Read Poumei Naga EZEKIEL 20 Bible Online

EZEKIEL 20 - Poumei Naga bible

EZEKIEL 20

¹Etaoye nüpoa tayu po anai vei khouh angou khoukha kirou zhou Israel maivei süthai-apei mai daotuli nou ahi tave MAPAO vei leli nasü noure donou ve-e ae puletao nou anghoujü nou lou chobu loure.

²Süthaisü MAPAO nou ahi haibüa paoe,

³“Thai bailaiyu mai nare, mai haitao hi Ramai MAPAO nou haibüa paowe tea paopeio: Neletao avei leli nasü noure donou vehomoe? Cheche vujünou E hai hriyu Ramai thaifüa neletaoye panou ahinou halia noulai moe. Haisü Ramai MAPAO Enou paowe.

⁴“Nenou puletao vei chiku peilaiwu? Sükulouzü puletao vei puo maitao nou ngaorayu vah soukhai touyu khesü paongao peio.

⁵Puletao hi avei chipao khesü paopeio. Enou Isreal maiye dolouyu phaki, puletao hi Enou apaopeie. Enou puletaoye Ejipt hinou paongao peie ae haibüa paopeie: E hai neletao vei Ramai nasüe.

⁶Süthaisü Enou puletaoye Ejipt hinou sapaloua Enou puletaoye donou dopakhai touyu teidei aveih, chonaodzü ae laivoudzü nou küa buyu teidei nasü peilai tea paohpeie.

⁷Enou puletao hisü paopeie, süolouzü puletao nou leshi-a buyu bashara khesü polaiwuo, ae cheche moyu Ejipt maivei rah khesü panou neletaoye souzhaiso, daiolouzü E hai neletao vei Ramai MAPAO-e.

⁸Ana puletao nou Eye khaityawe ae avei chi sü keipei bare. Puletao nou puletao vei ngaorayu bashara khesü polai bare ae Ejipt maivei rah khesü tho-a nou bua baire. Südonou puletao pei hi avei lekha rarou nasü puletao nou Ejipt maivei teidei hi bukinou vepeilai tea Enou tsücho-e.

⁹Ana Enou sübüa soupei more, daiolouzü puletao nou koa hrüyu maitao nghoujü nou Enou puletaoye sü Ejipt hinou sapa peilai tea paosüpa peiwure, südonou avei zhih sü panou shimore donou Enou soupei more.

¹⁰“Südonou Enou puletaoye sü Ejipt teidei hinou radeiki hisü sapa peie.

¹¹Enou puletao hi avei kharochi ae chikha khesü peie, sübüa zütouyu mai hai hrilouyu sü ngaoloue.

¹²Ahai koa nou ae-ao soukhai touyu nasü panou licho loure donou ae Enou puletaoye soushee peiwure touyu nasü panou süloure donou Enou puletao hi so teithe reilo tea nou peie.

¹³Ana puletao nou radeiki hinou buyu teile hia Eye khaityawe, puletao nou hriloure avei chikha khesü souphewure ae avei kharochi khesü malaire. Puletao nou avei soteithe nasü souzhaiwure. Puletaoye avei lekha rarou sünou souhawu laire tea Enou tsücho-e.

¹⁴Ana Enou puletao sü souha pei moe, daiolouzü Enou puletaoye Ejipt hinou sapa-a ngaolouyu tyahrü tao nou avei zhih sü tsükhou peilai moe.

¹⁵Südonou Enou radeiki hinou puletaoye panou mai lia Enou puletao hi peilai touyu teidei, chanaodzü ae laivoudzü nou küa buyu teidei hisü salou peilai moe tea chaachou souwure.

¹⁶Enou haibüa chaachou souyu sü daivanou toulouzü puletao nou avei kharochi khesü malaire, avei chikha khesü pfüphere, ae soteithe nasü souzhaiwure, ae puletao nou basharataoye thoyu nanou jüpapu loure.

¹⁷“Ana Enou puletaoye sü zhuvea leshi loure, Enou puletaoye sü radeiki hinou southalai more tea le laloure.

¹⁸Südonou Enou puletao vei nahle maitao hi haibüa paopi peie: Neletao vei puopaoh maitao nou soukhai touyu chikha khesü khaiso, puletao nou hrüyu zhaihrü nasü thaifüso, moyuma basharatao hinou neletao hai lahye souzhai louso.

¹⁹E hai neletao vei Ramai MAPAO-e avei chikhatao ae avei kharochi khesü zülo.

²⁰Soteithe nasü sheeyu teithe ali soua khailo sübüa sünanou ahai koa vo soukhai touyu vei shee soulai, ae sünanou E hai neletao vei Ramai MAPAO nasüe touyu neletaoye panou süloulai.

²¹“Ana khaphao süna-a Eye khaitya-a aro sü zübare. Puletao nou avei chikha khesü pfüthowure, ae avei kharochitao, mai taralia sütao zülouyu mai sü hriloure na hai puletao nou malaire. Puletao nou Soteithe nasü souzhaire. Avei lekha rarou hinou puletaoye radeiki hinou southakhai moe.

²²Ana avei zhih sü Enou Israel maitaoye teidei hinou sapayu ngaolouyu tyahrütao panou ngaophou more donou sübüa Enou soupei more.

²³Südonou radeiki hinou chaachou kukhe ali hai Enou soupue. Enou puletaoye tyahrü veishi hi soupho rarou laiwulai tea chaachou souloue.

²⁴Daivanou haibüa Enou puletao hi soupeie toulouzü, puletao nou avei kharochi khesü zü bare, avei chikha khesü pfüthore. Soteithe sü souzhai khaiwure ae puletao vei puopaoh maitao nou thoyu bashara khesü puletao nou tho tare.

²⁵“Süthaisü Enou puletao hi veimoyu chikha khesü peie ae ahri pove peilou hoyu kharochi khesü peie.

²⁶Enou puletao hi lah puletao vei posheela peiyu sünou souzhai louyu nasü peie ae puletaoye panou puletao vei nahpoutu naraio sü southaloua posheela peiyu sü soupeie. Haibüa nou puletao hi E hai MAPAO-e touyu sü soungao peie.

²⁷“Südonou thai-a bailaiyu mainare, Ramai MAPAO Enou paoyu khesü Israel maitao hi paopeio. Neletao vei puopao maitao nou chilee cheche moyu hrü hrüa Eye haibüa paoshi peie.

²⁸Enou puletao hi peilai tea paohpei khaitouyu teidei hisü puletaoye save thoupeie. Puletao nou kuyu deichitao ae süübe duyu khesü ngaolouyu phaki, neletao nou sütao hi posheela khesü peire. Puletao nou meidei-a posheela peiyu ae thoudzü vei posheela peiyu sünou avei lekha rarou soupa peie.

²⁹Enou puletao hi haibüa noue. Neletao nou kuyu buhtao hi tayu sü dai-e? Südonou puletao nou kuyu buhtao tea zhaodao koute-a kuwe.

³⁰Südonou Israel maitao hi Ramai MAPAO Enou haibüa paowe tea paopeio: Neletao daisounou neletao vei puopaoh maitao nou mah souyu khesü soupuwe ae basharataoye daisounou thaihu tawe?

³¹Zhou koute-a neletao nou puletao bütoua sapeina khesü pei-a nou bue ae lah neletaoye basharatao hi neletao vei nahmai khesü southaloua meidei-a posheela peia souzhai lou nou bue. Sübüa soua buyuma neletao nou ahi tave avei leli nasü nouwe. Ramai MAPAO E hai hriyu Ramai thaifüa neletaoye panou haliro ahinou noulai moe.

³²Neletao hai tyahrü kukhe maitao, süü ae chuhye thoyu maitao büa hrü bailai tea neletao vei tsüle hinou laloure. Ana sükhesü hasou kilia vepalai moe.

³³“Cheche vuzünou Ramai MAPAO E hai hriyu Ramai thaifüa neletaoye avei lekha rarou ae khoushoyu avei bah alia avei khouko sünou khasa-a hrülai.

³⁴Enou neletaoye tyadeitao hi soupho rarou khaitouyu hinou sapoa vejüloua avei lekha ae khouko nasü soungao peilai.

³⁵Enou neletaoye Radeiki vei Tyahrütao hi saveloulai ae sühi sünou neletaoye zhu haohao nou tave chikulai.

³⁶Enou neletao vei puopaoh maitaoye Sinai Radeiki hinou souvea peiyu büa neletaoye souvea peilai” tea Ramai MAPAO nou paoe.

³⁷“Enou neletaoye sü soutaosoua khasa-a hrüloulai ae neletaoye panou avei vo soukhai touyu nasü züa nou hrülai.

³⁸Enou neletaoye khaityayu maitao ae mah souyu maitao hinou povai laiwulai. Puletao nou chu hrüa buyu teidei hinou puletaoye sü polai peilai, ana Enou puletaoye panou Israel maivei teidei hisü dakhaive loulai. Süthaisü puletao nou E hai MAPAO-e touyu sü süloulai”

³⁹Ramai MAPAO nou paoe, “Oh Israel maitaore, chuo neletao nou avei chi zülai moe toulouzü, lah neletao vei jüpa sü soua basharataoye tho tawo. Ana Enou neletao hi paopi peiwe, süolouzü haithai hai neletao nou avei chi sü zülai ae basharatao hi posheela sü peia avei sheeyu zhih sü tsükhou moyu soupulai moe.

⁴⁰Sheeyu avei deichi, kuyu Israel maivei deichi hinou Israel mai hrülai nou Eye tholai. Teidei sühinou neletao nou Eye sheeyu sapeina ae veikayu posheela khesü Eye pove peilai alia Enou neletaoye jüpa-a popeilai.

⁴¹Neletao nou raroupoa buyu teideitao hinou save neletaoye pove jüpeiyu phaki, neletao nou meidei-a posheela peiyu khesü Enou popeilai ae tyahrütao nou E hai sheeyu Ramai-e touyu sü ngaoloulai.

⁴²Enou neletao vei puopaoh maitao hi peilai tea paokhai touyu Israel maivei teidei hi neletaoye sapoa dakhaive peiyu phaki, neletao nou E hai MAPAO-e touyu süloulai.

⁴³Süthaisü neletao nou ngaorayu vah soukhai touyu khesü licho loulai ae kabüa neletao hai lah neletaoye souzhai loue touyu tao-a süloulai. Süthaisü neletao nou vah ashi soukhai touyu donou lah neletaoye ngaoralai.

⁴⁴Enou avei zhih panou shimore donou vah souyu phaki, neletao nou E hai MAPAO-e touyu süloulai, daiolouzü neletao nou mai shiyu ae vah ashi soukhai touyu thaifüa Enou neletaoye tudee peimoe” tea Ramai MAPAO nou paoe.

⁴⁵MAPAO nou ahi haibüa paoe,

⁴⁶“Thai bailaiyu maipure, khelova zhukhaio, khelova maitao-e aetou more tea paopeio ae khelova buyu vaohro hisü rachipaola peikhaio.

⁴⁷Khelova buyu vaohro hisü Ramai MAPAO nou haibüa pao-a nou bure tea paopeio: Zhukhaio! Enou mei sü shaopei laire ae sühi buyu süübe veishi sü deihawulai. Halinoua mei hainasü sounghei lulai moe. Mei hai nasü khelao nou reilova taopoa nou khelai ae mai hrülai nou mei souyu nasü sülai.

⁴⁸Puletao mai hrülai nou mei sünasü MAPAO Enou shaothou peiwe touyu hai ngaolai ae mai linoua sünasü sounghei loulai moe.”

⁴⁹Ana Enou haibüa paoe, “Oh Ramai MAPAO wo, Eye panou sünasü paoso! Mai hrülai nou vamoa Eye hai nada nou pao-a baiwe tea nou pao-a bure.”