi laithouo,

⁶⁴ae haibüa paopeio, ‘Babilon sü haibüa nou vepalai — puhsü leita-a bailai, phaopa pulai moe, daiolouzü MAPAO nou Babilon hisü hakayu hai pove peilai.’ ” Jeremiah vei chipao sü hai hinou akhai soure.