Read Poumei Naga JEREMIAH 6 Bible Online

JEREMIAH 6 - Poumei Naga bible

JEREMIAH 6

¹Benjamin maitaore, khailupa loure donou Jerusalem hinou tupa lourawo! Tekoa hinou shabe sü houpei khaio ae Beth Hakherem hinou shi loure meifü sü soupa peikhaio. Daiolouzü reikou nou souka soushi peire nasü laire.

²Zion nuhdu nasü zhai veishoa nou bue, ana souha bailai;

³vemaitao nou puletao vei reihmaiye sa-a sühinou fühao soua bulai. Puletao nou nuhdu pehao hinou sahpao haoloua bulai, ae puletao nou jüpayu buh veishi hisü nou fühao souloua bulai.

⁴Puletao nou haibüa paolai, “Jerusalem hisü reih huloure donou tudalo! Tashulo, Etao hea nou reih souloulai.” Ana süthaisü puletao nou paolai, “Etao nalere, teinghi louzhulaire.

⁵Eletao khei nou reih hulou bailaire; Etao nou honapai vei reihkhaobu veishi souhawulai.”

⁶Khoukhoulai MAPAO nou vemaitao hisü süübe vilou-a Jerusalem hi reih huloure donou baibu soulo tea kharochi peie. Puh nou haibüa paoe, “Enou nuhdu hai nasü tudee peilai, daiolouzü hai hisü maiye souvea souhoyu nou pouzhu lere.

⁷Dzükhao ali hi dzü thoukhai touyu büa Jerusalem hisü hashi khaiko nou thoukhai toua bubaie. Taida vayu ae soushi peiyu khaiko chou-a bubaire; sounou souyu, ae zhizhu khaitouyu likhei zhingao-a bua baire.

⁸He Jerusalem hi maitaore, veahoyu haitao ngaoloua ne piyu soulo, sübülou molouzü Enou neletaoye thaowulai; Enou neletao vei nuhdu sü radeiki hi soudathou khaiwulai, ae maiye panou hrülou shiyu teidei ali soupeiwulai.”

⁹Khoukhoulai MAPAO nou ahi haibüa paoe, “Darkhabe hi rashi teitei haikhai toulouyu büa Enou Israel mai hrülaiye souhakhai toulai. Südonou teile bukinou nenou khailu palou süyu maitao sü khailu palo.”

¹⁰Enou chila peie, “Enou pao-a tukha peiyu sü thaonou keipeilai? Zhukhaio puletao noubi sü kaloure ae keibare. Nenou ahi paopeiyu chipao khesü puletao hi paopei khaie konüa baire.

¹¹MAPAOwo, nenou puletao hi rarouyu nasü ale khenou meikei-a bua baire, ae haisü E pfülou hore.” Süthaisü MAPAO nou ahi paoe, “Avei lekha rarou nasü maisou ludu hi buyu nahmaitao pei hi, ae nahle mainou vejüa buyu buh hi lakou peio. Cha ae chapfü maitaoye sü potawulai, tsükhaivu mai koutea shopeilai moe.

¹²Puletao vei ki sü mai kukhe mai hi peia bailai, ae puletao vei dou ae chapfü maitao noupu peiwulai; daiolouzü Enou teidei hai hinou hrüa buyu maitao sü tudee peilai.

¹³Tai-du soumoa mai hrülai nou kaomoyu ludu hinou tounüa viyu sü phou-a baire; rachipaolaiyu maitao ae nahpao maitao koutea maikhe maitao hisü da-a baire.

¹⁴Puletao nou avei maitao zhimü sü hazholia moyu büa poa baire. ‘Veimoa bulukhu hateitei nou vei-a baie,’ tea puletao nou paoe.

¹⁵Puletao nou ngaorayu vah souyu phaki hraoho haomosa? Moe, puletao sü hraokhai toumoe; puletao nou hrao-a pah holou moe. Südonou puletao hai mai kukhe nou kaodu tayu büa kaodu talai. Enou puletaoye tudeeyu phaki, puletao vei akhai soulai. Haisü MAPAO Enou paowe.”

¹⁶MAPAO nou haibüa puhvei maitao hi paoe, “Duva hinou laloua zhukhaio. Daorai maivei ludu nasü noulo, acheche ludu nasü nouloua sühinou talou, sükulouzü neletao sü kaonayu ngaolai.” Ana puletao nou paoe, “Moe, Etaowo sühi talai moe.”

¹⁷Süthaisü MAPAO nou reihkhaomai dopaloua panou paopi peiyu shabe nghouyu pai keire donou khaipeie. Ana puletao nou paoe, “Shabe kho sü Etao nou keilai moe.”

¹⁸Südonou MAPAO nou paoe, “Keilo, tyahrü taore, alia avei maitao hi vepayutao hinou doulo.

¹⁹He deiphao, keikhaio! Puletao nou hashi soupfüyu donou Enou mai haitao pei hisü tudee peilai, daiolouzü puletao nou avei dou-apei sü malaiwure ae avei chipao sü zü bare.

²⁰Sheba hinou poveyu poukaivei ae kadou kounou vusanatao ahi pove peiyu sü poa dai soulai? Puletao nou meidei-a posheelayu moa ratho-a Eye posheela peiyu khesü Enou popeilai moe.

²¹Enou mai haitao sü panou phi süloua kaodu talai. Pfüpuo maitao ae nahmaitao-a thailai, alia samai khamaitao ae kinapamai noupu puletaoye koa thaita bailai.”

²²MAPAO nou paoe, “Reikou teidei hinou hrüyu mai khesü velaire; kadou kounou tyahrü dushoyu ali nou soureih soure donou souda-a bure.

²³Puletao nou voulou ae ngheu polou-a reih soure donou bure. Puletao hai zhaipou shie ae maiye zhuveayu hae. Puletao nou rhei pfüa tayu kho hai zaidzü kho büe. Puletao nou Jerusalem hi soureih huloure donou tuda-a bure.”

²⁴Jerusalem hi maitao nou paoe, “Etao nou ko sü chou loure, Etao bah sü veilealea loure; naotumai ali nou nah nare teile hi khya souyu büa Etao hi veayu sü veloure.

²⁵Dou hisü taho soubaio, moa duva hi tapasuo, daiolouzü ngaobamaitao bah hi khoche bue, ae ngaopiyu sünou holao hailao nou haopo-a buloure.”

²⁶MAPAO nou puhvei maitao hi paoe, “Soukou sah nou baonoulo ae vounai nalo. Alikhei baiyu nahpoutuye donou do-a krayu büa dongai pfülo, daiolouzü soushi peilaiyu nanou neletao pei hi thashoa velaire.

²⁷Jeremiah, hu meidei zhuyu büa avei maitaoye zhai zhukhaio, ae puletao hai dai raisa zhukhaio.

²⁸Puletao mai hrülai nou tsüle khousoua khaityare, baosahu ae hu büa khoushoe. Puletao mai hrülai nou shikhai toure, ae dahrührüyu chi pao-a bubaire.

²⁹Meifü nasü taosho-a nou bure, ana huba taosü küta moe ae hu nasü sousheelou moe. Avei maitaoye souveipuyu hai hamako baire, daiolouzü mai ashi taosü hutalou moe.

³⁰Puletaoye sü komoyu shahu tea kulai, daiolouzü MAPAO Enou puletaoye sü malaiwure.”