Read Poumei Naga EZEKIEL 23 Bible Online

EZEKIEL 23 - Poumei Naga bible

EZEKIEL 23

²“Thai-a bailaiyu maipure, teile ali hi pfümai ali hai nahtouna ahai bue.

³Puhai nou nahle-a buki Ejipt hinou hrüe ae sühinou puhaiye sü mainou sabu sazü peia puhai sü khakhapfü soutare.

⁴Tsünapai zhih hai Oholah toue, (puhnou Samaria maiye paonüdawe), ae nahpai zhih nou Oholibah toue (puhye sü Jerusalem paoe). Enou puhaiye sü nakhei loue, ae puhai nou eye nahpoutu nahnaotu taoli napeie.

⁵Oholah nou avei soua bulikhu honapai hai honapai vei jüpayu Assaria maiye thainü loure ae khakha tare.

⁶Puletao hai sabanü papayu tyanou raibütoua banaoyu soureih mai, nuh teidei khoyu mai, ae peikhoyu maitao; puletao hai nahle-a nou hüvei shoyu ae rhei pfüyu soureihmai khaitoue.

⁷Honapai nou Assaria vei peikhomai hrülai hi khakha tare, ae honapai vei reshiyu sünou süthaisa-a puhye panou Assaria maivei bashara khesü thotare ae lah puhye sü souzhai loure.

⁸Honapai nou Ejipt teidei hinou nahle-a buki khakhapfü soutayu nasü baimoa soutapure. Honapai nou loumainah soua bukinou poutumaiye sabu sazü tare, ae puletao nou puhye sü khakhapfü soua po-e.

⁹Südonou Enou honapaiye puhnou jüpashoa buyu puhnou leshiyu Assaria mai bah hi thoupeire.

¹⁰Puletao nou honapaiye sü sabanü phakhai touloua baitou tea khaipeie, puhvei nah poutu ae nahnaotu maitaoye sü nüloure, alia honapaiye sü khoche nou daothawure. Honapai vei ko hai buliki nou hrüyu naotumaitao nou kupoa nou bue.

¹¹“Honapai vei thaihoupai Oholibah nou hai khesü ngao-a buyuma honapai hai Oholah jünou shipure ae khakhapu tare.

¹²Honapai nou Assaria mai, nuh teidei khoyumai, peikhomai, reihna tufüa buyu reihmaitao, rhei pfüyu peikho maitao ae hüvei sho-a buyu nahle maitaoye sü jüpapu loure.

¹³Honapai nou sheemoa hrüyu hrü sü Enou ngaoloure, puhai mai ahai kheinou ludu ali hinou ta-a baire.

¹⁴“Honapai hrü veimoyu hinou shipulailai tare. Babilon maivei peikho maitao vei zhurai hai kivo vahi daokhai touyutao ae rükhai touyutao, puletao vei khya hi sah nou phupfüyu ae zhainga veisho-a pei hi phupfüyu khesü honapai nou ngaolou khaie; puhnou dzüpa loure.

¹⁵

¹⁶Honapai nou sütao hai ngaolou khaie, jüpasho loure ae Babilon mai hi kopo maiye seitare.

¹⁷Babilon mainou honapaiye sazüre donou veloure. Puletao nou honapaiye sü sabu sazü peia puhye souzhai peiyu thai, honapai nou puletaoye sü ngaoraloua nou puletao hinou tare.

¹⁸Honapai nou dukhea nou khakha tare, ae mai hrülai nou puhye sü khakhapfü soua nou süloure. Enou puh jürai paiye ngaorayu büa puh-a ngaora loure.

¹⁹Honapai nou nahle-a buki Ejipt hinou khakhayu büa khakhapu tare.

²⁰Honapai hai rekaleyu donou rheisüh moa rhei büa soushiyu poutu maitao nou thainü loure.”

²¹(Oholibah, nenou Ejipt teidei hi buki, ne nahle-a buki mainou pa nevei naonao marasoua ae maiye panou sabu sazüyu nasü nenou soupunü loure.)

²²“Südonou chuo Oholibah, Ramai MAPAO nou haibüa paoe: nenou ngaora-a thaotayu nevei leshiyu maitaoye sü panou ne pei hi raroulai ae Enou puletaoye save neye panou sühao loulai.

²³Enou Babilon hi mai, Kaldea mai hrülai, Pekod, Shoa, alia Koa maitao, ae Assaria mai hrülaiye sü save peilai. Enou zhurao veishoyu nahle maitao, peikho maitao, nuh teidei khoyu maitao ae rhei pfüa soureih souyu hi peikho maitaoye sü save jüloulai.

²⁴Puletao nou ne pei soureih soure donou reilova nou rheiluki ae rhei pfüa reihmai taoli hai sapoa nou veloulai. Puletao nou rü ae hupeirü pfüa neye sühao loulai. Enou neye sü puletao vei bah hi thoupeilai ae puletao nou neye sü lah puletao vei chikha thaifüa chiku peilai.

²⁵Enou ne pei hi lekhayu thaifüa neye sü panou puletao nou soupeilai. Puletao nou nevei nghou ae noubei sü vade loulai ae nevei nahmaitao-a southalai. Puletao nou nevei nahnaotu khesü ne hinou potawulai ae puletaoye sü hria mei nou deitha peilai.

²⁶Puletao nou nevei sabanü khesü paiphalai ae nevei muteiyu zhusana khesü poloua bailai.

²⁷Nenou Ejipt hi bukinou hrü ashi hrüa sashi-a laiyu nasü Enou neye panou soupu khailai moe. Nenou Ejipt maiye sü lichopu laimoe ae bashara khesü zhua zhupu khailai moe.”

²⁸Ramai MAPAO nou paoe, “Nenou ngaora-a buyu maitao bah hisü Enou neye thaothou peiwulai.

²⁹Ae puletao nou neye ngaorayu donou nenou soukhai touyu veishi sü ne hinou polaiwulai ae neye baitou tea thaokhai peilai, süthaisü ne hai khakhapfü ali-e touyu mai hrülai nou süloulai. Daiolouzü nenou sashia khakhayu donou.

³⁰Haibüyu khesü ne hi vewe. Ne hai tyahrütao vei khakhapfü soutare ae puletao vei basharatao nou lah neye souzhai loure.

³¹Ne jüraipai nou tayu ludu nasü nenou thaifüa tare, südonou Enou honapaiye panou tudee peiyu chapai hinou ne-a panou kelai”

³²Ramai MAPAO nou paoe, “Ne jüraipai nou keyu chapai; duyu ae thoushoyu na hinou ne-a kelai. Mai hrülai nou neye konüa panü soulai; daiolouzü chapai nasü phoutao bue.

³³Pai sünanou neye veahoyu sü peilai ae panou lulai, süna hai ngaopiyu ae haka tayu pai-e, süna hai ne jüraipai Samaria vei pai-e.

³⁴Nenou süna ke khai touloulai, ae sünavei pepoyu pe nou nevei naonao sü shasasalai. Ramai MAPAO Enou hai sü paoe.”

³⁵Chuo Ramai MAPAO nou haibüa paoe, “Nenou Eye ngaiyu donou ae ahi nou tarei tayu donou, nenou khakha-a sashi tayu donou veahoyu sü nenou ngaolai.”

³⁶MAPAO nou ahi haibüa paoe, “Thai-a bailaiyu mainare, Oholah ae Oholibah puhaiye tudeere donou souda loude homoe? Puhai nou ngaorayu vah soukhai touyu khesü puhai hi paopeio.

³⁷Puhai nou khulou vah sü soure ae maiye southare — puhai nou basharatao hinoukhulou vah soure ae puhai nou Eye nah napeikhai touyu nahpoutu khesü southare. Puhai nou avei nahmai hai southaloua basharatao hi poa sheela peire.

³⁸Puhai nou vah ashi sütao likhei soua baimoe. Puhai nou avei rathoki sü souzhaiwure ae Enou soushu peikhai touyu soteithe nasü reipei more.

³⁹Puhai nou avei nahmaiye southa loua basharatao hi posheela peiyu teithe zhou nou avei rathoki hi veloua souzhai peire.

⁴⁰“Puhai nou kadou sho-a buyu maitaoye puhai hi vepeio tea kopomaiye seiho kukhai kukhai-e, ae maikhe mai nou puhai hisü ve-e. Puhai nou dzü khülouwe, ngheiteipou nalowe ae zhusana sü thouloua maimou sü souloue.

⁴¹Puhai nou züphao aveih hisü bue, sü hinou taibel sü khailoua na aveihli khailoue, ae Enou puhai hi peikhai touyu poukai nüvei ae oliv theadzü khesü khailoue.

⁴²Chaochaosoua laiyu maime ali vei paikho sü chou-e ae poutumai me ali hai radeiki hilova nou puhai hisü velou bue. Puletao nou baosa sü puhai bah hi thoupeie ae hüvei shoyu vepeirü sü puhai pei hi rüpeie.

⁴³Süthaisü Enou lah ahi paoe, mainou sazü sabu-a sousasa chekhoyu naotupaiye sü chua puletao nou khakhapfü soua koa nou bubaire.

⁴⁴Puletao nou khakhapfü haina ahai hisü vekhai khai-a bure. Puletao nou hrü shiyu Oholah ae Oholibah hisü vekoute-a bure.

⁴⁵Acheche maitao nou puletaoye sü khulou vah souyu donou ae maiye southayu donou paomah paoshiwulai, daiolouzü puletao nou khulou vah ashi sü soua nou bure ae maiye southayu donou puletao vei bah hisü zhe taore.”

⁴⁶Ramai MAPAO nou haibüa nou paoe: “Mai shiyu maime ali saveloua puhai vei nakhesü panou shaolo.

⁴⁷Maime sünaye panou puhaiye chuh nou deipeio ae khoche sü poloua panou daopeio, puhai vei nahmaitaoye panou southa peio, ae puletao vei ki khesü panou mei deipeio.

⁴⁸Teidei teitei hisü Enou pa khakha-a hrü ashi hüyu sü bupulai more, sübüa naotumaiye panou ngaopi loua khulou souyu ae hrü ashi hüyu sü soupulai moe.

⁴⁹Ae mitoupfüpai ahaire, ne hainou hrü ashi hüa khulou souyu ae bashrataoye tho-a mah souyu donou tudee peilai, süthaisü ne hainou E hai Ramai MAPAO-e touyu sü süloulai.”