Read Poumei Naga JEREMIAH 52 Bible Online

JEREMIAH 52 - Poumei Naga bible

JEREMIAH 52

¹Zedekiah nou po kaili payu phaki Judah hi vekou loue, ae puhnou Jerusalem hinou po kiali hai veo soue. Puh pfü zhih sü Hamutal toue, ae honapai hai Jeremiah nah naotupai-e, Libnah nuhdu hinou hrüe.

²Puhnou Veo Jehoakim bütoua MAPAO vei nghingao hinou mahmo khesü soure.

³MAPAO nou Jerusalem ae Judah maitao pei hi rarou sholoua puhnou puletaoye sü puhvei nghingao hinou souhawure. Zedekiah nou Babilon hi Veo Nebukhadnezzar vei khakhe hi buba-a khaitya pare,

⁴südonou Nebukhadnezzar nou puhvei reihmaitao saloua Zedekiah nou vekou louyu po akü vei khouh kirou vei teithe kirou zhou Jerusalem hisü reih huloure. Puletao nou nuhdu vei pehao veishi hinou fühao souloua kholoure,

⁵sübüa Zedekiah nou veo souyu po kiali koute hai nuhdu sü sühao-a buloure.

⁶Po süna vei khouh adai, khoukha akü zhou hai tokaa sholoua maikhe mai hai halia toure hare.

⁷Babilon mainou nuhdu sühao poa buyu teile hinou nuhdu vei kivo sü dakho loua reihmai hrülai sü khei nou tupa loure. Puletao nou veo vei kipei, kivo ahai khozho khaitoua buyu rokhubomü hinou tupaloua Jordan vei Deikho hilova tupoa tare.

⁸Ana Babilon maivei reihmaitao nou thaihupoa kou Jeriko deikho nghiyu hinou Veo Zedekiah sü nüloure, ae puhvei reihmai hrülai sü puh hinou tutare.

⁹Süthaisü puhmai nou Zedekiah ye nüpoa Veo Nebukhadnezzar hi sapoa vere, süphaki puh hai Hamath maivei teidei Riblah nuhdu hinou bue, ae sühinou Nebukhadnezzar nou puh pei hi chiku peie.

¹⁰Babilon hi veo nou Zedekiah vei nghoujü hinou puh nahpoutu maitao ae Judah hi peikho maitaoye southa peie.

¹¹Süthaisü puhnou Zedekiah nghithou sü reilapa peiwure, ae puhye hurai nou phuloua Babilon hi sa-a tare. Zedekiah nou Babilon maivei hukhaki hinou thaimo koute bue.

¹²Babilon hi Nebukhadnezzar nou vekou louyu po kiakü vei khouh angou vei khoukha kirou zhou, Babilon veo vei paodou-apeio ae puhvei reihmai peikhowo Nebuzaradan nou Jerusalem hi louloure.

¹³Puhnou Rathoki, veo vei ki, ae Jerusalem hi peikho maitao vei ki khesü meidei laiwure;

¹⁴ae puhvei reihmaitao nou nuhdu vei kivo sü dakho laiwure.

¹⁵Süthaisü Nebuzaradan nou touha kayu maitao, nuhdu hi shokhai toua buyu maitao, vah soulou süyu maitao, ae Babilon veo hi tuveyu maitaoye nüpoa Babilon hi tare.

¹⁶Ana puhnou Judah hi touha kayu maitao, halia hayu maitaoye panou darkha kipei ae dou hi vah soure donou shokhai peie.

¹⁷Babilon maitao nou Rathoki hi southou khaitouyu baosahu vei dekatao ae cholukitao, alia baosahu nou soukhai touyu dzükhao sü dakho sasaloua Babilon hi potare.

¹⁸Puletao nou likhaotao, poukai nüvei poa meideiyu bvütao, reikhaotao, ae baosahu nou Rathoki hi poa vah soure donou soukhai touyu na veishi sü poa takhai toure.

¹⁹Puletao nou sana ae shahu nou soukhai touyu na teitei: khaosao taitya, meithou pore khaotao, posheelayu phaki souzhe thoure bvütao, poukai nüvei thouyu khaotao, posheelabu hinou vonai vethouyu bvütao, meivabvü khaibutao, ae poa zhaoh nghoupeiyu bvütao teitei poa takhai toure.

²⁰Veo Solomon nou Rathoki hi poa vah soure donou baosahu nou soupeikhai touyu natao — deka ahai, chokarütao, dushoyu dzükhao, ae süna khe hinou buyu chode kiahai — sütao hai sühleyu donou doulou more.

²¹Deka ahai sü raibütou toue: ali nou mitar 8 kue ae mitar 5.3 haohrü toue. Haisü khevai hai chawe, ae sünavei shouyu nou milimitar 75 bue. Deka süna ahai pei hisü baosahu nou mitar 2.2 kua nou soupa khaitoue, ae süpehao veishi hisü vajüshithou zhairai daothou khaitoue, sütao-a baosahu nou soukhai toue.

²³Deka sühai vei peitao hisü vajüshithou kaihli daothou peikhai toue, ae deiphi hinou zhuyu phaki vajüshithou raiküarou hai zhingaowe.

²⁴Süpei hinou, reihmai peikhowo Nebuzaradan nou Napao Peicha Seraiah, puh khe hinou buyu napao Zephaniah, ae rathoki hinou peikhoyu mai asü noupu hukhamai soua nüpoa tare.

²⁵Nuhdu hinou buyu reihmai peikhowo, veo vei paodou-apei mai anai, reihmai peikhowo vei soukha-apeio, puhnou reihmaitao vei larü sü rüpeiwe, ae matsüyu kukhe mai rairou noupu hukhamai soua nüpoa tare.

²⁶Nebuzaradan nou puletaoye sü nüpoa Babilon hi veo nou buyu Riblah nuhdu hisü save-e.

²⁷Babilon hi veo nou puletaoye sü Hamath maivei teidei, Riblah nuhdu hinou southawure. Sübüa Judah sü vakou maivei teidei hi nüpoa tare.

²⁸Nebukhadnezzar nou vekou louyu po anai kou, puhnou hukhamai soua nüpoa tayu hai mai 3,023;

²⁹puhnou vekou louyu po kiacha kousü Jerusalem hinou mai 832 nüpoa ta-e;

³⁰ae po kaisü kousü, Nebuzaradan nou mai 745 hai hukhamai soua nüpoa ta-e. Sütao teitei hai mai 4600.

³¹Evilmerodak nou Babilon hi pa vekou louyu phaki, puhnou Judah hi veo Jehoiakin ye zhuvea peia puhye hukhaki hinou popa peie. Haisü Jehoiakin ye hukhamai soua nüpoa tayu po shianai vei khouh kiahai vei teithe kaingou zhou-e.

³²Evilmerodak nou puhye zhuvea leshi peie ae Babilon hi puhye koa hukhamai soua nüpoa veyu vemai kukhe jünou kupua nou tsükhou peie.

³³Südonou Jehoiakin nou puhvei hukhamai vei sabanü sü phawua veo vei tovaibu hinou puh thaimo koute hai veo ye koa touso zho-e.

³⁴Babilon hi veo nou puh thaimo koute hai, teithetsü puhnou molouzü shiyu na khesü puh hi peie.