Read Poumei Naga EZEKIEL 21 Bible Online

EZEKIEL 21 - Poumei Naga bible

EZEKIEL 21

¹MAPAO nou ahi paoe,

²“Thai bailaiyu maipure, ne pah sü Jerusalem hilova pfüreiloua sühi maikhe mainou ratho-a buyu buh khesü haka talaire tea paopeio ae Israel maivei teidei sü haibüa paopi peio.

³Süolouzü MAPAO Enou haibüa paoa nou bure tea paopeio: E neletaoye ngaobayu mai souta laire. Enou avei khoche sü paipaloua neletao mai hrülaiye mai aveih ashi sümoa southakhai toulai.

⁴Enou avei khoche sü poloua mai hrülaiye reilova nou poa khelova koute hai southakhai toulai.

⁵Mai hrülai nou süloulai, süolouzü MAPAO Enou avei khoche sü paipa loure ae mai linoua sünasü nuchao loulai moe.

⁶“Thai-a bailaiyu mainare, nevei lüthou sü peyu bü dopfüa lükhaio. Mai hrülaiye panou zhingao loure donou levea nou lükhaio.

⁷Puletao nou ne hi daisounou dopfüa lüwe tea noulouzü, veahoyu sü velaire, südonou lüwe tea chila peio. Ko süna choulouyu phaki, puletao vei lüthou hisü ngaopiyu nou phoutao loulai, puletao vei bah sü lülou hoa bailai, puletao vei khuvei nasü hata-a bailai, ae puletao vei khoubou sü ngurürüa bailai. Teile sünasü velai; teile sünasü hai hi ve-a bure.” Haisü Ramai MAPAO nou paowe.

⁸MAPAO nou ahi paoe,

⁹“Thai-a bailaiyu mainare, rachipaola peikhaio. Maikhe mai hisü MAPAO Enou paoyu nasü paopeio: Khoche ali, khoche ali hai hei thailoure ae soupeivava loure.

¹⁰Hai nasü maiye daothare donou hei souloure, teipeiva vayu büa peiva vare donou soupeiva loure. Sühisü panou savayu hai bupu khailai moe, daiolouzü avei maitao nou paopi peiyu ae tudee peiyu khesü ngaophou more.

¹¹Khoche nasü soupeivava loure, ae poa vah soutare donou souda loure. Hai nasü hei thailoure ae soupeivava loure, chuo maiye southayu mai bah hi thoupei laire.

¹²Thai-a bailaiyu mainare, kra-a dopfü loukhaio; khoche hai nasü avei maitaoye donoue, ae Israel mai vei süthai-apei maitao donoue. Puletaoye sü mai kukhe maitaoye koa nou southawulai. Levea nou khao sü khoukhaio!

¹³Enou avei maitaoye sü kabüresa tea zhua nou bue, ae puletao nou ledaba louzü, haibüyu veishi hai puletao hi panou vepalai.

¹⁴“Chuo thai-a bailaiyu mainare, rachipaola peikhaio. Ne bah sü tyaokhaio ae khoche nasü panou daoyu thainou daopu peikhaio. Khoche hai nasü maiye southayu khoche-e, maiye soupiyu ae southa peiyu khoche-e.

¹⁵Hai nanou avei maitao tsüle sü souchathai peilai ae puletaoye panou kaodu talai. Teipeiyu büa reivavayu ae maiye southalai tea buyu khoche nasünou poloua Enou avei maitao nuhdu nasü soupi peilai.

¹⁶Oh hei veiyu khoche, zhoulova ae nalova sü daothou khaio! Nenou reiveyu buh teitei hisü daothou khaio.

¹⁷E-a abah sü tyaolai ae avei lekha rarou nasü che-a bailai. MAPAO Enou haisü paowe.”

¹⁸MAPAO nou ahi paoe,

¹⁹“Thai-a bailaiyu mainare, Babilon hi veo panou puhvei khoche poa vere donou ludu ahai hisü shee soupeio. Ludu sühaisü tyadei ali hinou soushu talai. Ludu ratayu hisü shee loure donou rükhai peio.

²⁰Shee ali nou Ammon maivei nuhdu, Rabbah hi tare ludu nasü ngaopeilai ae kukhe nanou Judah maivei nuhdu veisho-a reihkhaobu soukhai touyu Jerusalem hi tare ludu nasü ngaolai.

²¹Babilon hi veo nou shee soukhai touyu ludu ratayu hinou la-a nou bue. Puhnou ludu kalova talai touyu süloure donou puhnou voulouthou sü süpaloua deiphi laikou zhulai ae puhnou basharatao hinou noulai ae puhnou posheela khaitouyu kikhaorü vei sousüh kabüa busa touyu hai zhulai.

²²Chuo puhnou Jerusalem tea rükhai touyu vouloushu nasü puh bah zhoulova nou poloure. Hai nanou puhye taho southare donou buh soulo, reivo soua shakhaio, rokhubomü phi hinou southare buh soulo, deibvü raolo ae nülouyu vei na pokhai buh soulo tea paowe.

²³Jerusalem hinou hrüa buyu maitao nou haisü louche lai moe, daiolouzü puletao nou puletaoye koa chavei lathao-a buloure donou vo soukhai toue. Ana haibüa vepalai tea rai-a paopeiyu hai nanou puletao hi puletao vei mah khesü panou süloulai ae puletaoye nüpoa ta-a bailai touyu nasü paopi peilai.

²⁴Süthaisü Ramai MAPAO nou haibüa paoe: Nevei mah khesü popa ngao peilai, mai hrülai nou ne hai daizhou koute mah busa touyu hai süloulai. Nevei mahtao ae nenou soupfüyu vah teitei hai maikhe mainou süloulai. Nenou mahyu thaifüa Enou neye ngaobayu maitao bah hi thaothou peiwulai.

²⁵“Mai shiyu ae sheemoyu Israel maivei teidei khowo nevei teithe naye akhai soua tudeere teithe sü vere.

²⁶Ramai MAPAO Enou hai sü paowe. Nevei veo peirü ae vemai vei sabanü sü phakhaio. Halia panou raibütoua bupeilai moe. Touha sohayu maiye panou khouko sü ngaoloulai ae duso soua maiye tukhayu maitaoye sü sounakou khaiwulai.

²⁷Hakatare hakatare! Ongai, Enou nuhdu nasü soushi khaiwulai. Ana Enou hai khesü nuhdu naye panou tudee peilaiyu mainaye doloumo koute panou vepalaimo hie. Süthaisü Enou puh bah hi thaothou peiwulai.

²⁸“Thai-a bailaiyu mainare, rachipaola peikhaio. Israel maiye paoshi-a buyu Ammon mai hi haibüa Ramai MAPAO Enou paowe tea paopeio: Puletaoye souhare donou khoche sü souda khaiwure; Southare donou khoche sü soupeivava khaiwure ae teipeivayu büa peivava-a bure.

²⁹Nenou zho kounou ngaoyu nasü da-a baie ae nenou vepalai tea paoyu nasü cheche moe. Ne hai mai shie ae nevei teile sü velaire, neye akhai soua tudee peire teithe sü laire. Khoche nou nevei te sü daodelai.

³⁰“Koche sü pokhaio! Enou neye sü, neye soulouyu buh, neye nalouyu teidei hinou tudee peilai.

³¹Mei taotutuyu büa avei lekha rarou nasü neletao hi velai ae zhaipou shishoyu mei, soukanghi süshoyu mai bah hi neletaoye sü Enou thaothou peilai.

³²Neletaoye sü mei nou deihawulai lah neletao vei teidei hinou neletao vei zhe hai kükoulai, ae mai linou-a neletaoye sü lichopu peilai moe.” Haisü MAPAO nou paowe.