Read Poumei Naga EZEKIEL 1 Bible Online

EZEKIEL 1 - Poumei Naga bible

EZEKIEL 1

¹Po kiasü, khouh adai navei khoukha angou zhou Buzi nahpoutu Ezekiel, napao Enou Babilon hi buyu Kebar rei hinou nüpoa tayu Jehudimaiye koa nou bue, ae Enou raki sü houpa Ramai ye zho kounou ngaoe.

²(Süsü veo Jehoiachin ye nüpoa tayu po angou nahi-e.)

³Babilon hi Kebar reipe hinou MAPAO nou Eye chayu paisü Enou choue ae Enou puhvei khouko sü süloue.

⁴Enou rateiva zhukheyu phaki, teikhai teirü shishoyu hai reilova nou lai-a nou zhingao-e, teihao alao buyu hinou teirei vava-a nou bue, ae ratei veishi hai varou-a nou bue. Teipei vava-a buyu hrohinou baosahu zhai büa varou-a nou zhingao-e.

⁵Teikhai teirü shisho-a buyu hrohinou, hrikhaona adai hai mai zhu büa nou Enou zhingao-e,

⁶ana puletao hai khao zhu adaidai pfüwe, ae shouh adaidai pfüe.

⁷Puhmaitao vei phi hai totoua nou bue, ae cho phimou büa puletao phimou pfüwe.

⁸Puletao nou pah adai ae shouh adai pfüyu pei hinou puletao hai mai bah büa shouh khehinou bah adaidai bue.

⁹Puletao vei shouh ahai sü topa alinou aliye daikhai touwe, sübüa kainghou adai buyu bütoua nou bue. Puletao nou buh tarali hi talai touyuma püphao hai reidakhai moa taloua baiwe.

¹⁰Hrikhaona sütao hai zhu adai pfüwe: ngoujülo hai mai zhu pfüe, zhoulova hai souveo pah pfüwe, nalova hai chode pah pfüe, ae thailova hai leche zhu pfüe.

¹¹Shouh ahai hai topa ali nou ali vei shouh deiwe, ae shouh ahai hai puletao vei püphao sü hopoa nou bue.

¹²Hrikhaona sütao hai kainghou chekhei hisü reipoa nou bue, sübüa puletao nou me soua tanüyu buh veishi hisü puletao vei püphao hai dakhai toumoa taloua baiwe.

¹³Hrikhaona sütao hrohinou poa mei phuyu bvü büa bue, ae mei sü thaokhai moa takou takhe-a nou bue. Mei hinou reivava-a nou teipeivavayu sü pawe.

¹⁴Hrikhaona sütao nou teipeivavayu büa takou takhewe.

¹⁵Enou hrikhaona sütao adai hai zhua nou buyu phaki, puletao vei khe hinou lukiphi adai hai dei hi kou dai-a buyu sü zhingao-e.

¹⁶Lukiphi adai hai zhai raibütoua baie, ae sütao hai muteiyu chuh büa nou bue ae lukiphi alili hisü lukiphi chekhei hai southou khaitoue,

¹⁷sübüa lukiphi sü panou holo hailo tarali hia talou süre donou soukhai toue.

¹⁸Lukiphitao poa soukhai touyu süütao vasü ngheithoua bue.

¹⁹Hrikhaona sütao nou tayu chüsü lukiphi tao-a puletaoye koa nou tawe, ae hrikhaonatao nou ratei hi zhaokhe tayu phaki lukiphitao-a koa nou khewe.

²⁰Hrikhaonatao hai puletao nou tanüyu buh teitei hisü ta-a baiwe ae lukiphitao-a hrikhaonataoye koa tawe, daiolouzü hrikhaonatao nou lukiphi sü panou haihi talai touyu hisü taloua baiwe.

²¹Südonou hrikhaonatao tayuma moa chaoyuma moa ratei hi kheyu phaki, lukiphitao-a puletaoye koa tawe.

²²Hrikhaonatao pei hisü reivavayu chuh nou haorüa soukhai touyu bütoua nou bue.

²³Haorüa buyu khehinou hrikhaonatao hai bue, ae hrikhaonatao hai puletao vei shouh ahai sü alinou aliye topa dei-a nou bue, ae puletao vei shouh ahai sü puletao vei püphao sü hopfüa nou bue.

²⁴Puletao nou zhaotayu phaki, puletao vei shouh kho hai zaidzü nghouyu kho büa, reihmai alao nou tayu kho büa ae khoukhoulai Ramai vei pai büa Enou choue. Puletao nou chaoyu phaki, puletao vei shouh sü khailou lou-a baiwe,

²⁵ana puletao vei haorüa buyu pei hinou kho hai pa-a buwe.

²⁶Hrikhaonatao pei hinou haorüa soukhai touyu phaova nou mutei chuh saphir nou soukhai touyu vebuh ali büa nou bue, ae vebuh sühisü mai ali nou buyu büa nou bue.

²⁷Mai süna vei zhai hai baosahu ali mei hinou deipa reivavayu büa nou bue, ae sünavei ava sünou pehao teitei hisü vapoa nou bue,

²⁸ae sühisü rüraipao vei zhusa teitei hai loue. Sünasü MAPAO nou buyu vei ava nasü baire. Enou sünasü ngaolouyu phaki, apei sü pfüa deiphi nakou loure. Süthaisü lapai ali haibüa paoyu Enou chou-e.