Read Poumei Naga DOPFÜYU 5 Bible Online

DOPFÜYU 5 - Poumei Naga bible

DOPFÜYU 5

¹Oh MAPAOwo, Etao hi vepayu khesü licho peio. Etaoye zhupeio, ae Etao nou veahoyu khesü zhupeio.

²Etao vei nangi khesü shetu maitao nou poloure; vakou maitao nou Etao vei ki sü thaoloure.

³Ngaobayu maitao nou Etao vei puo maitao hai southa peiwure, ae chuo Etao vei pfü maitao hai mimeapfü soutare.

⁴Etao nou keyu dzü hai muh peita laire, ae süü khesü hrüdei talaire.

⁵Etaoye sü rheisüh moa racho ali büa sa-a vah soure, Etao hai veare, ana Etaoye sü panou chao-a shobare.

⁶Touso ngaotoua hriloure donou Etao hai Ejipt ae Assaria mai hinou taho tosü tare.

⁷Etao vei puopao maitao nou mah souwure, ana puletao hai chuo tare, ae Etao nou puletao vei mahmo donou veahoyu hai ngaore.

⁸Qila maitao nou Etaoye sü tukha sa-a bure, ae Etaoye sü mailinoua puletao vei khouko hinou khailupa peire mai hare.

⁹Etao nou thaihri sümoa touso sü phoutare, daiolouzü maiye southa dathayu maitao nou nuh teidei hisü sühao loure.

¹⁰Houzüa rakiyu donou Etao vei vasou hai hakhoyu thao büa soushore.

¹¹Etao vei chapfü maitao hai Zion Deichi hinou mainou sazü sabu peire; Judah vei nuh hinou hrüa buyu loumainah khesü mainou taitsüpoa saloure.

¹²Etao vei süthai-apei maitao hai nüpoho rai nou daothawure; tsümaitaoye sü tsükhou peimore.

¹³Nahle maitao hai qila mai ali büa panou taitsüsa-a thou shaore; ae nahmaitao hai panou sühshoyu koupo pfüa chaorara nou talouhoa laire.

¹⁴Tsümaitao nou nuhdu vei rokhubomü hisü ve bumore, nahle maitao nou lou sü soumore.

¹⁵Savayu hai Etao vei hümamai hinou hatare; Etao nou asah soupoa choyu thaosü veahoyu nou bua baire.

¹⁶Etao nou khaophu soua buyu khesü aliro hazei toure. Etao nou mah souwure, ae chuo Etao nou veahoyu nasü ngaore.

¹⁷Hai vanou Etao vei tsüle hai souloure, ae nghidzü kouyu donou halia zhingao more.

¹⁸Zion Deichi sü soushiwua sakhai-a bure, ae lakhao khenou nuhdu hisü vasho-a nou tahao baide.

¹⁹Ana oh MAPAOwo, ne sü teisa vei veo süe, ae nenou akhai ha-a nou khosa-a hrülai.

²⁰Ne daisounou Etaoye teile haisho thaokhaiwe? Ne Etaoye lichopu khaipeilai morevu?

²¹Etaoye ne hi sa-a dakhai ve peio, MAPAO! Etaoye sa-a dakhai ve peio. Raichoki büa Etaoye sü souveipu peio.

²²Molouzü Etaoye nenou teisa donou malairevu? Nenou Etaoye rarouyu hai akhai hadou?