Read Poumei Naga EZEKIEL 14 Bible Online

EZEKIEL 14 - Poumei Naga bible

EZEKIEL 14

¹Israel maiye süthai peiyu kamai-a nou ahi tave MAPAO vei leli sü kabüwe tea noue.

²Süthaisü MAPAO nou ahi haibüa paoe,

³“Thai-a bailaiyu mainare, mai haitao vei tsüle veishi hai bashara hi peiwure ae bashara sünou puletaoye mah hi süthaithou peiwure. Puletaoye Enou chila peishulai tea puletao hai tsüchovu?

⁴“Chuo puletao hi Ramai MAPAO Enou haibüa nou paowe tea paopeio: Israel mai taralia bashara hi puletao vei tsüle hai peiwua basharatao panou puletaoye mah hi süthaithou peiyu mai talinou rachipaolapeiyu maitao hinou kabülai tea noulouzü, Enou puletao vei chila sü peilai, puletao vei basharatao nou jüpa-a buyu chila khesü Enou peilai.

⁵Bashara sütao nou Israel maiye sü ahi nou sapoa savai nou tare, ana avei chila peiyu sünou puletaoye ahi sapoa dakhai velou shulai tea avei areih hai bue.

⁶“Südonou chuo Israel maitao hi Ramai MAPAO Enou paoyu khesü paopeio: Ngaorayu neletao vei basharatao sü thaokhaiwua tavai talo.

⁷“Israel mai tarali noua moa vakou mainou Israel mai hi velou hrüa buyu mai tarali noua Eye thaokhaiwua basharataoye thotare toulouzü ae puletao nou rachipaola peiyu mai hi tave kabülai tea nou louzü MAPAO Enou puletao vei chila sü peilai.

⁸Enou puhye sü dutalai ae Enou puhye sü shee ali soupeia panou maisouye sü puh chi kulai. Enou puhye sü avei maitao hrohinou popalai peiwulai, sübüa neletaoye panou E hai MAPAO-e touyu sü süloulai.

⁹“Hakinou rachipaola-apei mai ali nou da-a cheche moyu hinou chila peilouzü, süsü MAPAO Enou puhye soupeia baie. Enou puhye sü Israel maitao hrohinou popawulai.

¹⁰Rachipaola peiyu maina-a ae puh hinou ve chi nouyu maina-a Enou raibütoua tudee peilai.

¹¹Israel maitaoye panou Eye thaowua tapu more donou ae puletaoye panou lahye souzhailoua mah sü soupu more donou Enou haibüa soupeilai. Puletao panou avei mai sü soulai ae Enou puletao vei Ramai sü soulai.” Haisü MAPAO Ramai nou paowe.

¹²MAPAO nou ahi paoe,

¹³“Thai-a bailaiyu mainare, teidei ali nou Eye louchemoa mah souta louzü, Enou abah sü lashuloua teidei sühi touso peiyu ludu khesü souhawulai. Enou rahta rahvu sü seive peia panou sühi hrüyu maitao ae kikhaorü khesü raibütoua southawulai.

¹⁴Noha, Danel ae Job hai maitao asü nou teidei sühi hrüa buyuma puletao vei hrü aveih nasünou lah puletao likhi khailupa loua baie.” Ramai MAPAO nou hai sü paowe.

¹⁵“Moyuma Enou rekhaona khesü seive maikhe maiye sü southa bailai, sübüa teidei sühisü mailia panou ve pia bailai,

¹⁶ae teidei sühi mai sütao asü nou hrüa buyuma, Ramai MAPAO E hai hriyu thaifüa, puletao-a lah puletao vei nahmaitao koute-a khailupalou lai moe. Puletao hai lah puletao likhei khailupa loua bailai ae teidei sü hihro vaohro vita-a bailai.

¹⁷“Moyuma Enou teidei sühisü soureih seive peia shishoyu reihbasei sünou maikhe maitao ae kikhaorü khesü southakhai-a bailai,

¹⁸ae mai haitao asü nou teidei sühi hrüa buyuma, Ramai MAPAO E hai hriyu Ramai thaifüa puletao-a puletao vei nahmai khesü khailupa louho-a bailai. Puletao hai lah puletao vei pfüphao likhei khailupa loua bailai ae teidei sü hihro vaoho vita-a bailai.

¹⁹“Hakinou Enou sounou ashi sü avei lekha rarou hinou teidei sühi seive maikhe maitaoye ae kikhaorü khesü southa peiyuma,

²⁰ae teidei sühi Noha, Daniel ae Job nou hrüa buyuma Ramai MAPAO E hai hriyu Ramai thaifüa puletao-a puletao vei nahmai khesü khailupa loulai moe. Puletao vei hrü aveih sünou lah puletao vei pfüzho likhei khailupaloua bailai.”

²¹Ramai MAPAO nou haibüa paowe, “Enou Jerusalem hisü avei shikayu tudee adai sü seive peilai: Soureih, tokaa, rekhaonatao ae sounou ashi souyu, sütao nou mai ae kikhaorütao hai raibütoua souhawulai.

²²Hakinou mai taralinoua thaimoa puhvei nahmaitao hai vupa loure toulouzü, puletao nou ne hi veyu sü zhulo. Puletao hai daizhou koute shiwe touyu sü sülo, ae Enou Jerusalem hi tudee peiyu hai kao-a bai-e touyu sü sülo;

²³süthaisü Enou sou pfüyu teitei hai aveih donou soua baie touyu sü neletao nou süloulai.” Haisü Ramai MAPAO Enou paowe.