Read Poumei Naga EZEKIEL 24 Bible Online

EZEKIEL 24 - Poumei Naga bible

EZEKIEL 24

¹Etaoye nüpoa tayu po akü vei khouh kirou vei khouhkha kirou zhou hai MAPAO nou ahi haibüa paoe,

²“Thaia bailaiyu mainare, zhou teithe hai nasü rükhailo, daiolouzü zhou teithe hinou Babilon vei veo nou Jerusalem hai poloure donou sühao loulai.

³Khaityayu avei maitao hi Ramai MAPAO Enou nada hai nasü pao-a bure tea paopeio: Dzü lathouloua lee nasü mei pei hi popa shaokhailo.

⁴Veikayu soutao sü thou kholo, khaoraotao ae souphitao, alia sourao touveitao sü thoulo.

⁵Zhaotu veikayu sou sünou thou khokhaio, sou khoyu lee khesü süü alao thou deilo, sübüa dzü sü panou kotao taolo; sourao ae sou khesü kho khaio.”

⁶Ramai MAPAO nou haibüa paoe, “Maiye southayu, nuhdu nasü daizhou koute vealaisa! Nuhdu süna hai dzü khüshee moyu lee ali büre. Souva alili nou popa loua ali-a shokhai peilai moe.

⁷Nuhdu hisü maiye southakhai touyu sü bure, ana zhe sü deiphi hi soukou moe, pokulou hoyu chuh phao vasü soukou nakhai toue.

⁸Enou zhe sü panou sühi bua baie, sübüa panou halinoua poku pei moa lekha rarou hinou thasho-a panou khüngu phouloure donou sühi khaipei khaitoue.”

⁹Haibüa Ramai MAPAO nou paoe: “Maiye southayu nuhdu nasü daizhou koute veaho laisa! Enou mei deire süü sü pove khokhai peilai.

¹⁰Süü povepu khaio! Mei nghoukei khaio! Sou khesü khokhaio! Khaovudzü sü khothe khaio! Sourao khesü khothou hraivivilo.

¹¹Chuo baosahu lee nasü sakhai-a mei pei popa khailo, ae mei deithou homaralo. Süthaisü khoteikhai touyu lee nasü naanou hinou shee-a bailai,

¹²Khotei khaitouyu lee nasü hakhai moyuma naanou hinou shee-a bailai.

¹³Oh Jerusalem, nenou hrü ashi hrüa soupfükhai touyu sünou lah neye sü souzhai loure. Enou neye soushee peire donou te-a buyuma ne sü sheelu more. Avei lekha sünou neletao hi vemoyu thaio neletao hai sheelou hore.

¹⁴Ramai MAPAO Enou haisü paowe. Enou vah soutare teile sü vere. Enou neletao vei mah khesü khaipeipu laimore moyuma neletaoye leshi zhuvea peipulai more. Neletao nou soupfü khaitouyu thaifüa Enou neletaoye sü tudeelai.” Haisü Ramai MAPAO nou paowe.

¹⁵MAPAO nou ahi haibüa paoe,

¹⁶“Thai-a bailaiyu mainare, nenou leshi kayu mainaye sü Enou ne hinou bakha ali hinou polaiwulai, ana ne ngheidzüa koulai moe.

¹⁷Dopfüa krayu paisü panou chouso. Dopfüyu vei shee soua ne pei saiso, moa phi khaikho taso. Ne pah sü hoso moa dopfüyu mainou touso touyu büa touso hai touso.”

¹⁸Shona hai Enou maiye chakua nou buhie, ae koukhe sü achimai hai thaire, alia thainesho hai ahi paopeiyu thaifüa Enou soupeie.

¹⁹Maikhe mainou ahi haibüa noue, “Ne daisounou haibüa soupfüwe?”

²⁰Südonou Enou puletao hi haibüa paoe, “MAPAO nou Israel maitaoye chipao haitao hai paopeio tea paoe, neletao nou khaophu soua buyu alia jüpasho-a ve zhunüyu rathoki nasü Enou souha khaiwulai. Ae neletao vei thaihou maitao hai panou soureih souyu hinou thai-a bailai.

²²Süthaisü Enou souyu büa neletao nou soulai. Neletao hai pah sah hopfülai moe moa levea dopfüyu mainou touyu touso hai toulai moe.

²³Neletao hai pei saipfülai moe, moa phi sa-a talai moe moyuma dopfüa kra-a kalai moe. Neletao hai lah neletao vei mahmo donou veahoyu sü ngao-a alinou ali hi dopfüa nou bulai.

²⁴Süthaisü Enou neletao hi shee nasü soulai; Neletao nou Enou soupfüyu teitei hai soupfülai. MAPAO nou paoe, süolouzü haibüyu khesü vepare toulouzü neletao nou E hai Ramai MAPAO-e touyu sü süloulai.”

²⁵MAPAO nou ahi paoe, “Thai-a bailaiyu mainare, chuo puletao nou khaophu soua buyu ae sava-a buyu alia jüpasho-a ve zhunüa buyu rathoki nasü Enou puletao hinou potalai. Alia puletao nahnaotu poutu khesü Enou puletao hinou potalai.

²⁶Enou haibüa soulaiyu teithe zhou sü kamai-a nou turei paloua neletao hisü tave ko hai khesü paolai.

²⁷Süzhou teithe hinou ne hai raolou süyu khouko sü ngaodakhai loulai, ae nenou puhye sü chaku loulai. Haibüa nou nenou maikhe mai hisü shee soungao peilai, ae puletao nou E hai MAPAO-e touyu sü süloulai.”