Read Poumei Naga DOPFÜYU 4 Bible Online

DOPFÜYU 4 - Poumei Naga bible

DOPFÜYU 4

¹Etao vei sana praivava-a buyu khesü shitare; Rathoki poa nou soukhai touyu chuh khesü duva kinou raroupoa nou bure.

²Zion hi nahle maitao hai sana büa Etaoye donou mutei sho-e, ana chuo puletao hai nailee ali büa baire.

³Lakhao koute-a lah puletao vei toutu sü leshi-a nou kiko peiwe, ana avei maitao hai ostrik rehou büa lahvei nahmaiye leshi peimore.

⁴Puletao vei nahmaitou khesü panou rei-züa nou thaitare; Nahmai khesü mai hinou tosüa nou bure, anou mailia puletaoye sü touso hai peimoe.

⁵Vuli hi touso veikayu nou touso-a buyu maitao hai chuo ludu kinou pouzüa bure; buh-zü veisho-a hrüa buyu maitao hai chuo nghoushi laikhai touyu buh hinou bure.

⁶Avei maitaoye teile daotuli hai Sodom hi hrüa buyu maitao jünou souveapu peiwure, sükhai toumoa Ramai bah hinou veayu sü vedaore.

⁷Etao vei veo nahpoutu maitao hai vüra büa sheesha toue, Puletao vei pfüphao hai veisho-e ae khouko-a busho-e.

⁸Anou chuo puletao vei zhu hai kye jünou teire, maisou vei ludu hia mai linoua puletaoye sü süpei more; Puletao vei hee hai süü büa kirü tare, ae sourao hi lou tyatei touloure.

⁹Na-a nou touha-a khüthayu maitao jünou rai-a soureih hinou thaiyu maitao-a veipure.

¹⁰Avei maitao hi veahoyu veyu hai ngaopi soure; leshisho-a buyu pfü maitao nou lah nahmaiye touso soua khotoure.

¹¹MAPAO nou puhvei lekha rarou veishi hai phapeiwure; Puhnou Zion sü mei shaopeiwure, sünanou beikhei teitei sü meideire.

¹²Ngaobayu maitao moa thaihraiyu maitao nou Jerusalem vei rokhubomü hi talou loure hai deiphao hi vemaitao moyuma deiphao hi hrüyu mai talinoua louche moe.

¹³Ana hai khesü vepare, daiolouzü rachipaola peiyu maitao vei mahmo vanou ae napao maitao nou mahmo souwure. Puletao nou cheche maiye sü southawure.

¹⁴Süthai-apei maitao hai ngheichayu mai büa ludu kinou nghoupoa nou laire, puletao hisü zhe natata poa laiyu donou mailina puletaoye sü deilou shire.

¹⁵Maikhe mainou puletao hisü haibüa paore, “Tavailo! Eye deiso! Neletao hai sheemore!” Südonou puletao hai sühaota-a shetumai ali soutare, ae puletao nou veyu buh veishi hinou mailia puletaoye sü jüpa-a popei more.

¹⁶MAPAO nou puletaoye donou tsücho peimore, puhnou puletaoye sü soupho rarou peiwure. Puhnou Etao vei napao maitao ae süthai-apei maitaoye sü tsükhou peimore.

¹⁷Etaoye soukha peire mai hai hamako soua Etao nou vuzhia nou bua baire, Etaoye khailupa peishulai tea tyahrü ali vei vurei-a nou kho-a bue.

¹⁸Ngaoba maitao nou Etaoye zhi-a nou buloure; Etao hai ludu hi talou shire. Etao vei teile sü chere; akhai soure teithe sü vere.

¹⁹Lüche jünou taveipoa puletao nou Etaoye thaihu loure. Puletao nou Etaoye deichi vanou huloure, Puletao nou Etaoye lichomoa buyu hinou radeiki hinou nüloure.

²⁰Eletao vei hrirai, MAPAO nou dopa peiyu veo sü puletao nou nüloure; ngaobamai taralinou soureih souveyu phaki Etaoye vupa peilousüe tea Etao nou louche-a buyu nasü puletao nou nüloure.

²¹Edom ae Uz teidei hinou hrüa buyu maitaore, asalo ae vasa-a bulou khaio. Neletao hia veahoyu nasü velaire; neletao-a baitoua nou hraongu pfüa talai.

²²Zion hai lah puhvei mahmo vanou veahoyu nasü pfüwe; MAPAO nou Etaoye sü teile sho-a nou hukhamai soua panou vakou bupulai more. Ana oh Edom, MAPAO nou neye sü tudee peilai, puh nou nevei mah khesü popa ngaopeilai.