Read Poumei Naga EZEKIEL 28 Bible Online

EZEKIEL 28 - Poumei Naga bible

EZEKIEL 28

¹MAPAO nou ahi haibüa nou paoe,

²“Thai-a bailaiyu mainare, Ramai MAPAO Enou paoyu avei chipao hai Tair vei veo nahpoutu hi paopeio. Ne hai lah nevei tsüle hinou khaophu soua ne hai rah alie tea kha-a nou bure ae rahtao nou buyu buh, zaidzü nou sühao buyu hinou bulai tea khaophu soua nou bue. Ne hai rah ali-e tea tsücho-a bumala-e, ana ne sü rah moe, thai-a bailaiyu mai ali baie, rah moe.

³Ne hai Danel jünou tsü veipu hie. Kheiyu halia ne hinou pokulou hoe tea ne lah tsüchowe.

⁴Nevei tsüdo aveih ae dokai veiyu sünou shahu ae sana taoli pojüloua ne sü toungiwe.

⁵Ne sü dokai veisho-a nou huha sü souloue ae chopayu sü souloue. Ne hai nevei nangi buyu donou daizhou koute khaophu sü soudesa!

⁶“Südonou chuo Ramai MAPAO Enou paowe: Nenou rah büa tsü veiwe tea tsüchoyu donou,

⁷Enou zhaipou shishoyu ngaoba maitaoye sapoa ve neye panou dulai. Puletaoye panou nevei tsüdo aveih ae dokai veishoyu hinou veisho-a soukhai touyu veishi sü soushiwulai.

⁸Puletao nou neye sü southalai ae neye dzü buyu khüh hi pothou vupeilai.

⁹Puletao nou neye southalai tea veyu phaki, ne hai rah alie tea khalou süvu? Nenou neye southare maitaoye daolouyu phaki, ne hai thai-a bailaiyu mai ali soua bailai, ne sü rah moe.

¹⁰Ne hai sei ali bütoua ramai ye sümoyu vakou mai bah hinou thai-a bailai. Ramai MAPAO Enou kharochi hai nasü peiwe.”

¹¹MAPAO nou ahi haibüa nou paopue.

¹²“Thai-a bailaiyu punare, Tair hi veo nou vedaoretao donou levea dopfü peio. Ramai MAPAO Enou haibüa paoa nou bure tea paopeio. Ne hai vuli hio lichekho tea nou buyu mai ali vei shee soua nou bue. Süteile hi ne hai daizhou koute tsüdo veisa ae zhurao veisa!

¹³Ne hai Ramai vei kipei, Eden hinou hrüe, ae mutei shoyu chuhva khesü toupfüe: rubi, diamond, topaz, beryl, karnelian ae jasper, sapphires, emeralds, ae garnets. Ne hai sana nou zhusana soua nou pfüe. Sütao hai neye soupeiyu teithe hinou neye donou soupeie.

¹⁴Enou ngaopi shoyu rakivamai aliye panou neye khore donou khaipeie. Nenou sheeyu avei deichi hinou hrüe ae mutei chuh paivavayu hinou tae.

¹⁵Nevei zhaidou hai neye soupeiyu teithe hinou poa nenou vah ashi soutamo koute hai veisho-a nou lichekho toue.

¹⁶Ne hai hupona hüyu ae zhoyu hinou zhoha sholoure, ae hai vanou ne sü zhaipou shitare ae mah soutare. Südonou Enou neye sü avei sheeyu hinou hutawure ae neye khoyu rakivamai nanou neye sü mutei chuh paiva vayu hinou hulaiwure.

¹⁷Ne hai zhurao veiyu donou khaophu sü souwe ae ne zhih tayu donou ne sü voyu mai ali büa hrüre. Hai vanou Enou neye sü deiphi hi soukou khaipeire ae veo mai sü deiphi hi soukou khaipeire ae veo mai kukhetao panou ngaopire donou soupeire.

¹⁸Nenou mahmo taoli soukhai touyu donou ae huha souyu kaozü moyu alao souyu donou nevei rathoki sü souzhaiwure; Südonou Enou nevei nuhdu khesü mei deipeire. Chuo neye zhuyu mai hrülai neye sü vounai data-a ngao-a baire.

¹⁹Ne sü hatare, teisa donou hatare ae neye sülouyu tyahrü hrülai nou ngaopi sholai ae puletao-a neye rai-a bailai momo tea ngaopisho-a nou bure.”

²⁰MAPAO nou ahi haibüa paoe,

²¹“Thai-a bailaiyu mainare, Sidon nuhdu nasü aetou more tea paopeio.

²²Puletao hisü Ramai MAPAO Enou haibüa nou pao-a nou bure tea paopeio: Oh Sidon Enou neye ngaobayu nasü souta laire; Enou ne hi soupeiyu vahtao donou maikhe mainou Eye paosholai. Neye koa hrüyu maitaoye Enou tudee peiyu phaki, E hai daizhou koute sheeyu MAPAO-e touyu hai puletao nou süloulai.

²³Enou neletao hisü sounou ashi hai seive peilai, ae neletao vei ludu tao hisü zhe panou külai. Neletaoye sü panou kainghou veishi hinou reih souvelai, ae nevei maitaoye sü southalai. Süthaisü neletao nou E hai MAPAO-e touyu sü süloulai.”

²⁴MAPAO nou paoe, “Israel maiye sühaopoa buyu tyahrü ali noua Israel maiye pounghou ae shube büa soushipu khailai more. Ae puletao nou E hai Ramai MAPAO-e touyu sü süloulai.”

²⁵Ramai MAPAO nou paoe, “Enou Israel maiye tyahrütao hi soupho rarou khaitouyu hinou podakhai ve jüpeilai, ae tyahrü hrülai nou E hai sheewe touyu sü süloulai. Enou avei kilai Jakob hi peikhai touyu teidei, lah puletao vei teidei hinou Israel mai hai hrülai.

²⁶Puletao hai sühinou kaozhou vei-a nou hrüloulai. Puletao nou ki sü soushu loulai ae darkhabe khesü shothou loulai. Israel maiye ngaora-a soushiyu tyahrütaoye sü Enou tudee peilai, ae Israel mai hai zhoukao vei-a hüloulai. Süthaisü puletao nou E hai puletao vei Ramai MAPAO-e touyu sü süloulai.”