Read Poumei Naga EZEKIEL 17 Bible Online

EZEKIEL 17 - Poumei Naga bible

EZEKIEL 17

¹MAPAO nou ahi haibüa nou paoe,

²“Thai bailaiyu mainare, Israel mai hi nada ali paopeio,

³Ramai MAPAO nou puletao hi haibüa paoe tea paopeio: Dushoyu leche ali hai veisho-a nou ae shouh hephapoa Lebanon deichitao hi zhaopoa nou ve-e ae sedar süübe zü sü puhnou taosha loure.

⁴ae puhnou sünasü huha souyu maivei teidei hi pove hupomaivei nuhdu hisü khaipeie.

⁵Süthaisü puhnou süübetou hai Israel maivei teidei hinou poloua poho dei aveih dzü bukouteyu buh hi shothou peie.

⁶Süübetou sünasü lopa loure ae napea tea nou veishoyu darkhabe ali soure. Bo khesü vipoa nou puh hilosü koure ae maa sü thousho-a tsüloure. Darkhabe sü botao ae nghou khenou holoure.

⁷“Dushoyu lüche kukhe ali-a shouh dusho-a ae mai veisho-a nou bue. Ae chuo darkhabe nasü puhvei maa hai puh hilova keipoa nou tare ae puhvei botao-a puh hilova keitare, Puhnou buyu kipei jünou puh hia dzü hai puhye peipu shulai tea puhnou areih sü buloure.

⁸Ana darkhabe nasü dei aveih buh ae dzü veisho-a buyu buh hinou shokhai peiwure, sübüa darkhabe nasü vipaloua nou rashithou hai veishoa shipei-a nou bue.

⁹“Südonou Ramai MAPAO Enou haibüa noue: Leche arai nanou darkhabe nasü maa nou lalai laimowu, ae süübo khesü sousha laiwua panou kita-a bailai mowu? Hai nasü khouko alao loulai moe moyuma dushoyu tyahrü ali nou pailai moyuma pailai lousüe.

¹⁰Ouvai, hai nasü shothou peiwure, ana hriloua vipa lou süvu? Hai nasü sühinou heipalou hoa thaita-a bailaimowu?”

¹¹MAPAO nou ahi haibüa paoe,

¹²Nada hai nasü puletao nou süho sümoe touyu sü noukhaio. Babilon hi veo nou Jerusalem hi tave veoye ae puhvei peikho maitao hai Babilon hi sapoa tave-o tea puletao hi paopeio.

¹³Puhnou veo vei kikhamai ali saloua panou puhvei khakhe hinou bulai tea chaachou soua vo ali souloure. Puhnou tyahrü hinou matsüyu mai hrülai hai hukhamai soua nüpoa tare,

¹⁴daiolouzü puletao nou vo soukhai touyu nasü pfüthowua khaityapa shulai tea nou nüpoa takhai toure.

¹⁵Ana Judah hi veo sünou puhye khaitya Ejipt mai hinou rheitao ae reihmai seive puhye soukha peio tea maiye seiho khotare. Puhnou süsü veilou süwu? Puhnou tupalou süvu? Puhnou veahoyu sü ngaomoa nou vo soukhai touyu nasü pfütho louhoe.

¹⁶Ramai MAPAO nou paoe, “E hai cheche vujünou hriyu thaifüa Judah hi veo sü Babilon hinou ho thailai, daiolouzü puhnou lah Babilon hi veoye koa chaachou soua puhye vebuh hi panou bure donou vo soukhai touyu nasü pfüthowure.

¹⁷Khouko bushoyu Ejipt veo vei reihmaitao-a Babilon mainou reihbu souloua ae deibvü heloa mai alao southare donou reih souyu phaki puhye sü soukha peilou ho-a bailai.

¹⁸Puhnou lah chaachou soukhai touyu nasü souphewure ae vo soukhai touyu nasü püthore. Puhnou hai teitei hai soupfüre, südonou chuo puh sü tupa loulai moe.”

¹⁹Ramai MAPAO nou paoe, “Cheche vuzünou E hai hriyu Ramaiyu thaifüa puhnou avei zhih hinou chaachou soua vo soukhai touyu nasü pfüthouyu donou puhye sü tudee peilai.

²⁰Enou souhuyu maivei besah sü poloua puhye beloulai. Enou puhye sü Babilon hi poho sühinou puhye tudee peilai, daiolouzü puhnou ahi chilee cheche more.

²¹Puhvei veikayu soureih maitao hai reihbu hinou southawulai ae thaimoa tupa louyu maitaoye sü buh veishi hi hupho rarou laiwulai. Süthaisü puhnou MAPAO Enou haisü paowe touyu sü süloulai.”

²²Ramai MAPAO nou haibüa paoe, “Enou kushoyu sedar süübe ali vei peitaoh hinou zülapayu ali sü sousha loulai; Enou sünasü kushoyu deichi ali hi pove shopeilai.

²³Kukayu Israel maivei deichi hi pove shopeilai, Sünasü süübo lapa-a rashithou shiloulai, ae veikayu sedar süübe ali soulai. Raohou tya teitei nou sühisü ve bulai, ae sünavei khe nou baibu soua bulai.

²⁴Teidei sühi buyu süübe teitei nou E hai MAPAO-e touyu sü süloulai. Enou süübe kuyu khesü vilai baiwe, ae süübe taiyu khesü soudu souso peiwe. Enou süübe veisho-a buyu khesü panou kita-a baiwe, ae kirürüa buyu süübe khesü soudaiva peiwe. MAPAO Enou hai sü paowe. Enou soulai tea paokhai touyu khesü Enou soupeilai.”