Read Poumei Naga EZEKIEL 32 Bible Online

EZEKIEL 32 - Poumei Naga bible

EZEKIEL 32

¹Etaoye vakou nüpoa tayu po kiahai khouh kiahai vei khoukha arai zhou hai MAPAO nou ahi haibüa paoe,

²“Thai bailaiyu pu, Ejipt hi Pharaoh veoye donou dopfüa kouliliyu ali soupeio ae puh hi avei chipao haina hai paopeio: Ne lah ne hai tyahrütao hinou chipeikhaodu nasüe tea tsüchowe, ana ne hai dzü hinou buyu keipaodu nasü baie. Ne phi nou rei dzü taikü peiwe ae reitao hai soushipeiwe.

³Tyahrütao nou tave jülouyu phaki, Enou neye sü khahbesah nou beloulai, ae puletaoye panou neye sü reipe hi daopa khaiwulai.

⁴Enou neye sü deiphi hi khilaikhai peilai ae deiphao hi buyu raohou ae hrikhaona khesü save panou neye toulai.

⁵Enou nevei thaiphaotao hai deichitao hi ae deikhotao hisü poa raopeilai.

⁶Enou ne vei zhe hai deichitao pei hi lazü peilai ae reitao hisü panou kü phoupeilai.

⁷Enou neye souhayu phaki, Enou ratei sü howulai ae teivu khesü panou maita-a bailai. Enou teinghei sü panou teihao nou holoulai ae khouh nou puhvei ava sü peimoa bailai.

⁸Enou rakiva ava buyu teitei sü souhalai, ae nevei deiphao sü panou zhitei-a bailai. Haisü Ramai MAPAO nou paowe.

⁹“Enou neye nüpoa nenou sükhai moyu teidei, tyahrütao hrohinou satayu phaki Enou mai taoli vei tsüle hai souvea peilai.

¹⁰Enou ne hi soupeiyu khesü ngaoloua tyahrü taoli hai khupa soulai. Enou avei khoche poa zhapeiyu phaki, vemai taoli hai ngaopi sholai. Ne kaodutayu teithe hi puletao mai hrülai nou lah puletao vei hümai donou ngaopi-a ngulai.”

¹¹Ramai MAPAO nou Ejipt vei veo hi haibüa paoe, “Babilon hi veo vei khoche sü ne pei hi velai.

¹²Enou tyahrütao vei zhaipou shishoa buyu reihmaitao vei khoche sü panou paipa loulai ae nevei mai hrülaiye sü panou southakhai toulai. Nevei mai hrülai ae nenou khaophu soua buyu na veishi hai panou souhakhai toulai.

¹³Dzü veisho-a buyu hinou hrüyu nevei kikhaorü khesü Enou southalai. Sühisü panou mai moyuma kikhaorütaoye panou dzü sü souküpu khailai moe.

¹⁴Enou nevei dzü khesü panou leirei-a nou bubailai ae rei khesü panou kaonaphi tea nou küa bailai. Haisü Ramai MAPAO Enou paoe.

¹⁵Enou Ejipt teidei hai soushi-a khaipeiyu thai, ae sühinou hrüa buyu maitaoye souhayu thai, puletao nou E hai MAPAO-e touyu sü süloulai.

¹⁶Paopi peiyu chipao haitao nou koulilia puletao thaiyu vei lou soulai. Tyahrütao vei naotumai nou hai nasü dopfüa nou Ejipt ae sühi hrüa buyu maitao donou soulai. Haisü Ramai MAPAO Enou paoe.”

¹⁷Etaoye vakou nüpoa tayu po kiahai, khouh ali vei khoukha kiangou zhou MAPAO nou ahi haibüa paoe,

¹⁸“Thai-a bailaiyu mainare, Ejipt hi maitao donou dopfü peikhaio. Puletaoye sü khouko bushoyu tyahrütaoye koa nou thaimei vei deiphao hisü seikou peikhaio.

¹⁹Puletao hisü haibüa paopeio: ‘Ne hai mai kukhe jünou hüveipu hie tea tsüchovu? Ne hai thaimai vei deiphao hisü hotalaire, ae Ramai sümoyu maiye koa dazü talaire.’

²⁰“Ejipt maitao hai soureih hinou thaitayu maitaoye koa kaodu talai. Puletao mai hrülaiye southare donou khoche soudawure.

²¹Khouko veishoyu aduso maitao ae Ejipt maiye donou soureih soupeiyu maitao nou Ejipt maiye thaimai vei deiphao hinou kho-a nou bulai. Puletao nou haibüa shalai: ‘Sheemoyu maitao, soureih hinou thaiyu maitao hai buh hai hi koure ae hai hinou puletao sü dazüwe!’

²²“Assaria nou puhvei reihmaitao khüh nou sühaopoa nou bue. Puletao mai hrülai hai soureih souyu hinou thai-e,

²³ae puletao vei khüh hai athai maivei deiphao akhai khailai hinou bue. Puhvei reihmai hrülai hai reihbu hinou thaikhai toure ae puletao vei khüh sünou puhvei khüh hai sühaopoa nou bue. Teile ali hi puletao nou ahri maivei teidei hai soupi peie.

²⁴“Elam-a sühinou puhvei reihmaitao vei khüh nou sühaopoa nou bue. Puletao mai hrülai hai soureih souyu hinou thaikhai tou-e ae puletao hai heebi moa thaimai vei deiphao hisü koutare. Hri-a buyu teile hi puletao nou maiye soupi peie, ana chuo puletao hai hraongu pfüa thaitare.

²⁵Soureih hinou thaiyu maitaoye koa Elam hai dazü tare, ae puhvei reihmaitao khüh nou puhvei khüh hai sühaopoa nou bue. Puletao mai hrülai hai heebi moe, mai hrülai hai soureih souyu hinou southakhai-a baie. Hri buki puletao nou maiye soupi-e ana chuo puletao hai thaitare ae hraongu ngaore ae soureih hinou southayu maitao bütoua puh-a thaitare.

²⁶“Meshek ae Tubal-a sühinou bue, ae puhvei reihmaitao vei khüh sünou sühao poa nou bue. Puletao mai hrülai nou heebi moe, soureih souyu hinou southakhai-a baie. Teile ali hi puletao nou hri-a buyu maiye soupi peie.

²⁷Puletaoye raichoki aduso maiye tsükhou sho-a poa daovuh peiyu büa daovuh peimoe, puletao hai reihna tutaopfüa puletao vei khoche hai puletao vei pei khai-a ae puletao nou rütao hai puletao vei püphao hi pfüa athai maivei deiphao hi hotawe. Mai haitao hai teile ali hi ahri maiye soupi peie.

²⁸“Chou Ejipt maiye sü heebi moa soureih hinou southakhai touyu maitaoye koa panou züzhi laire.

²⁹“Edom-a sühinou puhvei vemaitao ae peikho maitaoye koa bure. Puletao hai khouko veishoyu soureih maitao-e, ana chuo puletao hai athai maivei deiphao hinou heebi moa soureih hinou thaiyu maitaoye koa nou dazüa bure.

³⁰“Reilova nou buyu veo maivei nahpoutu mai hrülai sü sühinou bue, ae Sidon mai-a sühinou koa nou bure. Puletao vei khouko hai vuli hi maikhe mainou ngaopi shoe, ana chuo puletao hai hraongu pfüa soureih hinou thaiyu maitao ae heebi moyu maitaoye koa nou bure. Athai maivei deiphao hi hraongu pfüa hotayu maitao raibüa puletao-a hotare.

³¹“Soureih hinou thaiyu mai hrülai ngaolouyu phaki Ejipt hi veo ae puhvei reihmaitao hai asalai,” tea Ramai MAPAO nou paoe.

³²“Enou Ejipt hi veoye panou hriyu maitaoye soupi peie, ana puh ae puhvei soureihmai hrülai hai southakhai toulai ae heebi moa soureih souyu hinou thaiyu maitaoye koa nou dazü talai.” Haisü Ramai MAPAO nou paoe.