Read Poumei Naga EZEKIEL 26 Bible Online

EZEKIEL 26 - Poumei Naga bible

EZEKIEL 26

¹Etaoye vakou nüpoa tayu po kiali vei khoukha ali zhou MAPAO nou ahi haibüa nou paoe,

²“Thai-a bailaiyu maipu nare, Tair vei nuhdu hinou hrüa buyu maitao nou Jerusalem ye sü haibüa nou paoe, ‘Chuo Jerusalem hai pepo tare, puhnou huha souloure khouko nasü hatare! Puhnou Etaoye dupu khailai more.’

³“Südonou chuo MAPAO Ramai Enou paoe: Tair nuhdu pere, chuo Enou neletao vei ngaobayu nasü soulaire. Enou tyahrü taoli hai neletaoye panou dure donou save peilai, ae puletao hai zai hi dzü nghouyu büa neletao hisü velai.

⁴Puletao nou neletao vei nuhdu kivo khesü soushiwulai ae neletao vei ki kushoyu khesü daphe dakholai. Süthaisü Enou naihü veishi sü panou hüpoa tawulai, sübüa chuh rao likhei shokhai pei bailai.

⁵Khah phouyu mainou puletao vei khahbesah sü chuhlya sütao hinou phulai. Ramai MAPAO Enou haisü paowe. Tyahrütao nou Tair vei na khesü shaoloulai,

⁶ae puletao vei khoche nou Tair vei nuhdutao hi hrüa buyu maiye sü southalai. Süthaisü Tair mainou E hai MAPAO-e touyu süloulai.”

⁷Ramai MAPAO nou paoe, “Enou vemai hrülai jünou dukayu Babilon hi veo Nebukhadnezzer sü panou Tair pei hi reih soulai. Puhnou reihmaime dushoyu aliye sü saloua panou rheiluki ae rhei pfüyu reihmaitao koa nou reilova nou velai.

⁸Nuhdutao hinou hrüa buyu maitao hai soureih hinou thai-a bailai. Ngaobayu maitao nou neletaoye haoloua nüloure donou deibvü sü heloulai ae neletaoye dure donou kivo sü soushuloulai.

⁹Puletao nou zhaotu kai poloua neletao vei kivo khesü soukholai ae neletao vei ki kushoyu khesü hupolou daphe dapholai.

¹⁰Rhei pfüa tayu vei naihü khaopayu sünou neletaoye holoulai. Soushi khaitouyu nuhdu hi rheiluki ae rheikarü nou rokhubomü hi talouyu phaki sütao vei kho sünou kivo khesü soukho lai bailai.

¹¹Puletao vei rhei pfüyu maitao nou neletao vei ludu khesü deisasalai ae puletao vei khoche sünou neletao vei maikhesü southalai. Neletao vei dusho-a buyu deka khesü deiphi hi soukaokou khai peilai.

¹²Puletao nou neletao vei nangitao ae huha souyu na khesü shaoloulai. Puletao nou neletao vei kivo tao ae veisho-a soukhai touyu ki khesü daphe dapholai. Puletao nou chuh, süü ae mutei chuh khesü poloua zai hi laithoulai.

¹³Enou nevei loutao ae poa lou souyu basei khesü nuchaowua panou choupulai moe.

¹⁴Enou neletao vei teidei hisü halia panou bulai moe, khah phouyu mainou khahbesah panou phukhaire donou chuh-rao likhei shokhai peia bailai. Nuhdu nasü soushupu loulai moe. Haisü MAPAO Ramai Enou paowe.”

¹⁵Ramai MAPAO nou Tair vei nuhdu vanou haibüa paoe: “Mainou ne jünou reih veilouyu phaki, zaipe hinou hrüa buyu maitao hai maiye southayu vei rayu pai hai chouloua ngaopi sholai.

¹⁶Zai pe hinou hrüyu tyahrü hrülai vei vemaitao hai puletao vei vebuh hinou taokou talai, ae puletao nou vemai vei na nouyutao ae puletao vei sabanü aveih khesü phakhaiwua deiphi hinou ngaopi-a nguhrührüa nou bulai. Ne hi vepayu ko khesü puletao nou süloua ngaopi sholai ae puletao nou ngaopia ngurürüa buyu sü thaolou hoa bailai.

¹⁷Puletao nou neye donou koulilia haibüa lou soulai: Zhih tasho-a buyu nuhdu, kabüa neye sü zai hinou souharesa! Nuhdu haina hinou hrüa buyu maitao nou zai hisü khasa-a nou hrüe, ae zai pe hinou hrüyu mai hrülai nou neye sü ngaopi-a nou hrüe.

¹⁸Nenou kaodu tayu teithe zhou hai zai nou sühao-a buyu teideitao hai ngaopi-a nou ngure, ae teidei sühinou hrüa buyu maitao hai neye soushi souha khaitouyu khesü süloua khupa soure.”

¹⁹Ramai MAPAO nou paoe, “Enou neye sü soushi khaitoua mailia hrümoyu nuhdu ali büa soupeilai. Enou neletaoye sü panou zaidu hi dzü nou holoulai.

²⁰Enou neletaoye sü daoh mainou hrüa buyu thaimai vei teidei hisü seiho peilai. Enou neletaoye sü teisa nou soushikhai touyu dei khevai deiphao hinou thaiyu maitaoye koa panou bulai. Neletaoye panou ahri maivei teidei hisü bupukhai toulai more.

²¹Enou neletaoye panou maikhe maiye ngaopi shoyu shee ali soupeilai ae sünanou neletao vei akhai soulai. Maikhe mainou neletaoye sü phoulai ana neletaoye sü ngaopulai moe.” Haisü Ramai MAPAO nou paoe.