Read Poumei Naga EZEKIEL 31 Bible Online

EZEKIEL 31 - Poumei Naga bible

EZEKIEL 31

¹Etaoye vakou nüpoa tayu po kiali, khouh asü vei khoukha ali zhou MAPAO nou ahi haibüa paoe,

²“Thai-a bailaiyu mainare, Ejipt hi veo ae maikhe maitao hi haibüa paopeio: Ne hai daizhou koute khouko busa! Enou neye thaoye paonadalai?

³Ne hai Lebanon hi buyu sedar süübe ali büe, süübotao hai hüveisho-a nou vaosüü khesü hopoa nou bue, ae süübe kuyu hai teihao hi khe-a nou bue.

⁴Süübe naye panou dusopa loure donou sühisü dzü bue, Ae deikhevai buyu reitao nou puhye vaipeie. Süübe nanou paopaloua dusopayu buh hisü puletao nou dzü züpeie Ae vaohro hinou buyu süübetao hisü reitoutao hai küta peiwe.

⁵Dzü hai veisho-a buyu donou süübe kukhe jünou kupu shohie; Süübo khesü veishore ae sosho pare.

⁶Tei hi raohoutao nou süübotao hinou phe sou-a nou bue; Rekhaona khenou süübe sünaphi hinou ve toutu toua nou bue; Tyahrütao nou süna vei teikhü hinou ve so-a nou bue.

⁷Süübe süna hai daizhou koute hüveisa; süübe süna hai kusho-e ae süübotao hai shaso sho-e. Kamaa hai deikhevai nou dzü küa buyu hisü tsülouwe.

⁸Ramai vei kipei hi buyu sedar süübetao hai ali-a puhye valou hore, moyuma süübe kukhe hai aliro puh büa süübe veiyu hai ha-e.

⁹Enou süübe hai nasü southou hüvei shopeie, ae süübo khesü panou veisho-a pa-e. Ramai vei kipei, Eden hinou buyu süübe veishi sü hainaye thai-nüa nou bue.

¹⁰“Südonou chuo Ramai MAPAO Enou teihao hi dusho poa khe nghia buyu süübe nasü dai-e vepalai touyu sü ne hi paongao peilai. Süübe hai nanou dushopa khaie, khaophu soutare;

¹¹südonou Enou puhye sü malaire ae vakou mai bah hi thaothou peilai. Puhnou süübe nasü puhvei ashi thaifüa soupeilai.

¹²Zhaipou shishoyu vakou maitao nou puhye sü vikhao loua khaipeilai. Puhvei süübo khesü deichiva hi ae deikho teitei hi kaokou dalai ae baokao veiyu khesü kaokou dasasawulai. Tyahrütao nou puhvei teikhü khenou buyu maitao hai puhye thaowua ta-a bailai.

¹³Tei hi raohou khenou kaotayu süübe hisü bulai ae rekhaona khenou süübotao hinou talai.

¹⁴Südonou chu thainou, süübe ali-a puhye sü veisho-a nou dzü züpeiyuma süübe süna büa vei-a nou kukhailai more, moyuma süna büa teihao vahi kukhe khailai more. Puletao veishi hai mai büa thai-a bailai, athai maivei deiphao hi hotayu maitao koa nou ve buta-a bailai.”

¹⁵Ramai MAPAO nou haibüa nou paoe, “Enou süübe süna hai thaimai vei deiphao hi seitayu teithe zhou sü, Enou deikhe nou buyu dzütao nou pa puhye dopfüyu vei shee ali soua holoulai. Enou reidzü sü nuchaowulai ae reitou khesü panou külai moe. Daiolouzü süübe nasü thaitayu donou Enou Lebanon Deichitao hisü mai-zhiyu sü seive peilai ae vaohro hinou buyu süübe veishi hai panou kita vüta-a bailai.

¹⁶Enou puhye thai maivei deiphao hi seikouyu phaki, puhnou kaodu tayu vei kho sünou tyahrütaoye sü soulü peilai. Eden kipei hi buyu süübe veishi ae Lebanon hinou veisho-a buyu süübe teitei deiphao khevai loutayu hrülai hai puhnou kaodutayu donou asasholai.

¹⁷Puletao nou puhye koa raichoki nou kaodu tayu tao nou buyu thaimai vei deiphao hisü koa talai ae puhvei teikhu khenou hrüa buyu maitaoye sü tyahrütao hi soupho rarou laiwulai.

¹⁸“Süübe nahai Ejipt hi veo ae puh maitao-e. Eden kipei hi buyu süübetao hai puh büa sasho moe ae hüvei moe. Ana chuo Eden kipei hi buyu süübetao raibüa puh-a thaimai vei deiphao hi ramai hayu maitao ae soureih hinou thaiyu maitaoye koa nou bure. Haisü Enou paowe,” tea Ramai MAPAO nou paoe.