Read Poumei Naga EZEKIEL 13 Bible Online

EZEKIEL 13 - Poumei Naga bible

EZEKIEL 13

¹MAPAO nou ahi paoe,

²“Thai-a bailaiyu mainare, Israel maivei rachipaola-apei maitao, lahvei tsüle hinou tsücholoua rachi soua paoyu maitaoye sü vealaire tea paopeio.”

³Ramai MAPAO nou haibüa paoe, “Voyu rachipaola-apei mai haitao hai vealaire! Puletao hai lahnou tsü choloua süsü Ramai hinou zho ngaowe tea paoloue.

⁴Israel maitaore, neletao vei rachipaola-apei maitao hai hamako baie, puletao hai soushikhai touyu nuhdu hinou hrüyu lakhao raibütoua baie.

⁵Puletao nou pepo tayu kivo khesü kho peimoe moa kivo khesü soushupu peimoe, südonou MAPAO vei teithe veyu phaki, Israel mai hai soureih veyu kisü vulouhoa bailai.

⁶Puletao nou zho ngaoyu khesü da-a nou baie, ae rachi paoyu khesü cheche moe. Puletao hai avei chipao paowe tea khawe, ana Enou puletaoye sü seita moe. Anou puletao nou vepalai tea paokhai touyu khesü chechea vepa shulai tea kho-a nou bue.

⁷Enou puletao hisü paoe: Neletao nou ngao-a buyu zho khesü da-a nou baie, ae neletao nou vepalai tea paoyu khesü cheche moe. Neletao nou sütao hai avei chipao-e tea paowe, ana Enou neletaoye sü chaku moe!”

⁸Südonou Ramai MAPAO nou puletao hisü haibüa paoe “Neletao vei chipao khesü da-a baie, ae neletao nou zho ngaoyu khesü cheche moe. Enou neletao pei hisü vamoe.

⁹Da-a nou zho ngaowe tea paoyu maitao ae cheche moa maikhe maiye süthai mah peiyu rachipaola-apei maitao hai Enou tudee peilai-e. Neletao vei maitao nou chidei souyu phaki neletao hai sühi bulai moe; Israel maivei zhih rüthou khaitouyu hisü neletao vei zhih hai bulai moe; neletao hai lah neletao vei teidei hisü dakhai veloulai moe. Süthaisü E hai Ramai MAPAO-e touyu sü neletao nou süloulai.

¹⁰“Rachipaola-apei maitao nou avei maitaoye sü süthai mah peie, ae kaonayu ha-a buyuma alia veimoa buyuma kaona-a baie ae vei-a baie tea puletao nou paopeie. Avei maitao nou kivo khesü veimoa nou khokhai toua baie, ae rachipaola peiyu maitao nou tave naikaa nou sükhesü soukaa khaipeie.

¹¹Rachipaola-apei maitao hisü puletao vei kivo hai kaoduta laire tea paopeio. Enou teikhai teirü ashi sü seive peilai. Reithou nou sütao sü kou deipeilai ae teikhai teirü shishoyu sünou velai.

¹²Kivo sü pepota-a bailai, ae mai hrülai nou naikaa nou napeikhai touyu sü dai-e veiyu bue.”

¹³Ramai MAPAO nou chuo haibüa nou paore: “Avei lekha rarou hinou teikhai teirü ashi ae reithou sü seive kivo sü soushiwulai.

¹⁴Puletao nou naikaa napeikhai touyu kivo khesü Enou souphe soupho sasawulai, ae beikhei sü panou sakhai-a bua bailai. Kivo sütao nou kaokou puletao mai hrülaiye sü southakhai toulai. Süthaisü mai hrülai nou E hai MAPAO-e touyu süloulai.

¹⁵“Kivo ae kivo va hi naikaa napeiyu maitao nou avei lekha rarou nasü süloulai. Süthaisü Enou ne hi kivo ae kivo va hi naikaa napeiyu maitao sü daiki vetare touyu sü paopeilai—

¹⁶Jerusalem hai shi-a buyuma vei-a baie tea paoyu rachipaola peiyu maitao.” Ramai MAPAO nou hai sü paowe.

¹⁷MAPAO nou paoe, “Chuo thai-a bailaiyu mainare, nevei maitao hi da-a nou haibüa vepalai tea paopeiyu naotumaitaoye zhukhaio. Puletaoye Enou aetou moe tea paopeio,

¹⁸ae Ramai MAPAO nou puletao hi haibüa pao-a bue tea paopeio: “Rachipaolayu naotumai taore, neletao hai daizhou koute vealaisa! Neletao nou maikhemai bah hi kheikhupado vei chah khesü rüthou peiwe ae mai jünou khouko veipu loure donou neletao vei pei hisü panou kheikhupado vei sah sü phupfüwe. Neletao hai lah viloure donou avei maitao hinou athai ae ahri khouko nasü polou nüwe.

¹⁹Neletao nou southou bahzü ali ngaolou nüyu vanou ae raokhao daotuli ngaolou nüyu vanou avei maitao nghoujü nou Eye tsükhou moyu vah khesü soupeie. Neletao nou thai zümoa buyu maiye sü southa peie, ae hri zümoa buyu maiye panou hria nou bupeie. Neletao nou avei maitao hi dayu chi khesü paopeia panou puletaoye sü neletaoye louche-a nou bue.”

²⁰Chuo Ramai MAPAO nou haibüa paoe, “Neletao nou athai ae ahri vei khouko sü buloure donou neletao vei bah hi khipüa buyu khesü Enou ngaora-e. Enou sükhesü avei maitao bah hinou polai peilai ae neletao nou khasa-a buyu avei maitaoye sü panou lahdo soupeilai.

²¹Neletao vei sah phupfüa buyu khesü Enou soulai peilai ae avei maitaoye sü panou neletao vei khouko hinou teisa panou lahdo souloure donou tupa loulai. Süthaisü neletao nou E hai MAPAO-e touyu sü süloulai.

²²“Neletao nou dahrührü peia mai aveih maiye sü souchathai peie, ae puletaoye le souvea peie. Neletao nou mai ashi maiye panou vah ashi souyu sü nupei moe, ae puletao vei hrü sü neletao nou vupa peie.

²³Südonou chuo da-a nou zho ngaoyu maitao ae chechemoa vepare khesü paopeia maiye süthaimah peiyu maitao vei teile sü chere. Enou avei maitaoye sü neletao bah hinou vupa loulai, sübüa neletao nou E hai MAPAO-e touyu sü süloulai.”