Read Poumei Naga EZEKIEL 3 Bible Online

EZEKIEL 3 - Poumei Naga bible

EZEKIEL 3

¹Ramai nou paoe, “Thailaiyu mainare, larübvü nasü toulo; süthaisü Israel maitao hi taho paopei khaio.”

²Südonou Enou amü sü hepa loure, ae puhnou larübvü nasü Eye panou toure donou peie.

³Puhnou paoe, “Thai bailaiyu maipunare, Enou neye peiyu larübvü nasü toulou khaio; süna nou ne pou sü touthou phoulo.” Enou sünasü touloure, ae süna hai laivoudzü büa tou vei sho-e.

⁴Süthaisü Ramai nou paoe, “Thai bailaiyu mainare, Israel mai hisü taho Enou ne hi paoyu teitei hai paopeio.

⁵Enou neye sü vakou maivei tyahrü, la tateiyu maityatao hisü seitamoe, ana Israel mai hi seita peia baie.

⁶Nenou la sülou hoyu vakou maivei tyahrütao hi hakinou Enou neye seita peilouzü, puletao nou nevei chipao hai keinou peilai.

⁷Ana Israel maitao nou nevei chipao khesü keipeinülai moe, puletao nou avei chipao-a keipeilai moe.

⁸Chuo Enou neye sü puletao büa rochi shoyu ae le khou shoyu sü soupeilai.

⁹Enou neye sü chuhdu büa soukhou sho peilai, ae mutei shoyu diamond chuh büa souchüsho peilai; khaitya-a rochiyu maitaoye sü ngaopiso”

¹⁰Ramai nou haibüa paopue, “Thai-a bailaiyu mainare, Enou ne hi paoyu chi khesü soutao sou-a keilo ae licho khaio.

¹¹Süthaisü nüpoa tayu nevei maitao hisü Ramai MAPAO Enou ne hi paoyu chipao khesü puletao nou keipei-a keipei moyuma puletao hisü paongao peio.”

¹²Süthaisü Ramai vei rako nou Eye polashu peiwure, ae athailo nou pai chisho-a nou haibüa rayu sü Enou choue, “Raki vanou buyu MAPAO vei kathe sü paosho khaio”

¹³Hrikhaonatao nou zhaoyu shouh kho hai Enou chou-e ae puletao vei lukiphi kho hai nüsüyu kho büa kho hai chisho-e.

¹⁴MAPAO vei khouko sünou ahi chisho-a nou ve-e ae puhvei rako nou Eye poa tayu phaki ale hai choropoa E hai lekha shore.

¹⁵Enou Khebar rei pe hinou buyu Tel Abih hisü veloure ae buh sühisü hukhamai soua nüpoa tayu maitao nou bue, Buh sühinou teithe anai koute hai Enou ngaoyu ae chouyu khesü avei tsüle hisü phoutao poa nou E sü bue.

¹⁶Teithe anai cheyu thaisü MAPAO nou ahi haibüa paoe,

¹⁷“Thai bailaiyu maipure, Enou neye panou Israel maivei tyahrü sü khopeire donou doloure. Enou ne hi paopeiyu khesü nenou puletao hi paopi peilai.

¹⁸Enou mai ashi mai ali hai thailaire tea paosüpa peikhai toua nenou puhye sü paopi peimoa puhye panou mahmai ali soua thaita louzü, puhnou thaiyu nasü ne pei hi velai.

¹⁹Hakinou nenou mai ashi mai naye paopi peia puhnou mah souyu sü baimoa puh hai thaita louzü, nevei hrirai hai khailupa peilai.

²⁰“Mai aveih mai ali hai vah ashi souta-a Enou puhye kaozhou ashi hi thoupei louzü, nenou puhye paopi peiloumo louzü puh hai thai-a bailai. Puhvei mahmo donou puh hai thai-a bailai, puhnou vah aveih soukhai touyu khesü Enou licho peilai moe, ae puhnou thaiyu sü ne pei hi velai.

²¹Mai aveih maiye nenou mah soupuso tea paopi peiyu hai keiloua puhnou mah soupu more toulouzü, puh hai hriloulai ae nevei hrirai hai-a khailupa peilai”

²²MAPAO vei khouko hai dusho-a nou ahi veyu hai Enou süe ae puhnou ahi haibüa paoyu Enou chou-e, “Tashulo, buh sühinou kealai”

²³Südonou Enou deikho hisü ve-e ae Enou raichoki Khebar rei hinou ngaoyu bütoua MAPAO vei khouko ava hai ngao-e. Enou apei hai deiphi hi pfünakou loure,

²⁴ana Ramai vei rako sünou ahi louloua Eye polashu peiwure. MAPAO nou ahi haibüa paoe, “Ne ki hi veloua ne lah kikhu sü khua nou bulo.

²⁵Thai-a bailaiyu mainare, neye sü rai nou phukhailai, sübüa neye panou maisou hrohisü tapa loulai moe.

²⁶Enou nevei müli sü panou raoloulai moe, sübüa neye panou khaityayu maitaoye sü paopi peiloulai moe.

²⁷Süthaisü Enou neye chapuyu phaki, Enou neye raolou süyu khouko hai peidakhai peilai ae nenou puletao hisü Ramai MAPAO Enou ne hi paoyu chipao khesü puletao hi paopeilai. Nenou paoyu chi sü kamai-a nou ngaophou peilai moe, daiolouzü puletao hai khaityayu tyahrü ali baie.”