Read Poumei Naga EZEKIEL 25 Bible Online

EZEKIEL 25 - Poumei Naga bible

EZEKIEL 25

¹MAPAO nou ahi haibüa paoe,

²“Thai-a bailaiyu mainare, Ammon maivei tyadei hisü aetou more tea paopeio.

³Ramai MAPAO Enou puletao hi paoyu sü keilo tea paopeio: Neletao hai avei rathoki nasü souzhai peiyu phaki, Israel maivei teidei soushi peiyu ae Judah maiye hukhamai soua nüpoa tayu sü ngaokhaie neletao hai lesare.

⁴Südonou neletaoye sü panou teinghi palova radeiki hinou buyu tyahrü taoye panou reih soua neletao vei teidei sü poloulai. Puletao nou neletao vei teidei hinou ve fühao sü souloulai ae neletao vei teidei hinou buloulai. Neletao vei rashithou ae chonaodzü khesü puletao nou tou-solai.

⁵Enou Rabbah nuhdu nasü racho khaiyu buh soupeilai ae Ammon maivei teidei veishi sü panou zhaotu buyu buh soupeilai, sükulouzü neletao nou E hai MAPAO-e touyu süloulai.

⁶“Ramai MAPAO nou haibüa nou paoe: Neletao nou Israel maivei teidei nasü ngaorayu donou neletao hai bahtaore, ae asasho-a nou teihi chopare.

⁷Neletao nou sübüa souyu donou, Enou neletaoye sü tyahrü kukhe mai bah hi thaothou peiwulai, ae puletao nou neletao vei buyu na veishi sü panou poloulai. Enou neletaoye sü souhakhai touwulai sübüa neletaoye sü panou tyahrü soua bupulai moe, moa lah neletao vei tyadei soua bupu khailai moe. Süthaisü neletao nou E hai MAPAO-e touyu süloulai.”

⁸Ramai MAPAO nou haibüa nou paoe, “Moab mainou Judah hai tyahrü kukhe mai aliye raibütoua baie tea paoe,

⁹südonou Moab maivei deirai vupeia buyu nuhdu khesü panou soureih huloulai, puletao vei veikayu nuhdutao- Beth Jeshimoth, Baal Meon, ae Kireiathaim nuhdu haitao hia panou soureih huloulai.

¹⁰Radeiki vei teinghei palova nou buyu tyahrü taoye panou soureih huve Moab maiye sü Ammon maiye koa hraoyu soupeilai, sübüa Moab maiye panou tyahrü soua bupulai moe.

¹¹Enou Moab maiye sü tudee peilai, ae puletao nou E hai MAPAO-e touyu sü süloulai.”

¹²Ramai MAPAO nou haibüa paoe, “Edom mainou zhaipou shisho-a Judah mai hinou khüngu hai phouloure, ae puletao nou khüngu phoulouyu hainasü khaipeilou hoyu mah ali soure.

¹³Chuo Enou Edom maiye tudee peilai ae puletao mai hrülai alia kikhaorü veishi nou southawulai tea Enou paosü papeiwe. Enou puletao vei teidei, Teman nuhdu hinou souhawulai, ae sühinou hrüyu maitaoye sü soureih souyu hinou southalai.

¹⁴Avei Israel maitao nou Eye donou Edom mai hisü khüngu phouloulai, ae puletao nou avei lekha rarou nasü puletao hi soupeilai. Süthaisü Edom mainou avei khüngu nasü kabüwe touyu hai süloulai, ae puletao nou E hai MAPAO-e touyu hai süloulai.”

¹⁵Ramai MAPAO nou paoe, “Philistin mainou zhaipou shisho-a raichoki nou puletaoye ngaoba-a buyu mai hisü khüngu phouloue ae puletao nou ngaorayu hinou puletaoye sü souhawure.

¹⁶Südonou Enou Philistin maiye sü duta laire ae Enou puletaoye sü souhakhai toupeilai. Enou Philistin maivei deikho hinou buyu mai hrülaiye sü souhakhai toulai.

¹⁷Enou puletaoye sü shisho-a nou tudee peilai ae soutaosou khüngu phouloulai. Puletaoye panou avei lekha rarou nasü süloulai. Süthaisü puletao nou E hai MAPAO-e touyu sü süloulai.”